AMOSI 4 - Biblia Ilagho Jiboie Kwa Wandu Wose

¹ Sikirenyi agha inyo waka wa Samaria, m'bandie sa ng'ombe ra Bashani rilishwagha aighu ya mighondi ya Samaria; mkorongagha wakiwa, na kuwitirira awo wisowagha na kuwizera womi wenyu, “Redenyi chofi dinyo.”

² Bwana MLUNGU walaghirie kwa wueli ghwake, “Matuku ghichacha nawo wichamdwa kwa koleo; kula umu onyu uchadwalwa kwa ndoana sa samaki.

³ Mchadwalwa kaavui na wurigha ghuchikanyiro, na kukumbwa cha shighadi.”

Kulema kufundishika kwa Israeli

⁴ BWANA Uwadie-Ndighi-Rose waghamba, “Ghendenyi Betheli, m'bonye makosa; mghende Gilgali mchurie kubonya makosa; redenyi vizongona venyu kula nakesho, na ifungu jenyu ja ikumi nyuma ya kula ituku ja kadadu.

⁵ Funyenyi vizongona va chawucha va mkate ghwa chachu, mtangaze mafunyo ghifunywagha kwa ngolo, na kughighoragha; angu niko mkundagha inyo wandu wa Israeli!

⁶ “Ni ini neremredieghe njala andenyi ya kula muzi ghonyu; mkasowa vindo kula andu morekaieghe; ela hata huwo saki ndemorenighalukieghe.

⁷ Nereghirieghe vua isenye ingelo eresighiloghe meri idadu tu ekuwida. Ngakaia nginyesha vua muzi ghumu na kuima muzi ghumu; vua erenyieghe mbuwa imu, na mbuwa imu ndeerenyieghe hata viro vikaoma.

⁸ Wandu wa mizi iwi idadu wereghendieghe kwa muzi ghumweri kulola machi, ela ndewereghipatireghe gha kuwikata; nenyo hata huwo saki ndemorenighalukieghe.”

⁹ “Neredumieghe mbeo eomera viro venyu. Ngareda zighe riwoneja mbuwa renyu, mizabibu yenyu na mitini yenyu na mizeituni yenyu, nenyo hata huwo saki, ndemorenighalukieghe.

¹⁰ “Neredumieghe saka izamie aghadi konyu, sa ija nereidumieghe Misri, ngawibwagha wandu wenyu wa irika wudenyi, ngawusa farasi renyu, ngam'bonya mnukilo ni gharia renyu kambinyi. Nenyo hata huwo saki, ndemorenighalukieghe.

¹¹ “Neretoteshereghe wamu wenyu seji neretoteshereghe wandu wa Sodoma na Gomora. Awo morevuvukieghe morekoghe sa kamudi kavuvulwa modonyi. Hata huwo saki ndemorenighalukieghe,” waghamba BWANA.

¹² “Kwa wundu ugho nichamkaba ee wandu wa Israeli. Idana kwa kukaia nichabonya huwo, kuboisenyi mkwane na kutanya kwapo.”

¹³ BWANA nuo orebonyereghe mighondi. Nuo ubonyere mbeo iweteghe, na kumghoria mdamu maghesho ghake; nuo ughalusagha dime iwuye kio. Wadasela aighu ya mighondi ya ndoenyi. Irina jake ni BWANA, uo Mlungu Uwadie-Ndighi-Rose.