HABAKUKI 3 - Biblia Ilagho Jiboie Kwa Wandu Wose

Ilombi ja Habakuki

¹ Iji ni ilombi ja mlodi Habakuki:

² Ee BWANA, nasikire malagho ghako kubonyere, nani naawuyaobua. Idana wuria kuribonya iro kazi matuku ghedu, iro kazi koreribonyereghe matuku gha kala. Ngelo kwakaia na machu, kukumbuke angu koko wa wughoma.

³ Mlungu waawuyacha kufuma Edomu uo Mweli waawuyacha kufuma Mghondi ghwa Parani. Mlungunyi kwafinikirwa ni wubaa ghwake, na ndoenyi kwachulwa ni makaso ghake.

⁴ Waawuyacha na kung'ala-ng'ala kwa luhehia; miengere yaawuyafuma mkonunyi kwake, andu ndighi rake rivisiro.

⁵ Saka izamie yawuyaera imbiri kwake, walaghira kifwa chimnughe nanyuma.

⁶ Ukakaia kimusi ndoe yadasughusika; ukazighana tu, mbari ra wandu radasughisika. Mighondi mibaa ya kokala ikasaghasika, na mighondi mitini ya kokala ikaneng'ena, iyo mighondi oreiselieghe kokala.

⁷ Nawonie wandu wa Kushani wikiobua nandighi, na wandu wa Midiani wikisughusika.

⁸ Wele BWANA, ni meda ikuwusirie machu? Ni bahari ikubonyere kubie? Korejokieghe aighu ya mawingu; iwingu ja kiremba ni igare jako; kukawiredia wandu wako wusimi.

⁹ Oho koreifungieghe ndana yako, kukawikiria mawanu ghako lughenyi; kukaiwaghanya ndoe kwa luhehia lwako.

¹⁰ Iji mighondi erekuwonieghe ikaobua; vua ikanya kufuma mawingunyi; machi mengi ghikaghona ndoenyi nandonyi, na mivo-mivo yaro ikawuka nokoighu.

¹¹ Iruwa na mori vikamanga andu kwaro, kwa kuwona kung'ala-ng'ala kwa mawanu ghako ghakumbwa, na uko kung'ala-ng'ala kwa ifumu jako.

¹² Koreidieghe aghadi ya ndoenyi kwa machu; kukarifasha-fasha iro mbari ra wandu kwa lubio lubaa.

¹³ Oho korefumieghe kuwikire wandu wako, kupate kumkira mzuri uo mshingwa mavuda wako. Oho korem'barieghe chongo uo kilongozi wa wawiwi, kukawitotesha wanughi wake putu.

¹⁴ Kukamlasa kilongozi wa ijeshi jake na iwanu jako, ijo jeredichieghe sa kikulughulu kudisaghisa, jikiboilwa sa wandu wimkorongagha mkiwa kivisonyi.

¹⁵ Koreiwadirieghe bahari na farasi rako, agho machi mengi ghikafunya ifuo.

¹⁶ Nasikire agho malagho, ngasughusika; na memu yapo ikasughusika kwa wowa. Maindi ghapo ghikateweleka, ngawoka kutighina. Nichaweseria mboaeri ituku jivike, ingelo Mlungu uchaawikaba wandu wawuyadikaba.

¹⁷ Hata ngera mtini ghwakaia ghusewadie matunda, na zabibu kusoweka aighu ya mizabibu; hata ngera matunda gha mizeituni ghasoweka na mbuwa kusowa vindo, hata ngera ng'ondi rasia chaghenyi na ng'ombe kusoweka putu boronyi;

¹⁸ nichaboilwa andenyi ya BWANA, nichaboilwa andenyi ya Mlungu Mkiri wapo.

¹⁹ Mlungu, uo BWANA Uwadie-Ndighi uchanineka ndighi, uchabonya maghu ghapo ghikaie ghiangue sa gha shaa wadanibonya nighende aighu mighondinyi banana.