AYUBU 11 - Biblia Ilagho Jiboie Kwa Wandu Wose

¹ Niko Sofari Mnaamathi ukatumblia:

² “Malagho mengi huwu ghadima kukaia ghisetumbulilwagha? Mundu wa malagho mengi huwu wadima kutalwa kukaia na hachi?

³ Malagho ghako gha duu ghadima kunyamirisha wandu? Kukakadema sare ndekukanilwagha?

⁴ Oho kwawuyaghamba, ‘Malagho nawuyaghora ni gha loli, nani naelie imbiri ya Mlungu.’

⁵ Mlungu ndadedagha ukakuja malagho,

⁶ ukakughoria ngasu ya hikima; Uo waichi maza nyingi. Idana kumanye angu Mlungu ndekukabie seji ifwane kunughana na makosa ghako.

⁷ “Kwadima kumanya ngasu ra Mlungu? Kwadima kumanya kutua kwake Uo-Uwadie-Ndighi-Rose?

⁸ Reko ighu kuchumba mlungunyi; kwadima kubonya wada? Reko ndenyi kuchumba kaburi; ndekuichi?

⁹ Vipimo vake ni vilacha kuchumba ndoenyi, ni vishapa kuchumba bahari.

¹⁰ Mlungu ukacha na kukufungia jela ima ukuwange kutanyonyi, nani udimagha kumghiria?

¹¹ Uo waichi wandu wa kisha; ukawona ikose-lee, ndechaajitala?

¹² Ela mundu mkelu uchatambukilwa iji wawona mwana wa furo ukivalwa ufughikie.

¹³ “Kukaboisa ngolo yako nicha, kuchamtasa Mlungu kukimmbusiria mikonu yako.

¹⁴ Ikakaia kuko na wuwiwi ghungi, kughusighe putu; kusesighe wuwiwi ghuwoneke mzinyi kwako.

¹⁵ Aho niko loli kuchakaia na wuwana, ghozighana wandu kuseko na waya ghungi; kuchakaia nicha, hata ndekuchaaobua anduangi.

¹⁶ Kuchaliwa wasi ghwako, na kughukumbuka sa machi ghameria kuida.

¹⁷ Irangi jako jichakaia jielie kuchumba mwengere ghwa dimeghadi, na kira charo chichafwanana na kuela kwa ndoe.

¹⁸ Kuchakaia banana kuko na isuwirio; Mlungu uchakulindia na kukuhoresha.

¹⁹ Kuchalala, na mndungi ndechaakuturusa; wandu wengi wichakulomba wutesia.

²⁰ Ela wandu wichazighana wafwa ngolo; chia ekimbiria ichawilaghaya, wichamanya wori waakola wafwa.”