3 JOHANE 1 - Biblia Ilagho Jiboie Kwa Wandu Wose

¹ Ini mghosi, nakuandikia oho mkundwa Gayo nikukunde kwa loli.

² Mkundwa, naawuyalomba maza rako rikaie nicha, kupate kukaia banana; nani namanya angu koko banana rohonyi.

³ Angu nereboiloghe na ndighi, iji wanidu wamu werechieghe na kushuhudia wuloli ghwa irangi jako; na seji kwawuyaghenda kwa kuinugha iyo loli.

⁴ Ndekuwadie kuboilwa kungi kuzima nidimagha kupata, kuchumba uko kusikira kukaia wana wapo wawuyainugha iyo loli.

Kumkuma Gayo

⁵ Mkundwa, iyo kazi kwawuyabonya ewidumikia wanidu ni ya hachi ingelo kubonyagha wudumiki ghungi kwa wanidu, na kuchumba kwa awo wiko waghenyi;

⁶ awo wawuyashuhudia maza ra lukundo lwako imbiri ya ikanisa. Kuchabonya nicha kukawitesia kwa charo chawo, seji ifwanagha kwa wudumiki ghwa Mlungu.

⁷ Angu ni wandu wikufunyire kwa wundu ghwake, nawo ndewiwusire kindo chingi kufuma kwa wandu wisemwichi Mlungu anduangi.

⁸ Kwa wundu ugho, yadifwana diwitesie wandu sa awo, eri dipate kukaia wangara wawo kwa kazi andenyi ya iyo loli.

Diotrefe na Demetrio

⁹ Najiandikie ikanisa malagho ghamu, ela Diotrefe uo ukundagha kukuwika moni imbiri, ndewuerumiria wulongozi ghwapo anduangi.

¹⁰ Kwa wundu ugho iji nacha, nichafunukua malagho ghake ghose wawuyaghibonya, seji ujagha malagho gha kisha kisha aighu yedu. Na sena ndekatwagha ni agho, ela wadalegha kuwikaribisha wanidu; hata awo wikunde kuwikaribisha, wadawighiria na kuwiwinga ikanisenyi.

¹¹ Mkundwa, kusesunge wuwiwi, ela kusunge wucha. Uo ubonyagha nicha ni wa Mlungu; uo ubonyagha kiwiwi, ndemmbonie Mlungu anduangi.

¹² Demetrio washuhudilwa wucha ni kula mundu; hata na iyo loli wori yamshuhudia. Na isi wori dawuyamshuhudia, na oho kwamanya angu wushuhuda ghodu ni ghwa loli.

Voro ra kutua

¹³ Neko na malagho mengi ghekuandikia, ela siwonie nikuandikie kwa kalamu na wino;

¹⁴ nasuwiria kukuwona kafwani, nesi dichaja malagho wushu kwa wushu.

¹⁵ Sere ndeikaie kwako. Waghenyi wedu wakuroghua. Wiroghuo awo waghenyi wedu kula umu.