EZRA 3 - Biblia Ilagho Jiboie Kwa Wandu Wose

Wutasi ghwa Mlungu kuzolwa sena

¹ Mori ghwa mfungade Waisraeli werekoghe wameria kukaia mizinyi kwawo. Niko wikakwanyika wose Jerusalemu.

² Jeshua mwana wa Jehosadaki, chiaimweri na wakohani wambao, na Zerubabeli mwana wa Shealtieli chiaimweri na wakwawo, wikawuka na kuiagha madhabahu ya Mlungu wa Israeli ekoria vizongona aighu yaro, seji iandikilo sharienyi ya Musa mundu wa Mlungu.

³ Hata huwo saki wandu werewurieghe kufuma wubarishonyi werewiobueghe wandu werekoghe aho, wereiaghieghe madhabahu andu koni erekoghe; wikawoka sena kukora vizongona va nakesho na va luma lwa kenyi.

⁴ Wikabonya Ndima ya Viwanda sa iji koni iandikilo. Wikafunya vizongona vekora va kula ituku kunughana na seji erekundikieghe kula ituku.

⁵ Konyuma wikakaia wikifunya vizongona vekora vose va kari kose, mafunyo gha ituku ibaa ja Mori Lukombe, na ndima ra matuku seji riwikilo, na mafunyo gha kula mundu umfunyiragha BWANA kwa ngolo.

⁶ Ituku ja imbiri ja mori ghwa mfungade werezoeghe kumfunyira BWANA vizongona vekora, hata ngera msingi ghwa Hekalu ghorekoghe ghuseaghilo.

Kuzoya kuagha Hekalu sena

⁷ Nao wandu wikafunya pesa kwa wundu ghwa mafundi gheagha magho na gheagha mbau; wikawighenjera wandu wa Sidoni na Tiro vindo na vinywaji na mavuda wiwiredie midi ya mierezi kufuma Lebanoni kwa bahari hata Jopa, kunughana na seji wererumiriloghe ni Koreshi mzuri wa Pashia.

⁸ Niko mori ghwa kawi, mwaka ghwa kawi nyuma ya kuwuya Jerusalemu andu Hekalu ya BWANA erekoghe, wikazoya kazi. Zerubabeli, Joshua, na waisanga wose, wakohani, na Walawi, hasa awo werewurieghe Jerusalemu kufuma wubarishonyi, wikangia kazinyi eagha. Walawi wose wa irika ja miaka mirongo iwi na kuchumba werebonyeroghe kukaia wazighaniri wa kazi eagha Hekalu sena.

⁹ Mlawi Jeshua na wadawana wake chiaimweri na wakwawo, na Kadmieli na wadawana wake (Kichuku cha Hodavia) wikawadana kuinyaparia kazi eagha Hekalu sena. (Wikateselwa ni Walawi wa Kichuku cha Henadadi.)

¹⁰ Nao iji waaghi wazoya kuagha msingi ghwa Hekalu, wakohani wikasoghoda imbiri wirwae maamba ghawo wiko na tarumbeta, na Walawi wa Kichuku cha Asafu, wiko na kayamba wipate kumkasa BWANA sa iji koni Daudi mzuri wa Israeli orefundishireghe.

¹¹ Nawo wikabora kwa kudikiana wikikasa na kumfunyira BWANA chawucha huwu: “BWANA ni mucha, angu lukundo lwake kwa Israeli, lwadua matuku ghose.” Na wandu wose wikakema wikimkasa BWANA kwa lwaka lubaa, kwa kukaia msingi ghwa Hekalu ghorekoghe ghwazolwa.

¹² Ela wengi wa wakohani na Walawi na wabaa wa vichuku, na waghosi awo wereiwonieghe Hekalu ya imbiri, werelilieghe kwa lwaka lubaa iji waghuwona msingi ghwa Hekalu ihi ghukiaghwa; ela wazima werekoghe wikikema kwa kuboilwa.

¹³ Kwa wundu ugho wandu ndeweredimieghe kutambua lwaka lwa wandu wikemagha kwa kuboilwa, na lwaka lwa wandu wikemagha kwa kulila; kwa kukaia wandu werekemieghe nandighi, hata wikasikirika kula.