HOSEA 3 - Biblia Ilagho Jiboie Kwa Wandu Wose

Hosea na muka useko mloli kwa mumi wake

¹ BWANA ukanizera, “Ghenda sena kuwonyera lukundo kwa uo muka wawuyabonya wulaki na mkundwa wake. Suti kumkunde sa iji koni ini niwikunde wandu wa Israeli, hata ngera waghalukie na kuitasa milungu mizima, na kukunda kufunya mikate ya zabibu riomie rikaie vizongona kwa milimu.”

² Niko ngaghenda na kumghua kwa vibelele va feza ikumi na visanu, na kilo ighana na mirongo misanu ra shairi.

³ Ngamzera, “Suti kukaie mkwapo wa matuku mengi; ndekuwuyaalaka sena, hata kuwuyakaia na mundu mzima; ini nichakaia wokoni mloli kwako.”

⁴ Wandu wa Israeli wichakaia wisewadie mzuri angu m'baa ungi kwa matuku mengi; wiseko na kufunya vizongona, hata nguro ya wueli, hata milimu na fwana na naivera.

⁵ Konyuma, wandu wa Israeli wichawuya na kumlola BWANA Mlungu wawo, na mzuri wawo Daudi; na kutua wichamchea BWANA kwa kuobua, na kuwona wucha ghwake.