HOSEA 7 - Biblia Ilagho Jiboie Kwa Wandu Wose

¹ “Ingelo nawuyakunda kuwiboisa wandu wapo Israeli, niko kaung'a rawo rifunukukagha na mabonyo ghawo kuwoneka. Waawuyakaliana weni na weni; waawuyabara nyumba na kuiwa, na kusoka wandu vilambo chienyi.

² Ela ndewiwuemanya wei nawuyarikumbuka kazi rawo mbiwi rose. Mabonyo ghawo ghawimara chia rose na kuwikwa imbiri kwapo.”

Njama mbiwi andenyi ya ngome

³ BWANA waghamba, “Wandu wadamkalia mzuri na wabaa wake kwa kutumia njama rawo mbiwi.

⁴ Wose ni wakalii wisewadie wuloli ghungi. Kuzamilwa kwawo kooka sa modo ghuko irikonyi ghusesindikirwagha ni muochi mikate, hata mufu waghukanda ghwameria kungirwa chachu.

⁵ Ituku ibaa ja mzuri odu, wabaa werewongerieghe kwa divei ibirie hata wikadaika, na mzuri ukarangana nawo.

⁶ Ngolo rawo ra mikalo reeka sa iriko ja modo; wialalajokwa ni machu kio chee, nakesho ghiajoka sa lumu lwa modo.

⁷ “Wabwaghie wabaa wawo wose kwa machu ghawo gha modo. Wazuri wawo wabwaghilo umu umu, hata ndekuwadie ungi wawo wawuyanilomba wutesia.”

Israeli na iro mbari ra wandu

⁸ BWANA waghamba, “Wandu wa Israeli weeka sa mkate ghuseghalusiro kwa wundu ghosuwiria kwa wandu wa iro mbari.

⁹ Ndewiwuemanya wei uko kusuwiria kwa wandu niko kwawisoka ndighi rawo; waghosia na ndighi, ela ndewiwuemanya.

¹⁰ Kukukasa kwa wandu wa Israeli kwawuyashudia aighu yawo; aighu ya maza rose riwipatire, ndewighalukie na kuwuya cha kwapo ini BWANA Mlungu wawo.

¹¹ Israeli ooka sa mbughi isena akili; wandu wake wiammbanga Misri uchewitesia, sena ii chia wiakimbiria cha Ashuru.

¹² Ingelo wakakimbia, nichaighorua nyavu yapo nipate kuwiwada na kuwisera andoenyi sa nyonyi ra mbeonyi; nichawikaba kwa wundu ghwa mabonyo ghawo ghizamie.

¹³ “Ni bugha kwawo! Wanileghie na kunisigha. Wichatoteshwa. Kumangu nawikombua ela waawuyanitasa icho kisha.

¹⁴ Ndewiwuenilomba kwa loli putu, ela waawuyakukumba andonyi sa wandu wisemuichi Mlungu. Wikakalomba viro na divei wiabonya sa wandu wa iro mbari. Ni wandu winileghie putu!

¹⁵ Hata ngera ni ini niwijosere na kuwingira ndighi, ela waawuyaghesha kiwiwi aighu yapo.

¹⁶ Wanisighie na kuighalukia milungu isewadie ndighi; wakaia sa ndana ikomekie isedimagha kusuwirilwa. Wabaa wawo wichabwaghwa wudenyi angu wikukasire, na Wamisri wichawiseka.”