HOSEA 2 - Biblia Ilagho Jiboie Kwa Wandu Wose

¹ Kwa huwo kummbange Israeli, “Wandu wa Mlungu” na “Ukundo ni Mlungu.”

Israeli kuleghakaia mloli sa Gomeri

² BWANA waghamba, “Wana wapo, mvoyenyi mayo, mumvoye - kwa kukaia si muka wapo kungi, na ini se mumi wake anduangi - upate kughaluka na kughusigha wumalaya ghwake, na wulaki ghwake gholeghakaia mloli;

³ nisechemrua nguwo na kumsigha duu, na kum'bonya uwoneke sa iji koni orevalwagha; nim'bonye ukaie sa kireti, na kummbika ukaie sa isanga jiomie, upate kubwaghwa ni kau.

⁴ Wokoni sichaawifuya wana wake wughoma, kwa kukaia ni wana wa wumalaya.

⁵ Angu mae wabonyere wumalaya uo muka orewidukieghe kifunyi wabonyere malagho gha waya. Angu oreghambieghe, ‘Nichanughana na wakundwa wapo, awo wichaanineka mkate na machi, nguwo rapo ra sufu na ra kitani, mavuda na chofi.’

⁶ Kwa huwo nichaikabia chia yake isanju ja minjwa, nani nichaagha wurigha ghoditanya, usedime kuwona chia rake sena.

⁷ Uchawinugha wakundwa wake, ela ndechaawipata; niko aho uchaghora, ‘Nichammburia mndwawomi wapo wa imbiri, kwa kukaia nerekoghe nicha kwake kuchumba idana.’

⁸ Nao nderemanyireghe wei ni ini nerekoghe ngimneka viro, na divei, na mavuda nderemanyireghe wei ni ini neremnekagha feza na dhahabu iro wereritumiagha kumtasa Baali.

⁹ Kwa huwo, ngelo ya makuwido nichamuima viro, na ngelo ya zabibu nichamuima divei nichamsoka nguwo ra sufu na kitani, iro rerefinikireghe wuduu ghwake.

¹⁰ Idana nichafunukua wuchafu ghwake imbiri ya wakundwa wake, hata ungi ndechaapatika omvuvua kufuma mikonunyi kwapo.

¹¹ Nichainja kuboilwa kwake kose ndima rake, ndima ra kula mori na Sabato rake, na ndima rose rake riwikilo ra dini.

¹² Nichainja mizabibu na mitini yake, iyo orekoghe ukighamba wei wakundwa wake wedemneka kwa wundu ghowidumikia. Nichaighalua mizabibu na matunda ghake ghiwue kireti.

¹³ Nichamneka adhabu kwa wundu ghobonya matuku gha ndima kwa weke Baali, iji orekoghe ukiwifukiria marumba, na kukupamba moni kwa pete na vipini, na kuwinugha wakundwa wake; ukaniliwa ini.

Lukundo lwa Mlungu kwa wandu wake

¹⁴ “Kwa huwo nichamghenja cha kireti sena, na oho nichadedanya nao kwa lukundo.

¹⁵ Nichammbunjira mbuwa yake ya mizabibu, na kubonya Vololo ya Akori iwuye mnyango ghwa isuwirio. Aho uchanitumbulia sa iji orekoghe wa irika, sa ngelo orefumieghe Misri.

¹⁶ “Niko aho uchaniwanga mumi wake sena ndechaaniwanga Baali wake sena.

¹⁷ Sichaamsigha ughore marina gha Baali sena, na iyo milungu ndeichaaghorwa momunyi kwake sena anduangi.

¹⁸ “Ituku ijo nichabonya ilaghano na nyamandu, nyonyi, na shimandu riavuagha andoenyi, kukaia nderichaabonya wandu wapo ilagho jingi. Wokoni nichainja ndana rose na chufu relwa wuda isangenyi na wandu wapo wichakaia banana.

¹⁹ “Israeli, nichakuwusa kukaie mkapo; nichakaia mhachi na mloli kwako; nichakuwonyera wughoma na lukundo lukatie na kukubonya kukaie wapo kwa kala.

²⁰ Nichamangisha ilaghiro japo na kukubonya kukaie wapo; na oho kuchanirumiria kukaia BWANA.

²¹ Ngelo iyo nichatumbulia malombi gha wandu wapo Israeli; nichabonya vua inye ndoenyi,

²² na ndoe ichava viro, na zabibu, na zeituni kwa wungi.

²³ Nichawimangisha wandu wapo isangenyi, na kuwibonya wiwone mecha. Nichawiwonyera lukundo kwa awo werewangiloghe ‘Wisekundo;’ kwa awo werewangiloghe, ‘Si wandu wapo wangi.’ Nichaghamba, ‘Mo wandu wapo’ nawo wichatumbulia ‘Ko Mlungu odu.’”