AYUBU 27 - Biblia Ilagho Jiboie Kwa Wandu Wose

¹ Niko Ayubu ukawada kudeda sena ukaghamba,

² “Naghema kwa Mlungu uko moyo uo uniimie hachi rapo, na kwa Uo-Uwadie-Ndighi-Rose uo ujibonyere irangi japo jikaie ja wasi,

³ kukaia, ngelo rose nichaakaia moyo, Mlungu ukanineka miruke esoda,

⁴ sichaadeda wuwiwi ghungi, hata kughora tee anduangi.

⁵ Na jingi sirumiriagha wei inyo moko na hachi; ini sichaasigha kukaia mloli hata kufwa.

⁶ Nichaimaziria hachi yapo, hata sichaaisigha; ngolo yapo ndeiwuenitanya kwa ilagho jingi.

⁷ “M'maiza wapo ndekaie sa mundu mmbiwi, na uo usimanagha nani ndekaie sa mundu usena hachi.

⁸ Mundu usemwichi Mlungu usuwiria kii ukainjwa ni Mlungu? Mlungu ukainja irangi jake-lee usuwiria kii?

⁹ Welee, Mlungu wadima kusikira kililo chake, ingelo wapatwa ni wasi?

¹⁰ Welee, uchaboilwa ni Uo-Uwadie-Ndighi-Rose? Uchakaia ukimlomba Mlungu ngelo rose?

¹¹ Nichamfundisha malagho gha ndighi ra Mlungu; sichaamvisa maza ra Uo-Uwadie-Ndighi-Rose anduangi.

¹² Nechi mwamerie kuriwona maza iri mmbose; kwaki sena mduagha mkideda malagho gha duu?

¹³ “Iji nijo ikabo ja mmbiwi jifumagha kwa Mlungu; ni ifundisho ja wakorongi wipatagha kufuma kwa Uo-Uwadie-Ndighi-Rose.

¹⁴ Wana wake wikachurikia, wichabwaghwa wudenyi; kivalwa chake ndechichaakaia na vindo vikate.

¹⁵ Awa wichaasigharika moyo wichabwaghwa ni wukongo, na waka wawo wakiwa ndewichaawililia.

¹⁶ Mmbiwi ukeduatumbanya kitungu cha feza sa teri, na kuwika nguwo nyingi ndoe,

¹⁷ mhachi nuo uchaarwa iro nguwo; mundu usewadie ikosa uchawagha iyo feza.

¹⁸ Nyumba uiaghagha ichakaia sa mdambo-dambo ghwa mbughi-mbughi; ichakaia sa kiwanda chelindia.

¹⁹ Uchalala uko mzuri wa mali, ela ndewuyaabonya huwo sena; angu iji wawuka, uchakua mali rake riseko.

²⁰ Uchawadwa ni wowa seji uamilwa ni machi mengi; nakio uchadukwa noko ni kiremba.

²¹ Uchadukwa noko ni mbeo enona ya mashariki, na kumuinja andu kwake.

²² Yamkumba noko kuseko na wughoma; wakimbia kiimbiri kukukira moni.

²³ Mbeo yamrumia ukikimbia; yammbinga noko ikimrumia.