DANIELI 7 - Biblia Ilagho Jiboie Kwa Wandu Wose

(DANIELI KUGHORA MAWONO GHAKE) ( 7.1–12.13 ) Mawono gha Danieli gha nyamandu inya

¹ Mwaka ghwa imbiri ghwa kubonya nguma kwake Belshazari mzuri wa Babuloni, Danieli orelodieghe ndodo na kuwona mawono iji orekoghe ulale wulinyi kwake. Niko ukaiandika iyo ndodo na kuwonyera maza raro.

² Danieli ukaghamba, “Nerewonieghe mawono ghapo nakio, ngawona mbeo ikiweta mbembe rose inya aighu ya bahari mbaa.

³ Na nyamandu mbaa inya rikajoka kufuma baharinyi risefwanane.

⁴ Nyamandu ya imbiri erekoghe sa shimba, nayo erekoghe na mawawa gha indu. Hata iji nerezighanireghe, ngawona mawawa ghake ghainjwa, ikawusirwa na kubonywa ikaie kimusi sa mdamu, nayo ikanekwa akili ra kidamu.

⁵ Ngawona nyamandu zima ya kawi ifwanane na kibarabara. Ikawusirwa luwaru lumweri, nayo erekoghe na mbaru idadu momunyi kwake ghadi na ghadi ya maghegho ghake; ikazerwa, ‘Wuka kuje nyama nyingi.’

⁶ Nyuma ya agho, ngazighana na kuwona nyamandu zima ifwanane na inge, iko na mawawa ana gha nyonyi mghongonyi kwake; nayo erekoghe na vongo vina, ikanekwa kubonya nguma.

⁷ “Nyuma ya iro, nerewonieghe kwa mawono nakio, nyamandu ya kana eobosha na ya mashiniko; nayo erekoghe nandighi nyingi, na maghegho mabaa gha chuma; ikabara-bara madiwo ghake na kuja; ikafasha-fasha masighariko kwa maghu ghake. Erekoghe na wuchumbano m'baa na iro nyamandu zima rerekoghe imbiri yake; nayo erekoghe na mbembe ikumi.

⁸ Hata iji nerekoghe ngiririkanya iro mbembe, ngawona lwembe luzima lutinieri lukibuka na kuzoghua, lukakua mbembe idadu ra imbiri na virimba varo. Luja lwembe, lorekoghe na meso sa gha mdamu, na momu ghudedagha malagho mabaa.”

Mawono aighu ya uja mundu uduagha kwa kala

⁹ “Nao iji nerekoghe ngizighana, vifumbi va nguma vikawikwa; na uo mundu wa matuku mengi ukaseria chake. Nguwo rake rerekoghe ra chokwa sa theluji, na iridia jake jerekoghe sa sufu ieleshero. Kifumbi chake cha nguma cherekoghe chumu ra modo, na magurudumu gha icho kifumbi gherekoghe modo ghuakagha.

¹⁰ Kamoda ka modo kerefumieghe, na kuida imbiri kwake. Maelfu gha wandu werekoghe wikimdumikia, na mamilioni gha wandu, werekaighe kimusi imbiri kwake. Koti etanya ikawikwa, na vuo wikakuchulwa.

¹¹ “Niko ngazighana kwa wundu ghwa malagho mabaa gherededwagha ni ulo lwembe. Hata iji nerekoghe ngizighanira, iyo nyamandu ikabwaghwa, na mumbi ghwake ghukanonwa; ghukafunywa ghukoro na modo.

¹² Rija nyamandu risigharikie, reresokeloghe nguma rawo; ela reresighiloghe rikaie moyo kwa ngelo imu.

¹³ Na kwa agho mawono gha nakio, nerewonieghe umu ufwanane na mwana wa mdamu ukicha andenyi ya mawingu gha mlungunyi; ukamchea Uo wa Matuku Mengi, ukakaia kimusi imbiri kwake.

¹⁴ Ukanekwa kubonya nguma, na wubaa, na wuzuri; eri wandu wa mbari rose, na kichuku na viteto, wipate kumdumikia. Kubonya nguma kwake ni kwa kala na kala, na wuzuri ghwake ndeghuchaanoneka anduangi.

Kutambushirwa kwa agho mawono

¹⁵ “Na ini Danieli, nerekoghe ngija wasi na kusumbulwa ni agho mawono andenyi kwapo.

¹⁶ Ngamsoghodera mndumu wa awo werekaieghe aho, ngamkotia wuloli ghwa agho mawono ghose. Niko ukanighoria na kunimanyisha kutambua kwaro maza iro rose.

¹⁷ ‘Iri nyamandu mbaa inya ni wazuri bana wichaawuka ndoenyi.

¹⁸ Ela waeli wa Uo-Uko-Aighu-Nandighi wichapata ugho wuzuri, na kukaia nagho kwa kala na kala.’

¹⁹ “Niko ngakunda kumanya kuchumba malagho gha ija nyamandu ya kana, iyo iserefwananeghe na rija nyamandu zima, ibirie nandighi; iko na maghegho ghake gha chuma, na chwakule rake ra shaba; erebarieghe madiwo ghake na kuja kula kilambo, na kufasha-fasha masighariko gharo kwa maghu ghake.

²⁰ Wokoni ngakunda kumanya malagho gha iro mbembe ikumi rerekoghe chongonyi kwake, na ulo lwembe lorebukieghe lukarikua iro mbembe idadu; lwembe luja loni lorekoghe na meso, na momu ghudedagha malagho mabaa luwonekagha luko na kudima kuchumba wambao.

²¹ “Nao iji nerekoghe ngizighana, ulo lwembe lukabonya wuda na waeli lukawisima;

²² Uo wa matuku mengi ukacha na kutangaza kutanya aighu ya waeli wa Uo-Uko-Aighu-Nandighi. Ngelo ikavika, na waeli wikaghuwusa ugho wuzuri.

²³ “Niko ukanimanyisha: ‘Ija nyamandu ya kana ni wuzuri ghuchaawoneka ndoenyi; nagho ghuchakaia na wuchumbano na mawuzuri mazima. Wuzuri ugho ghuchasima ndoenyi kose; ghuchaichikanya na kuifasha fasha.

²⁴ Iro mbembe ikumi, ni wazuri ikumi wichaafuma kwa ugho wuzuri, na mzuri umu uchawuka nyuma yawo uchaakaia na wuchumbano na waja ikumi; nao uchawisima wazuri wadadu.

²⁵ Uchadeda malagho ghelwa na Uo-Uko-Aighu-Nandighi, na kuwikoronga waeli wake, nao uchatima kughalua sharia rawo ra dini na ndima; nawo wichangirwa mikonunyi kwake kwa miaka idadu na nusu.

²⁶ Koti ya mlungunyi ichasea kidombo, na wuzuri ghwa uo mzuri ghuchainjwa, ghupate kumerelwa na kunonwa ghose.

²⁷ Niko wuzuri, na nguma rose na wubaa ghose ghwa agho mawuzuri gha ndoenyi ghichaanekwa waeli, awo wandu wa Uo Uko Aighu Na Ndighi, na wuzuri ghwawo ghuchakaia ghwa kala na kala. Wabonyi nguma wose wa ndoenyi wichawidumikia na kuwisikira.’

²⁸ Uku niko kutua kwa maza iro; na ini Danieli, ngaja wasi andenyi ya maririkanyo ghapo loli loli, hata fwana yapo ikaghaluka; ela ngawika iro maza ngolonyi kwapo.”