AYUBU 24 - Biblia Ilagho Jiboie Kwa Wandu Wose

¹ “Kwaki Uo-Uwadie-Ndighi-Rose usewikagha ngelo etanya? Kwaki usewikagha ituku jewonyera hachi kwa awo wimdumikiagha?

² Wandu waawuyasoghora mano, waawuyaiwa ng'ondi na kurilisha.

³ Wadawusa weke punda wa wana wakiwa, na kuwighenja noko. Wadawusa wufunga ghwa ng'ombe ra waka wakiwa.

⁴ Wadawitangala wakiwa wisepate hachi rawo, na kuwibonya waisanga wisowagha wikimbie na kukuvisa.

⁵ Wakiwa waghenda wikibonya kazi rikurie cha kireti sa furo; walola vindo kwa wundu ghwa wana wawo.

⁶ Washoa masese gha viro mbuwenyi, na masighariko gha zabibu mbuwenyi ra wawiwi.

⁷ Walala duu chee wisene nguwo; ndewiwadie kindo chingi chekufinikira wisesuko.

⁸ Wanyelwa ni vua ya mighondinyi wikawada; walola andu koaghama a maghonyi.

⁹ (Mwana mkiwa wainjwa nyodonyi kwa ndighi; mwana mkoo wa mkiwa wawadwa kwa wundu gholipia sile.)

¹⁰ Wakiwa waghenda duu wisewadie nguwo, waduka mario gha ngano wiko njala.

¹¹ Wakama zeituni wifunye mavuda, na zabibu wifunye divei, ela awo weni weeka kau.

¹² Wandu waawuyaruma wikifwa mzinyi, na awo wishoghonolo, waawuyakema witeselo; ela Mlungu ndewuesikira malombi ghawo.

¹³ “Weko wandu wileghagha mwengere; ndeghuwieliagha, hata ndewikunde kughenda nagho.

¹⁴ M'bwaghi wadawuka ndoe iko kira, upate kum'bwagha mkiwa na uo usowagha; nakio wadaiwa sa kitoi.

¹⁵ Mlaki wadawesera lumisimisi na kuvisa wushu ghwake usewono ni mndungi.

¹⁶ Vitoi vadabara nyumba nakio; nadime wadaghukimbia mwengere na kukuvisa nyumbenyi.

¹⁷ Kira kibaa kwawo wose ni sa dime; ndewichiobuagha icho kira kibaa.

¹⁸ “Inyo mwadaghamba, ‘Mmbiwi wadadukwa ni machi naiseghe; ndoe yake eewasirwa njowe, hata ndedimagha kwendabonya kazi mizabibunyi.

¹⁹ Sa iji koni theluji isaghishwagha ni mruke na kuoma kwa ndoe, niko koni wakaung'a wimilwagha ni Andu kwa Wafu.

²⁰ Waliwa ni mae; wajighwa ni ming'ori; mmbiwi ndewuyaakumbukwa, wakaia sa mudi ghughuye.’

²¹ “Wadamkita muka kolowi usewadie mwana ungi; ndewonyeragha wughoma ghungi kwa uo muka mkiwa anduangi.

²² Ela sena Mlungu kwa ndighi rake wam'bonya mmbiwi uduo moyo luma; wawuka ngelo orefueghe ngolo ekaia moyo.

²³ Mlungu wadawilindia na kuwimangisha; wadawizighanira seji wighendagha.

²⁴ Kapindi wajoswa na kusoweka sena; wanyaya na kuoma sa isaka; wadumbulwa sa vanga va viro.

²⁵ Ikakaia siko kungi huwo, nani udimagha kuwonyera kukaia ne mtee, na malagho ghapo kukaia gha duu?”