DANIELI 8 - Biblia Ilagho Jiboie Kwa Wandu Wose

Mawono gha Danieli aighu ya bauru na mburi

¹ Mwaka ghwa kadadu ghwa kubonya nguma kwake mzuri Belshazari, ini Danieli nerewonieghe mawono gha kawi.

² Ngawona mawono seji neeka andenyi ya muzi m'baa Susa ghuko andenyi ya isanga ja Elamu, niko kimusi kaavui na Moda ghwa Ulai.

³ Ngawusira meso ghapo ngazighana; ngawona bauru iko kimusi mbai na mbai ya moda. Erekoghe na mbembe iwi, rose riko ndacha; ela lwembe lumweri, ulo locheebuka nanyuma, lorekoghe lulacha kuchumba mmbao.

⁴ Ngawona iyo bauru ikisindika cha magharibi, na kaskazinyi, na kusinyi. Ndekorekoghe na nyamandu ingi eredimagha kusimana nayo; hata ndekorekoghe na nyamandu ingi eredimagha kuvuvua mmbao angu kufufunuka kufuma kwa iro ndighi ra iyo bauru. Bauru iyo erebonyereghe sa iji koni erekundieghe, ikakukasa cheni.

⁵ Hata iji nerekoghe ngiririkanya agho mawono, ngawona fwandi ikicha naiseghe kufuma cha magharibi kuseko na kuadada ndoe, nayo erekoghe na lwembe lumweri luko na ndighi ghadi na ghadi ya meso ghake.

⁶ Ikaichea ija bauru erekoghe na mbembe iwi, iyo nereiwonieghe kiimbiri iko kimusi mbai na mbai ya moda; ikairamia kwa machu mabaa.

⁷ Ngawona ikiitika ija bauru, kwa lubio lubaa na kuchikanya mbembe rake iwi. Ija fwandi ikaisirisha ndighi na kuighusha andonyi. Ikaifasha-fasha na maghu ghake, hata ndekorekoghe na mndungi odima kuvuvua ija bauru kufuma kwa ndighi ra ija fwandi anduangi.

⁸ Ija fwandi ikakuduka loli loli. Ela iji erechurikieghe kukaia nandighi, luja lwembe lwake lubaa lukachika, na wulalo ghwaro rikabuka mbembe inya mbaa rilangayagha mbembe inya ra mlungunyi.

⁹ Kufumanya na lumu lwa chwembe inya, lukabuka lwembe lumu lutini; ndighi yake ikaera cha kusinyi na mashariki, na cha Isanga ja Ilaghiro.

¹⁰ Lwembe ulo lukachurikia ndighi hata kuvikia kulwa na majeshi gha mlungunyi; lukakurudua na kupotua nyerinyeri rimu na kurifasha-fasha.

¹¹ Lukakushabua na kukujosa loni aighu ya m'baa wa agho majeshi; na kughiria usefunyiro vizongona vekora va ituku ituku na Hekalu yake ikachikanywa.

¹² Kwa wundu ghwa kaung'a, ulo lwembe lorenekeloghe agho majeshi, chiaimweri na vizongona vekora va ituku ituku. Loli ya wutasi ikalaghashwa, na ulo lwembe lukabonya sa iji koni lorekundieghe.

¹³ Niko ngasikira malaika umu ukimkotia mmbao, “Agha mawono gha vizongona vekora va ituku ituku, na makosa ghishekeriagha kusowekelwa na uko kuisigha Hekalu, na majeshi kufashwa-fashwa ghidwa ngelo ing'ane wada?”

¹⁴ Nao ukamtumbulia, “Ichadwa matuku elfu imweri ighana jimweri na mirongo misanu vizongona va nakenyi na va nakesho visefunywagha. Konyuma Hekalu ichaeleshwa sena.”

Malaika Gabrieli kutambushira agho mawono

¹⁵ Niendawona agho mawono, ini Danieli nerelolieghe nimanye kutambua kwaro; nani ngawona mndumu wakaia kimusi imbiri kwapo.

¹⁶ Ngasikira lwaka lwa mdamu Modenyi ghwa Ulai lukiwanga, “Gabrieli, mtambushire uo mundu agho mawono.”

¹⁷ Nao Gabrieli ukacha kaavui na andu nerekoghe kimusi; ngaobua na kughwa kiwushu-wushu. Ela uo ukanizera, “Manya ee Mwana wa mdamu, kukaia, agho mawono ni gha ngelo ra kutua.”

¹⁸ Nao iji orekoghe ukidedanya nani, ngawadwa ni dilo nyingi wushu ghwapo ghwadunga andonyi; ela ukaniadada na kuniwusira kimusi.

¹⁹ Ukanizera, “Ola nichakumanyisha iro maza richaakaia kutuonyi, ngelo ya machu gha Mlungu. Agho mawono ni kwa wundu ghwa ngelo ya kutua.

²⁰ “Iyo bauru kuiwonie iko na mbembe iwi, ni wazuri wa Waamedi na wa Pashia.

²¹ Fwandi ni mzuri wa Wagriki, na luja lwembe lumweri luko ghadi na ghadi ya meso ghake ni mzuri wa imbiri.

²² Iro mbembe inya rerebukieghe wulalo ghwa luja lorechikieghe, ni mawuzuri ana ghichaafumirika kwa iyo mbari; ela agho ndeghichaakaia na ndighi ra wuzuri ghwa imbiri.

²³ Kutua kwa kubonya nguma kwawo, iji wabonyi wuwiwi wichaakatisha wuwiwi ghwawo, uchawuka mzuri umu ubirie uichi ndawi.

²⁴ Uchakaia na ndighi nyingi, ela si kwa kudima kwake. Uchanona hata uoboshe wandu, na kula ilagho uchaabonya jichasima. Uchawitotesha wandu wiwadie ndighi, na waeli.

²⁵ Uchatumia mikalo upate kuwona nicha, nao uchakughesha moni kukaia m'baa. Uchawitotesha wengi wisemanyire, wikikaia na sere. Uchatima hata kulwa na M'baa wa wabaa, ela uchasia moni usekabilo ni mdamu ungi.

²⁶ Agho mawono gha vizongona va nakenyi na va nakesho kuwonyero ni gha loli. Ela kuseghighore, angu ni gha ngelo nyingi richagha.”

²⁷ Ini Danieli ngalemwa na kuwuya mkongo kwa matuku mengi. Niko ngawuka na kuzoya kubonya kazi ra mzuri, ela nereshinuloghe ni agho mawono, hata seredimieghe kughitambua anduangi.