AYUBU 14 - Biblia Ilagho Jiboie Kwa Wandu Wose

¹ “Mdamu uvalo ni muka ooka na matuku matini, nagho ghachua wasi.

² Wabuka sa mboi, na kuoma; waida sa kiju nao ndeduagha luma.

³ Kuamzighana mundu ufwane huwo, hata kumrede kutanyonyi imbiri yako ee Mlungu?

⁴ Nani udimagha kufunya kilambo chielie kufuma kwa icho chiseelie? Ndeuko ungi.

⁵ Irangi jake jeepimwa, na mtalo ghwa meri yake koko nagho; oho kwapangie kutua kwake, usedimagha kughalua.

⁶ Kwa huwo sigha lekamzighana; msighe upate kuboilwa ni ituku jake sa mundu wa kibarua.

⁷ “Jeko isuwirio kwa mudi; iji ghwademwa, ghwadima kudungia sena, na mbashu raro nderichaaleka kudungia.

⁸ Hata ngera miri yaro yawuya ya kala ndoenyi, na kirimba charo chiome,

⁹ ela sena ghukapata machi, ghuchaanga; ghubonye chonge sa mudi mkoo.

¹⁰ Ela mdamu wadafwa na kurikwa; ukaleka kusoda, uwuyawonekia hao sena?

¹¹ Sa iji koni machi ghisowekagha ndiwenyi, na moda kuoma,

¹² ni huwo koni mundu ukafwa usechaawuka sena; hata mlungunyi kuide ndewuyaawuka, na mndungi ndedimagha kummbusira anduangi.

¹³ Ndakwanivisagha Andu kwa Wafu, hata machu ghako ghisie; nao kuniwikie ngelo enikumbuka?

¹⁴ Mundu ukafwa-lee, uwuyakaia moyo sena? Matuku ghose gha wudumiki ghwapo ghukurie, nichaweseria hata nivikie kufungulwa.

¹⁵ Kuchawanga, nani nichakudika; kuchakunda kujiwona iumbo kujiumbie.

¹⁶ Niko kuchatala kughenda kwapo, kuseko na kunitalia kaung'a yapo.

¹⁷ Kuchanifuya wughoma ikosa japo, na kuiinja kaung'a yapo.

¹⁸ “Sa iji mghondi ghuwowonyekagha na kubingilika noko, na igho kuinjwa andu kwaro,

¹⁹ na sa iji machi ghishorodoagha magho, na kukorodua ndoe, huwo koni kwadajimeria isuwirio ja mdamu.

²⁰ Oho kwadamsima toe, nao waida; kwadaghalusa fwana yake, na kumwinja noko.

²¹ Wana wake wikeduapata ishima, ndemanyagha; wikeduaserwa ngazi, ndewonagha.

²² Wadasikira luwawo lwa mumbi ghwake ghoni, na kukulilia moni.”