AYUBU 6 - Biblia Ilagho Jiboie Kwa Wandu Wose

¹ Niko Ayubu ukatumbulia:

² “Na wei luwawo lwapo lwadapimwa, na wasi ghwapo ghose ghuwikirilo ratilinyi,

³ ghwalemiagha ghuchumbe msangagha ghwa baharinyi; kwa huwo kusakeshinulwa ni madedo ghapo gha kisha-kisha.

⁴ Uo-Uwadie-Ndighi-Rose wanilasire na mawanu ghake, na wusungu ghwaro ghwaawuyasela mumbinyi kwapo; kiture cha Mlungu chanimarie chia rose.

⁵ Kwani furo yakemagha iko na nyasi, angu ng'ombe yadokagha iko vindonyi vake?

⁶ Vindo visene luwala vajikagha visedungilo munyu? Angu, logha lwa ighi lwa chokwa loko na luwala lungi?

⁷ Sina bea eja hata kuviadada koni, ngavija vadaniwunja mkongo.

⁸ “Ima loli Mlungu ndaninekagha icho nikunde, ukanitumbulia malombi ghapo ngapata icho nikunde;

⁹ kumangu yam'boia Mlungu kunifasha-fasha, na kughorua kwa mkonu ghwake unibwaghe.

¹⁰ Ugho ghwakaiagha wuhoreshi ghwapo, hata nadaboilwanya na luwawo lubaa, angu sileghie malagho gha uo Mweli.

¹¹ Neko na ndighi-ki renikaisha moyo? Kwaki nikaiagha moyo nani sine isuwirio?

¹² Kwani neeka na ndighi sa ra igho? Mumbi ghwapo ghooka shaba?

¹³ Kwa loli siwadie ndighi ringi rekukira nimoni, sina andu kungi kopata wutesia.

¹⁴ “Mundu usemmboniagha mghenyi wake wughoma, oosigha kuja kuobua kwa Uo-Uwadie-Ndighi-Rose.

¹⁵ Ela inyo waghenyi wapo mwaawuyanikalia, sa meda iomagha ngelo vua iseko. Na sa kusalama kwa machi gheida,

¹⁶ meda yachulwa ni machi gha theluji na barafu isaghagha ngelo ya kwari, kwa wundu ghwa mvurugho ghwaro.

¹⁷ Ela ngelo ya mruke machi ghadasoweka na meda yaro yadasighwa miduu na kuoma.

¹⁸ Wadambi walaghalwa ni chia wikilola machi; wadamara-mara na kufuya kireti.

¹⁹ Wadambi wa Tema walola machi, wacharo wa Sheba waghisuwiria.

²⁰ Werekoghe wikighisuwiria, ela wiendavika aho wikafwa ngolo.

²¹ Nenyo mooka sa iyo meda kwapo; mwawona wasi ghwapo, nenyo mwaobua.

²² Nisinda namlomba inosi jingi, angu mhonge mndumu kwa wundu ghwapo?

²³ Angu munikire na m'maiza, na kunikombua kufuma kwa mkorongi?

²⁴ “Nifundishenyi nani nichasikiria; niwonyerenyi andu nikosere.

²⁵ Malagho gha wuloli ghitesia, ela malagho ghenyu ghitesia kii?

²⁶ Muaghesha mwadima kughorua malagho gha mundu ufue ngolo, sena mkighitala sa mbeo?

²⁷ Inyo mwadima hata kukaba kura kuwipata wana wakiwa wiwuye wazumba wenyu, na kumuuza hata mghenyi onyu.

²⁸ Ela idana nizighanenyi kwa kuboilwa; sidimagha kumkalia anduangi.

²⁹ Kadunyi; msenisowie hachi. Msenitanye; ini neko na hachi.

³⁰ Naghora kiwiwi chingi ngera? Muaghesha sidimagha kutambua nicha na kiwiwi?