2 WAZURI 7 - Biblia Ilagho Jiboie Kwa Wandu Wose

¹ Elisha ukatumbulia, “Ola sikira ilagho ja BWANA: Kesho ngelo sa ii cheni, kilo idadu ra mufu ghudendere ghuchauzwa kwa bei ya kibelele chimweri cha feza, na kilo irandadu ra mufu ghwa shairi ghuchauzwa kwa bei ya kibelele chimweri cha feza, ahoeni mbengenyi ya Samaria.”

² Uja m'baa ozighana maza ra mzuri ukamzera mlodi Elisha, “Hata BWANA moni ukabonya mawingu ghidie viro sa vua idime jeni, loli idimika ilagho ijo jikaie?” Elisha ukatumbulia, “Ola kuchawona na meso ghako, ela ndekuchaaja.”

Ijeshi ja Wasiria kusigha Samaria

³ Korekoghe na wandu wa sima bana mbengenyi ya muzi ghwa Samaria. Wikazerana weni na weni, “Kwaki wele difuyagha andu kumweri?

⁴ Dikaghamba wei dingie cha mzinyi, njala eeka ebwagha; na dikakaia ahaeni, ni kifwa cheni. Da si baa dighende cha kambinyi ya Wasiria; wikadifuya wughoma, dichakaia moyo; wikadibwagha, kose ni kufwa.”

⁵ Nao iji ndoe yaswa, wikafuma na lumisimisi, wikaghenda cha kambinyi ya Wasiria. Ela iji werevikieghe kutuonyi kwa kambi, ndewerewonieghe mndungi aho.

⁶ Kwa kukaia BWANA orekoghe wabonya ijeshi ja Wasiria wisikire chwaka ra magare na farasi, na tiri ra ijeshi ibaa; wikaririkanya wei mzuri wa Israeli waakodisha majeshi gha mzuri wa Wahiti na gha mzuri wa Misri, wipate kulwa nawo.

⁷ Nao wikakimbia na lumisimisi, wikasigha hema rawo, farasi rawo, weke punda wawo, na kula kilambo cherekoghe kambinyi; wikakimbia tu kukira marangi ghawo.

⁸ Hata iji awo wandu wa sima bana wavika kutuonyi kwa ija kambi, wikangia andenyi ya hema; wikaja wikanywa; wikashoa feza na dhahabu, na nguwo; wikaghenda wikarivisa. Wikawuya sena na kungia hema zima; wikashoa vilambo, wikaghenda na kuvivisa.

⁹ Nao wikazerana weni na weni, “Ndediwuebonya ilagho ja hachi. Idime ni ituku jeeresha malagho mecha, dikanyama kima hata ndoe iele, dichapatwa ni malagho. Idana ndedighende dighore agha malagho ngomenyi kwa mzuri.”

¹⁰ Niko wikacha wikawiwanga walindiri wa mbenge ya muzi, wikawighoria wikighamba, “Dereghendieghe kambinyi ya Wasiria, ela ndediwonie hata kusikira mndungi, ela deekua farasi rifungie, na punda na hema rasighwa kimusi sa iji koni riko.”

¹¹ Niko waja walindiri wa mbenge wikawanga na kughora agho malagho nyumbenyi kwa mzuri.

¹² Mzuri ukawuka nakio ukawizera wabaa wake, “Lekenyi nimghorie seji Wasiria wadibonyera njama. Awo waichi kukaia deko njala; kwa huwo waafuma kambinyi, eri wipate kukuvisa aisangenyi; nesi dikafuma wichadiwada dimoo, na kughuwada muzi.”

¹³ M'baa umu wake ukaghamba, “Awandu weni wisigharikie weeka wikambilo ni chongo kewada wiachakaia sa awandu weni wa Israeli wisaghie; kwa huwo, ndedidume wandu na farasi isanu ra iri risigharikie, dipate kuzighana agho malagho.”

¹⁴ Niko wikaduma wandu wighende na magare awi na farasi, wipate kunugha ijeshi ja Wasiria; wikawizera, “Ghendenyi mzighane.”

¹⁵ Waja wandu wikawinugha Wasiria hata Jordani; nao ola wikakua achienyi kose nguwo radeghwa chiaimweri na vilambo ingelo Wasiria werekoghe wikikimbia. Waja wandu wikawuya na kumghoria mzuri.

¹⁶ Nao wandu wa Samaria wikafuma na kuwada kambi ra Wasiria; kwa huwo kilo idadu ra mufu ghudendere ghukauzwa kwa bei ya kibelele chimweri cha feza; na kilo irandadu ra mufu ghwa shairi, ghukauzwa kwa bei ya kibelele chimweri cha feza; karakara na ilagho ja BWANA.

¹⁷ Mzuri okolee wammbika uja m'baa ozighana maza ra mzuri ukaie mlindiri wa mbenge. Niko wandu wikammbadia aho mbengenyi hata ukafwa; kunughana na ilagho jereghoreloghe ni mlodi Elisha, ingelo mzuri oreserieghe cha kwake.

¹⁸ Kwa kukaia iji Elisha oremzerieghe mzuri, “Kilo irandadu ra mufu ghwa shairi, ghuchauzwa kwa bei ya kibelele chimweri cha feza; na kilo idadu ra mufu ghudendere, ghuchauzwa kwa bei ya kibelele chimweri cha feza, kesho ngelo sa ii cheni, aha mbengenyi ya muzi ghwa Samaria,”

¹⁹ uja m'baa ozighana maza ra mzuri odemzera mlodi Elisha, “Hata BWANA moni ukabonya mawingu ghidie viro sa vua inye sa idime jeni, loli idimika ilagho sa ijo jikaie?” Na mlodi ukamtumbulia, “Oho kuchawona na meso ghako, ela ndekuchaaja.”

²⁰ Na huwo niko koni ikaie kwake; kukaia wandu weremmbadirieghe aho mbengenyi, hata ukafwa.