AYUBU 3 - Biblia Ilagho Jiboie Kwa Wandu Wose

Ayubu kuewia ituku ja kuvalwa kwake

¹ Nyuma ya agho, Ayubu ukazoya kudeda na kujiewia ijo ituku ja kuvalwa kwake.

² Ukaghamba:

³ “Ituku ja kuvalwa kwapo na icho kio nereamiloghe nichevalwa mwana wa womi ndeviwasiro njowe.

⁴ Ituku ijo ndejikaie kira! Na Mlungu uko aighu usakejitala; hata jisakebukilwa ni mwengere ghungi.

⁵ Ndejiserelo ni kiju na kira cha ndindima. Ndejifinikiro ni mawingu, na kuserelwa ni kira cheobosha nadime.

⁶ Icho kio, ndechiserelo ni kira cheobosha nadime. Chisaketalwa andenyi ya matuku gha mwaka hata chisaketalika andenyi ya matuku gha mori.

⁷ Ee, icho kio chikaie kolowi, hata lwaka lungi lwa maboilo lusesikirike andenyi yaro anduangi.

⁸ Awo wandu wiewiagha dime, wiko na wuya ghommbusira Leviathani ndewijiewie.

⁹ Nyerinyeri ra ndoe kuela kwa icho kio nderiwuye kira; ndechisuwirie mwengere, ela chiseghuwone; hata chisewone mwengere ghungi ghwa nakesho;

¹⁰ kwa kukaia ndecheremghirieghe mao usenive, eri nisechewona ughu wasi.

¹¹ “Kwaki niserefwagha ngivalwa; nifume kifunyi na kusoweka?

¹² Kwaki mao oreniwadiagha ndambinyi kwake? Angu kwaki oreniongoshagha?

¹³ Ngera nedeefwa iyo ngelo, nadakaia nilale kima, kumangu idana naawuyahora ngilala.

¹⁴ Sa wazuri, na wanjama wa ndoenyi awo wereaghieghe ngome rawo, nawo waawuyalala winonekie.

¹⁵ Ngilala sa wabaa awo wererichurieghe nyumba rawo kwa dhahabu na feza.

¹⁶ Angu kwaki niserekaiagha sa mwana ufushiro, sa wana wisechaawona mwengere jingi, ngarikwa andoenyi?

¹⁷ Wawiwi ndewiwuyaasumbua mndungi kaburinyi, na awo wisirilo wadahora.

¹⁸ Wafungwa wadakaia na sere chiaimweri kaburinyi, hata ndewisikiragha lwaka lwa mnyapara.

¹⁹ Wandu watini na wabaa weko aho, na mzumba oko huru kufuma kwa bwana wake.

²⁰ “Kwaki mundu uko na wasi uchurilwagha matuku? Kwaki uo uwawagha ngolonyi kuwikwa moyo?

²¹ Wakunde kifwa ela ndechichagha, waboilwa ni kaburi kuchumba mali ivisiro;

²² waboilwa na kukaia na iseko ibaa, iji wangia kaburinyi.

²³ Kwaki mundu usemanyagha kutua kwake uwikwagha moyo, na Mlungu wamerie kummaria na wasi chia rose?

²⁴ Wulalo ghoja vindo naawuyalila, na kuruma kwapo kwasikirika sa machi ghidikagha.

²⁵ Icho chiniwasiragha wowa chamerie kunichea, na icho nichiobuagha chamerie kunipata.

²⁶ Siwadie sere, hata kuhoa kungi; siwadie kuhora, ela wasi ghwanichea.”