AYUBU 16 - Biblia Ilagho Jiboie Kwa Wandu Wose

¹ Niko Ayubu ukatumbulia:

² “Nasikire malagho mengi sa agho; wuhoreshi ghonyu ni matiriro maduu.

³ Malagho ghako mengi gha duu ndeghisiagha? Niki chawuyakusumbua hata kutumbulie?

⁴ Ini wori nadimagha kudeda sa inyo, ngera modeeka seji niko; nadimagha kudunga malagho ghesimana na inyo, ngimsughusira chongo chapo.

⁵ Nadadeda malagho ghemfungisha ndighi, na kumhoresha kwa madedo ghapo.

⁶ “Ngadeda, luwawo lwapo ndeluhoagha; nganyama kima ndelusiagha.

⁷ Loli kwanisirishire ndighi ee Mlungu; kwasighie wandu wa nyumbenyi kwapo wikabwaghwa putu.

⁸ Kwanifungie ghukawuya wushuhuda ghwa worinyi; kudaruma kwapo kwaawuyashuhudia aighu yapo.

⁹ Mlungu wanirashue-rashue kwa machu ghake; wazamilo ni ini na kuja maghegho aighu yapo. M'maiza wapo waawuyanizighana kiwiing'iwi.

¹⁰ Wandu waawuyanizomia, Wanikaba idumbu kwa lumenyo; na kunikwanyikia wilo nani.

¹¹ Mlungu wanisighia kwa wandu wawiwi; wanikumba kwa wandu nikabo.

¹² Nerekoghe ngikaia nicha, ela Mlungu ukanifasha-fasha; ukaniwada singo, na kunibaria ndonyi. Waniwusirie na kunibonya bole,

¹³ wakumbi mawanu wake wanikumbie chia rose. Wanidungie figho rapo na kudia ngocho yapo kuseko na wughoma.

¹⁴ Wawuria kunikaba sena na sena, waniramia sa ing'oni ja wuda.

¹⁵ Narwae nguwo ya igunia kwa wasi; naawuyalala terinyi nilemelo putu.

¹⁶ Nalilie hata ngatinikwa ni meso; meso ghapo ghasera kira,

¹⁷ ela sena sikabie mndungi, na malombi ghapo kwa Mlungu ghaelie.

¹⁸ “Ee ndoe kusakevisa mawiwi ghibonyero aighu yapo, na kililo chapo chelilia hachi chisakenyamirishwa.

¹⁹ Hata idana mshahidi wapo ooka mlungunyi, na uo unidederiagha oko aighu.

²⁰ Waghenyi wapo wianiseka kwa lumenyo. Ini naawuyamlilia Mlungu.

²¹ Nakunde mndumu unidederie hachi yapo kwa Mlungu, seji ikaiagha aghadi ya mdamu na mmbao.

²² Nyuma ya miaka mitini, nichaghenda chia nisechaawuya.