AYUBU 34 - Biblia Ilagho Jiboie Kwa Wandu Wose

¹ Niko Elihu ukaghamba:

² “Sikirenyi malagho ghapo inyo wandu wa hikima; nisikirienyi inyo wandu muichi malagho.

³ Kudu kwasikiragha malagho kughitambuo, sa iji koni lumi lutoagha vindo.

⁴ Ndedisaghuo ijo ja hachi, ndedidumbuo diwose ijo jiko icha.

⁵ Ayubu waghamba wei ndekosere, na kedi Mlungu oomsoka hachi rake.

⁶ Waghamba, ‘Ngeduaka na hachi, naawuyatalwa kukaia mtee; nashoghonolwa nandighi nisechaaboa, ela siwadie kaung'a.’

⁷ Nani uko sa Ayubu, mundu usemtalagha Mlungu!

⁸ Mundu ukaiagha ngara na wabonyi kiwiwi, na kughendanya na wandu wawiwi;

⁹ ughambagha ‘Ndeiko fwaida ingi enugha lukundo lwa Mlungu.’

¹⁰ “Kwa huwo nisikirienyi inyo wandu mtambukilwagha. Ndeidimikagha putu Mlungu kubonya mawiwi; Uo-Uwadie-Ndighi-Rose ndedimagha kubonya makosa.

¹¹ Mlungu wadamlipa mundu kunughana na mabonyo ghake; wadam'bonyera kunughana na mighendo yake.

¹² Kwa loli Mlungu ndedimagha kubonya kiwiwi; Uo-Uwadie-Ndighi-Rose ndedimagha kuilaghasha hachi anduangi.

¹³ Nani oremmbikieghe Mlungu ukaie m'baa ndoenyi? Nani umnekie kuzighana wurumwengunyi ghose?

¹⁴ Mlungu ukawusa roho yake, ukainja miruke yake ya irangi,

¹⁵ wandu wose wichafwa na kuwuya terinyi.

¹⁶ “Ikakaia kuko na hikima, sikiria seji nikughoriagha.

¹⁷ Mundu usekunde hachi wadima kubonya nguma? Kwadima kumtanya Mlungu wa hachi uwadie kudima?

¹⁸ Mlungu nuo umzeragha mzuri, ‘Ndekufwanagha’, na mundu wa ishima, ‘Ko mundu mmbiwi.’

¹⁹ Uo ndedawiriagha wabaa, hata kumtala mzuri wa mali kuchumba mkiwa; angu nuo moni uwiumbie wose.

²⁰ Mundu wadima kufwa shwa wori nakio; Mlungu wadawikaba wandu nawo watota. Wadabwagha wandu wiwadie kudima kuseko kutumia ndighi.

²¹ “Mlungu wadazighana mighendo ya mdamu, na kuwona milambo yake yose.

²² Ndekuko andu kungi kukambie kuko na kira kibaa, wandu wawiwi widimagha kukuvisa.

²³ Mlungu ndena haja emlawua mdamu kuchumba, wei uche imbiri kwake utanyo.

²⁴ Wadawiinja awo wiwadie kudima kuseko na kuzighana maza rawo, na kuwika wazima wulalo ghwawo.

²⁵ Kwa kukaia waichi mabonyo ghawo, wadawiinja na kuwisaghisa nakio.

²⁶ Wadawikaba kwa wundu ghwa wuwiwi ghwawo imbiri ya wandu,

²⁷ kwa kukaia waghalukie nambai wikalegha kumnugha hata ndewiritalie chia rake rose.

²⁸ Washekerie wakiwa wikamlilia Mlungu, nao ukasikira kililo chawo.

²⁹ Mlungu ukakaia kima-lee nani udimagha kumtanya? Ukalangaya noko nani udimagha kumzighana? Ela sena wadawibonyera nguma wandu na mbari ra wandu,

³⁰ eri umghirie mundu usemwichi kubonya nguma, uchewideghia wandu shaghala.

³¹ “Keni Ayubu, jingi kwarumirie kaung'a rako imbiri ya Mlungu, kukamzera ndekuwuyaabonya sena?

³² Kwamlombie Mlungu ukuwonyere makosa ghako, kukarumiria kughisigha?

³³ E kuleghie kubonya seji Mlungu ukunde-lee, kudima wada kusuwiria uo ubonye seji kukunde? Agho kuadumbua kumoni, ini mbai. Nighorie agho kughiichi.

³⁴ Mundu uo ose uko na akili ucharumiria; mundu uo ose uko na hikima unisikiriagha uchaghamba

³⁵ kukaia, ‘Ayubu waawuyadeda usemanyagha; waawuyadeda icho kisha.’

³⁶ Zighana malagho gha Ayubu loli-loli; kuchawona kukaia waawuyadeda sa mundu mmbiwi.

³⁷ Wachuria kumlegha Mlungu aighu ya kaung'a yake; wamsholia Mlungu imbiri kodu isi diwose.”