AYUBU 22 - Biblia Ilagho Jiboie Kwa Wandu Wose

¹ Niko Elifazi Mtemani ukatumbulia:

² “Welee, mdamu wadima kumfwana Mlungu? Loli mundu uko na hikima wadakufwana uo moni.

³ Welee, Uo-Uwadie-Ndighi-Rose upata fwaida ingi angu wei kuko na mhachi? Angu, mighendo yako ikakaia iboie, imtesia kii?

⁴ Huwo waawuyakukemia na kukutanya, angu wei kwawuyamuobua?

⁵ Nechi ni kwa wundu ghwa wuwiwi ghwako mungi, na makosa ghako ghisetalikagha?

⁶ Kwasokie wanyinyu nguwo kukawisigha duu, kwa wundu ghwa sile korewilawiagha.

⁷ Kwaimie mundu wasilwa machi ghenywa, kukamuima mundu wazughwa vindo.

⁸ Kwatumie ndighi kukawusa isanga, kukajikaia oho mundu kunekelo ishima.

⁹ Kwawiwunjire waka wakiwa mikonu miduu, kukawikita na kuwisoka wana wakiwa.

¹⁰ Kwa wundu ugho kwamarwa ni shaghala chia rose, na kupatwa ni kiture cha shwa-shwa.

¹¹ Mwengere ghwako ghwawuya kira ndekuwonagha; kwafinikirwa ni machi mengi.

¹² “Welee, Mlungu ndadakaia koighu mlungunyi, na kuzighana nyerinyeri nandonyi hata ngera reko ighu na ndighi?

¹³ Sena kuaghamba, ‘Mlungu waichi kii? Wadima kutanya malagho ingelo uvisiro ni mawingu?

¹⁴ Oofinikirwa ni mawingu mabaa, usedimagha kudiwona ingelo wawuyaghenda a kichechemukonyi cha mawingunyi.’

¹⁵ Kuduanyagha na malagho gha kala agheni ghiduenughwa ni wandu wawiwi?

¹⁶ Mipango yawo erenonekieghe sa kudukwa ni machi mengi; wikadukwa noko ngelo yawo isevikie.

¹⁷ Ni wandu weremleghieghe Mlungu, wikarumiria kukaia ndedimagha kuwibonya ilagho jingi.

¹⁸ Ela sena nuo moni orewinekieghe vilambo vicha - Ini sielelwagha ni maghesho gha wawiwi.

¹⁹ Wahachi wadawona kunoneka kwawo na kuboilwa; awo wisewadie ikosa wawiseka wikighamba,

²⁰ ‘Kwa loli wamaiza wedu watoteshwa, na mali rawo rakumbwa modo.’

²¹ “Patana na Mlungu, kukaie na sere; kwa chia iyo kuchapata mecha.

²² Wusa mafundisho ukughoriagha; kughiwike ngolonyi kwako.

²³ Mmburie Uo-Uwadie-Ndighi-Rose, kukusere; kuinje wuwiwi ghwawuyabonywa nyumbenyi kwako.

²⁴ Dagha dhahabu yako ieleshero, kuikumbe aghadi ya magho ivongonyi.

²⁵ Uo-Uwadie-Ndighi-Rose ndekaie dhahabu yako; ndekaie feza yako ya zoghori mbaa.

²⁶ Aho niko kuchaaboilwa ni Uo-Uwadie-Ndighi-Rose, na oho kuchakaia na irumirio kwa Mlungu.

²⁷ Kuchamlomba nao uchakusikira, na oho kuchakatisha maghemi ghako.

²⁸ Kuchabonya mipango yako nayo ichakatishwa, na chia rako richakaia na mwengere.

²⁹ Mlungu wadawisera awo wikujosagha, na kuwikira awo wikuseragha.

³⁰ Wadakira mundu usewadie ikosa, uchakukira ikakaia kwawuyabonya nicha.”