2 WAZURI 24 - Biblia Ilagho Jiboie Kwa Wandu Wose

¹ Ngelo Jehoiakimu orekoghe mzuri wa Juda, Nebukadnezari mzuri wa Babuloni ukajoka na kum'bonya Jehoiakimu ukaie aisi yake kwa miaka idadu; konyuma Jehoiakimu ukamlegha Nebukadnezari.

² BWANA ukamdumia Jehoiakimu majeshi gha Wakalidayo, na majeshi gha Wasiria, na majeshi gha Wamoabu, na majeshi gha Waamoni eri Juda ipate kutoteshwa kunughana na ilagho ja BWANA jighorelo ni wadumiki wake walodi.

³ Kwa loli maza iri rerewichieghe wandu wa Juda kwa momu ghwa BWANA, eri upate kuwiinja usewiwone kwa wundu ghwa kaung'a ra Manase oreribonyereghe;

⁴ na kwa wundu ghwa kubwagha wandu wa hachi. Kwa kukaia Manase orebwaghieghe wandu wa hachi wengi wa Jerusalemu, na BWANA nderekoghe tayari kumfuya wughoma.

⁵ Mabonyo ghose gherebonyeroghe ni Jehoiakimu ghaandikilo andenyi ya Chuo cha Malagho gha Ngelo cha Wazuri wa Juda.

⁶ Jehoiakimu sa weke ndee, ukafwa, na mwana wake Jehoiakini ukabonya nguma wulalo ghwake.

⁷ Mzuri wa Misri nderefumieghe sena isangenyi kwake, kwa kukaia mzuri wa Babuloni orekoghe wawada masanga ghose gherewadiloghe ni mzuri wa Misri, kufuma mpaka ghwa kaskazinyi ghwa Misri hata Moda ghwa Eufrate.

Mzuri Jehoiakini wa Juda

⁸ Jehoiakini orekoghe mundu wa irika ja miaka ikumi na wunyanya ingelo orezoyagha kubonya nguma isanga ja Juda; ukabonya nguma Jerusalemu kwa meri idadu. Mae orewangwagha Nehushta mwai wa Elnathani wa muzi ghwa Jerusalemu.

⁹ Ukabonya mawiwi imbiri ya BWANA sa iji koni weke ndee werebonyereghe.

¹⁰ Ngelo iyo, wabaa wa Nebukadnezari mzuri wa Babuloni wikajoka na kughuwada muzi ghwa Jerusalemu.

¹¹ Nebukadnezari moni ukajoka ingelo wabaa wake wa wuda werekoghe wikighurughaia ugho muzi,

¹² Jehoiakini mzuri wa Juda ukakufunya moni kwa mzuri wa Babuloni, chiaimweri na mae, na wadumiki wake, na wabaa wa wandu wake, na wadumiki wake wa ngomenyi; ukadwalwa wunyika ni mzuri wa Babuloni mwaka ghwa wunyanya ghwa kubonya nguma kwa mzuri wa Babuloni.

¹³ Mzuri wa Babuloni ukadwa mali rose ra Hekalu, na ra nyumba ya mzuri; ukavidema-dema vilambo va dhahabu verekoghe andenyi ya Hekalu ya BWANA, ivo verebonyeroghe ni Mzuri Solomoni wa Israeli, sa iji koni BWANA oreghorieghe kiimbiri.

¹⁴ Nebukadnezari orewidwaeghe wunyika wandu wose wa Jerusalemu sa wafungwa, wabaa wa wandu wose, na mang'oni gha wuda, wandu elfu ikumi; mafundi ghose ghewacha vilambo na ghechana vilambo; mndungi nderesigharikieghe, ela awo werekoghe wakiwa wichumbie isangenyi.

¹⁵ Ukamdwa Jehoiakini cha Babuloni, na mae, na waka wake, wadumiki wake, na wandu wabaa wa isanga, ukawidwa wunyika wose kufuma Jerusalemu hata Babuloni.

¹⁶ Mzuri wa Babuloni ukadwa mang'oni gha wuda ghose cha Babuloni, wandu elfu mfungade, mafundi ghewacha na ghechana elfu imweri, awo wose werekoghe wandu wiko na ndighi, wifwane kwa kulwa wuda.

¹⁷ Nao mzuri wa Babuloni ukam'bonya Matania ukaie mzuri wulalo ghwa mruna ndee Jehoiakini, ukaghalusa irina jake ukammbanga Sedekia.

Mzuri Sedekia wa Juda

¹⁸ Sedekia orekoghe mundu wa irika ja miaka mirongo iwi na ghumweri ingelo orezoyagha kukaia mzuri. Ukabonya nguma Jerusalemu kwa miaka ikumi na ghumweri; mae orewangwagha Hamutali mwai wa Jeremia wa muzi ghwa Libna.

¹⁹ Ukabonya mawiwi imbiri ya BWANA sa iji koni Jehoiakimu orebonyereghe.

²⁰ Kwa wundu ugho BWANA ukawawa nandighi na kuwikumba noko wandu wa Jerusalemu na Juda wikaie kula nao.