AYUBU 30 - Biblia Ilagho Jiboie Kwa Wandu Wose

¹ “Wandu wiko wana kwapo, waawuyanisarighia. Weke ndee ndewerefwaneghe hata kuwiwikanya na koshi relindia ng'ondi rapo.

² Ni kaziki weredimagha kunibonyera, wandu wisirilo ni ndighi putu?

³ Werekoghe wakiwa wiko njala nandighi, wikadafuna miri iomie nakio, andenyi ya isanga jiomie jisene kindo chingi.

⁴ Wikakua midi ya kireti na kuija; hata miri ya mretemu isesingie.

⁵ Werewingiloghe kufuma wandunyi wikikemelwa sa vitoi.

⁶ Ikakaia suti wikaie mavongonyi, mbangenyi na mirumenyi.

⁷ Wikakema aisakenyi sa nyamandu, na kukaia kitundura a midinyi na kosi.

⁸ Awo ni wandu wa kisha wisefwanagha; wandu wiwingilo isangenyi.

⁹ “Idana wana waawuyaniseka; neewuya kilambo chesekwa kwawo.

¹⁰ Wadazamilwa ni ini na kukuwika kula nani; wikaniwona wiachwa mada.

¹¹ Kwa kukaia Mlungu waniwunjire mnyonge na kunisera, wanighalukia kwa machu mabaa.

¹² Wandu wa kisha wawuka chia ya mkonu ghwapo ghwa kiwomi kulwa nani; wanideghia shaghala enighusha, wikikunda kunitotesha.

¹³ Wanifungia chia yapo; wachuria wasi ghwapo, wisetangalwagha ni mndungi.

¹⁴ Wangia na mruma ghwa wurigha ghwapo; wapotoka wikining'aria.

¹⁵ Nachulwa ni kiture; ishima japo jainjwa seji jaadukwa ni mbeo; mecha ghapo ghaniinjikia sa iwingu.

¹⁶ “Na idana neko kaavui na kufwa; matiriro ghapo ndeghiwuesia.

¹⁷ Maindi ghapo ghose ghaawuyanija nakio; kujighwa kwaro ndekuwuehoa.

¹⁸ Mlungu waniwada kwa ndighi na kunimaziria kwa nguwo rapo, waninyora kwa kutumia singo ya ikoti japo.

¹⁹ Mlungu wanikumba mazozonyi; nawuya sa teri na maivu.

²⁰ Nakulilia ee Mlungu, ela ndekuwuenitumbulia. Ngeduakulomba ndekutalagha.

²¹ Oho kwawuya mng'eti kwapo, kwaawuyanikoronga kwa ndighi rako rose.

²² Kwaniduka na mbeo nokoighu; na kunimarisha andenyi ya kiremba chirurumagha.

²³ Namanya angu kuchaningira kifonyi, andu kuwikilo kwa wandu wose wiko moyo.

²⁴ “Kwaki kumkabagha mundu unonekie putu, mundu usedimagha kukutesia moni ela kulomba wughoma?

²⁵ Welee, serelilieghe chiaimweri na wandu werekoghe na wasi? Serekujishireghe wasi kwa wundu ghwa wakiwa?

²⁶ Ela iji neresuwirieghe mecha, neechapatwa ni mawiwi; na iji neresuwirieghe mwengere neechawona kira.

²⁷ Naja wasi ngolonyi, sina kuhora; neechelwa ni wasi ghusesiagha.

²⁸ Nawurie wa chilu, ela sikabilo ni iruwa; nakaia kimusi ikwanyikonyi ngilomba wutesia.

²⁹ Nialila niekeri kwa wasi, kililo chapo cheeka sa cha mzozo na nyagha.

³⁰ Mrongo ghwapo ghwawurie ghwa chilu, ghwaawuyakonoka; mumbi ghwapo ghwaawuyanibuka modo.

³¹ Zeze yapo eewuya elila ifwa, na msherembe ghwapo ghwaawuyatumilwa ni awo wililagha.