AYUBU 12 - Biblia Ilagho Jiboie Kwa Wandu Wose

¹ Niko Ayubu ukatumbulia:

² “Kwa loli inyo mo wandu, na hikima yenyu muafwanya nayo.

³ Ela nani moni wori naelelo kara kara na inyo; siko wa ndonyi kungi konyu. Nani useichi malagho sa agho?

⁴ Hata waghenyi wapo waawuyaniseka; ini mundu neremmbangagha Mlungu nao unidike, mundu wa hachi usewadie ikosa jingi, wandu waawuyaniseka.

⁵ Inyo ndemna wasi ghungi, sena mwaawuyanisarighia; mwaawuyamkaba mundu walighisa kughwa.

⁶ Ela vitoi na wandu wisemuichi Mlungu weeka na sere, hata ngera Mlungu ghwawo ni ndighi rawo.

⁷ “Ela kotia nyamandu, naro richakufundisha; kotia nyonyi ra mbeonyi richakughoria.

⁸ Miwalwa ya ndoenyi ikufundishe, na samaki ra baharinyi rikuwonyere.

⁹ Ni riao aghadi ya iro rose riseichi kukaia BWANA nuo ubonyere huwo?

¹⁰ Irangi ja kula kindo chiko moyo, na miruke ya wadamu wose eeka mikonunyi kwake.

¹¹ Welee, kudu ndakwadasikiria malagho seji lumi lutoagha vindo?

¹² Waghosi niwo wiko na hikima, sena kwa kukaia na matuku mengi, wawadie suku.

¹³ “Hikima na kumanya veeka na BWANA, oko na njama na kumanya.

¹⁴ Ukavuchua, mndungi ndewuyaagha; ukafunga mundu jela, ndefungulwagha ni mndungi.

¹⁵ Mlungu ukawadia vua, ndoe iaoma; ukareda vua nyingi, ndoe iadukwa ni machi.

¹⁶ Oko na ndighi na wusimi, awo wikalilo na awa wikaliagha wose weeka mikonunyi kwake.

¹⁷ Wadawisoka wanjama hikima, na watanyi wadawiwunja wakelu.

¹⁸ Wadawiinja wazuri vifumbinyi kwawo, na kuwibonya wiwuye wafungwa.

¹⁹ Wadawisoka wakohani wubaa ghwawo na kuwifunya noko, nao wadawisima awo wiko na ndighi.

²⁰ Wadawinyamira wanjama wirumirikie, na kuinja hikima ya waghosi.

²¹ Wawifusha waya wabaa, na kuwisoka nguma rawo awo wiwadie wudimi.

²² Wadafunukua maza rivisiro, na kuriwika mwengerenyi.

²³ Wadabonya mbari ra wandu rikaie mbaa, sena wadarisaghisa; wadarizeghesha, sena wadariinja noko.

²⁴ Wadainja kumanya kwa vilongozi va wandu, na kuwibonya wimare-mare andu icho kisha.

²⁵ Wadaadada-adada akirenyi, nao wadawibonya witatarike sa wawongeri.