AYUBU 4 - Biblia Ilagho Jiboie Kwa Wandu Wose

¹ Niko Elifazi Mtemani ukatumbulia:

² “Mndungi ukakunda kughora nakumoni-lee, kukuwa ngera? Elaima nani udimagha kunyama kima?

³ Kumanye oho kwafundishire wandu wengi, na wanyonge kukawitesia.

⁴ Malagho ghako ghamteserie uo orekuwieghe, kukawimangisha awo werekoghe wanyonge.

⁵ Ela idana kwachelwa ni malagho, na oho kwalemwa ni kurumaghia; ghakupata, na oho kwafwa ngolo.

⁶ Welee, uko kuobua kwa Mlungu kwako, si wuwana ghwako? Na uko kukatia kwa chia rako si isuwirio jako?

⁷ “Ririkanya idana kuwone; nani jingi utotere usewadie ikosa? Angu ni hao kuwonie mloli utoteshero?

⁸ Ini seji niwonie, awandu wilimagha wuwiwi, na kuwa wasi, wadakuwida agho gheni.

⁹ Wadatoteshwa ni miruke ya Mlungu, na kumerelwa ni mrurumo ghwa machu ghake.

¹⁰ Wawiwi waruma na kudoka sa shimba, ela Mlungu wawinyamira na kuchikanya maghegho ghawo, na maghegho gha shimba ngoo ghachika.

¹¹ Wawiwi wafwa sa shimba risewadie kindo chebwagha na kuja, na wana wawo wasaghisika.

¹² “Nereredeloghe ilagho kwa kiviso, ngahohorelwa kudunyi.

¹³ Aghadi ya ndodo ra nakio, ingelo wandu wawadwa ni dilo nyingi,

¹⁴ wowa na kusughusika ghorenipatireghe, ghukabonya mumbi ghwapo ghose ghusughusike.

¹⁵ Mbeo ereidieghe kima wushunyi kwapo, na mafuri gha mumbi ghwapo ghikawuka.

¹⁶ Kilambo chimu chikakaia kimusi kima, ela seredimieghe kumanya fwana yaro. Fwana imu ikakaia imbiri kwapo, kukakaia kima, niko ngasikira lwaka:

¹⁷ ‘Mdamu uidagha, wadima kukaia mhachi imbiri ya Mlungu? Mdamu wadima kukaia uelie imbiri ya Muumbi wake?

¹⁸ Mlungu ndewirumiriagha wadumiki wake wa mlungunyi; hata malaika wake wawiwonagha makosa.

¹⁹ Welee, wadima kuwirumiria wandu wiumbilo kwa ndoe; kilambo cha ndoe chidimagha kufashwa sa kifurute?

²⁰ Wadamu wadima kukaia moyo luma lwa nakesho, na kenyi wifo wisemanyikie.

²¹ Iji kamba ya irangi yadumbulwa mimbinyi kwawo, ndawadaafwa wisewadie hikima?’