AYUBU 32 - Biblia Ilagho Jiboie Kwa Wandu Wose

Madedo gha Elihu

¹ Nao awo wandu wadadu wikaleka kumtumbulia Ayubu, angu orekuwonieghe moni kukaia mhachi.

² Niko Elihu mwana wa Barakeli, M'buzi wa nyumba ya Raama, ukajokwa ni machu. Oremmbonyereghe Ayubu machu, angu orekunekieghe moni hachi kuchumba Mlungu.

³ Wokoni ukawibonyera machu waghenyi wadadu wa Ayubu, angu werelemeloghe ni kumtumbulia Ayubu hata ngera werembonieghe kukaia mkosi.

⁴ Elihu orekoghe ukiweseria kima, angu wambao werekoghe wabaa kumchumba.

⁵ Nao iji wawona awo wandu wadadu wasowa ilagho jingi jechuria kughora, ukajokwa ni machu.

Elihu

⁶ Niko Elihu mwana wa Barakeli, M'buzi ukatumbulia: “Ini ne mwana konyu nenyo mo waghosi, kwa huwo nedeobua kumghoria maghesho ghapo.

⁷ Ngaghamba inyo mdede; waghosi mfundishe hikima.

⁸ Ela Roho unekwagha wandu ni Uo-Uwadie-Ndighi-Rose, nuo uwinekagha wadamu hikima.

⁹ Si kukaia wa kala kuredagha hikima, hata si kughosia kuredagha kutambukilwa ni ijo jiko icha anduangi.

¹⁰ Kwa huwo nisikirienyi, na ini nifunye maghesho ghapo.

¹¹ “Nedeeka ngisikiria ingelo mwadedagha, ngaweseria ingelo mkoghe mkilola malagho gheghora.

¹² Nerekoghe ngimsikiria nicha, ela ngasowa mndungi onyu odima kumtumbulia Ayubu na kummbonyera makosa ghake.

¹³ Mseghambe wei mwawadie hikima. Mlungu nuo udimagha kummbonyera Ayubu ikosa jake; inyo moolemwa.

¹⁴ Ayubu oodedanya na inyo, si ini kungi; ela ini seredimagha kumtumbulia sa inyo.

¹⁵ “Waghenyi wako wadadu waalemwa ni malagho nga Ayubu; ndewiwadie jekutumbulia.

¹⁶ Da niaweseria angu wanyama? Weeka kimusi wisena jekutumbulia.

¹⁷ Nani wori nichatumbulia, na kufunya maghesho ghapo.

¹⁸ Neko na malagho mengi; sidimagha kukuwadia niseghore.

¹⁹ Ngaghirilwa nisedede, nichafunya malagho sa viriba vidungirilo divei mbishi vabarika.

²⁰ Suti nidede nipate kuhoa, suti nitumbulie.

²¹ Ini sidawiriagha mndungi, hata kudeda kwa wuya.

²² Ini siichi kudeda kwa kudawiria wandu; ngabonya huwo, Muumbi wapo uchaniinja shwa wori.