AMOSI 7 - Biblia Ilagho Jiboie Kwa Wandu Wose

Mawono gha zighe

¹ Bwana MLUNGU ukaniwonyera mawono: Ngawona ukiumba izungu ja zighe nyuma ya ifungu ja nyasi ja mzuri kudemwa na nyasi kuzoya kubuka sena.

² Hata iji zighe rameria kuja nyasi rose ra isangenyi, nereghambieghe, “Ee Bwana MLUNGU, nakuvoya kufuye wandu wako wughoma, Wandu wa Israeli wadima wada kukaia moyo? Weeka watini nandighi.”

³ Nao BWANA ukaghalusa maghesho aighu ya ilagho ijo ukaghamba, “Ndejichaabonyeka kungi.”

Mawono gha modo

⁴ Bwana MLUNGU ukaniwonyera mawono ghamu: Ngawona Bwana MLUNGU uwangagha wandu uwikabe kwa modo; nagho ghukakora bahari mbaa machi ghikaoma na kuzoya kukora isanga.

⁵ Niko ngaghamba! “Ee Bwana MLUNGU, nakulomba kusighe; Wandu wa Israeli widima wada kukaia moyo? Weeka watini nandighi.”

⁶ Nao BWANA ukaghalusa maghesho aighu ya ilagho ijo ukaghamba, “Hata iji wori ndejichaabonyeka kungi.”

Mawono gha Kabiro

⁷ Ngawona mawono ghamu kufuma kwa BWANA, Bwana wakaia kimusi mbai na mbai ya wurigha ghuaghilo kwa kupimwa na kabiro iyo oreiwadieghe.

⁸ Nao BWANA ukanizera, “Kwawuyawona kii Amosi?” Ngamtumbulia, “Naawuyawona kabiro.” Niko BWANA ukaghamba, “Ola naawuyatumia kabiro kuwonyera kukaia aghadi ya wandu wapo Israeli weekomeka sa wurigha, sichaawisigha nisewikabie anduangi.

⁹ Aho andu wandu wa kivalwa cha Isaaka weretasiragha kuchatoteshwa. Andu kwa Wueli kwa Israeli kuchanoneka. Nicharimeria nguma ra Mzuri Jeroboamu.”

Amosi na Amazia

¹⁰ Niko Amazia, mkohani wa Betheli, ukaduma momu kwa Mzuri Jeroboamu ukighamba, “Ola Amosi wadeda malagho gha sheshe aighu yako aghadi ya wandu wa Israeli, na malagho ghake ni gha ndengwa kwa isanga.

¹¹ Amosi waawuyaghora, ‘Jeroboamu uchabwaghwa wudenyi, na wandu wa Israeli wichadwalwa wunyika kula na isanga jawo.’”

¹² Nao Amazia ukamzera Amosi, “Ee Mlodi, ghenda cha isanga ja Juda, kufunyeghe wulodi aho wikulipe.

¹³ Ela jingi kusefunye wulodi Betheli, kwa kukaia ni andu kotasira kwa mzuri sena ni hekalu ya wuzuri.”

¹⁴ Niko Amosi ukamtumbulia Amazia, “Ini se mlodi kungi, hata se mwana wa mlodi; ela ne mlisha, na mlimi wa miku.

¹⁵ BWANA ooniwada ngilisha mfugho, nao ukanizera nichefunyira wandu wake Israeli wulodi.

¹⁶ Kwa huwo idana sikira ilagho ja BWANA. Kwaghamba nisefunye wulodi aighu ya Israeli, hata nisechilie wandu wa Israeli.

¹⁷ Kwa wundu ugho BWANA wakuzera oho Amazia, ‘Mkako uchawuya ilaya andenyi ya muzi, wana wako wa womi na wa waka wichabwaghwa wudenyi. Isanga jako jichapimwa kwa kamba na kuwaghilwa wandu wazima. Oho kumoni kuchafwa andenyi ya isanga ja wusezinyi; na loli wandu wa Israeli wichadwalwa wunyika kufuma iji isanga.’”