AYUBU 36 - Biblia Ilagho Jiboie Kwa Wandu Wose

¹ Elihu ukachuria kughora ukighamba:

² “Nirumaghie kutini nikuwonyere; naduagha na malagho ghamu gheghora wulalo ghwa Mlungu.

³ Naichi malagho malazi, nani nichawonyera seji Muumbi wapo uko na hachi.

⁴ Manya loli malagho ghapo si gha tee anduangi; kookanya na mundu uichi malagho ghose.

⁵ “Mlungu ni wa kudima, ela ndemmenyagha mndungi; waichi malagho ghose.

⁶ Ndewisighagha wawiwi wikaie moyo, ela wadawineka awo wikorongwaghwa hachi rawo.

⁷ Ndelekagha kuwizighana wahachi, ela wawiwika wibonye nguma sa wazuri, na kunekwa ishima matuku ghose.

⁸ Ela iji wandu wafungwa na pingu, na kutirirwa kwa wundu ghwa maza wibonyere,

⁹ Mlungu wadawiwonyera kaung'a rawo, na kukujosa kwawo.

¹⁰ Wadawibonya wisikire mawonyero ghake, na kuwilaghira wihee mawiwi ghawo.

¹¹ Wikasikira na kumdumikia, wichatumia matuku ghawo ghisigharikie kwa nicha na kuboilwa.

¹² Ela wikalegha kusikira, wichatota wudenyi, nawo wichafwa wisemanyire kindo chingi.

¹³ “Wandu wisemuichi Mlungu, wadakaia na machu, hata ukeduawineka ikabo, ndewilombagha wutesia.

¹⁴ Wadafwa wiko wandu wa irika, na irangi jawo jadasiria aghadi ya malaya gha womi.

¹⁵ Mlungu wadafundisha wandu kwa kutumia wasi ghwawo, na kuwibonya wisikire kwa kutumia matiriro ghawo.

¹⁶ Na oho wori orekufunyireghe wasinyi, ukakuwika andu kwa wulindiri; ukakuwikia vindo vinorie mezenyi kwako.

¹⁷ “Ela idana kwaawuyatanywa kwa hachi sa wawiwi, kwamazirwa ni kutanywa na loli.

¹⁸ Lindia mndungi usekughushe kwa mali nyingi; kusesighe matuwo ghikulaghashe chia.

¹⁹ Welee, kililo chako chadima kukufunya wasinyi? Kwadima kufunywa aho ni wungi ghwa ndighi rako?

²⁰ Kusakekunda kio chiche, ngelo wandu wichaatoteshwa.

²¹ Kukulindie na wuwiwi; makorongo gheeredwa kwako ghikuwike kula na wuwiwi.

²² Mlungu wawadie ndighi nyingi; uo ni mwalimu uchumbie wose.

²³ Nani udimagha kumghoria Mlungu jebonya, angu nani udimagha kumshitakia kukaia mkosi?

²⁴ “Kumbuka kurikuma kazi ra Mlungu, seji wandu wamu wimkasire chumbonyi rawo.

²⁵ Wadamu wose wawonie seji Mlungu ubonyere, ela ndekuwadie mndungi utambukilwagha ni ghose.

²⁶ Ndedimanyagha seji Mlungu uko m'baa; miaka yake ndeitalikagha.

²⁷ Mlungu nuo uwusagha machi kufuma ndoenyi, na kughighalusa ghiwuye vua.

²⁸ Wanyesha vua kufuma mawingunyi, na kuwineka wadamu kwa wungi.

²⁹ Nani uichi seji Mlungu usasaragha mawingu, na seji lukuwa lukabagha kufuma kwake?

³⁰ Wona seji Mlungu ung'alishagha luhehia iichia na iichia, na kufinikira andu kumilie kwa bahari.

³¹ Huwu niko uwijishagha wandu; wadawineka vindo kwa wungi.

³² Wada-wada lukuwa na vala vake; na kululaghira ludunge andu ukunde.

³³ Lukuwa lwadawonyera kucha kwa kiremba, na mfugho ramanyagha kiremba chaawuyacha.