2 WAZURI 22 - Biblia Ilagho Jiboie Kwa Wandu Wose

Mzuri Josia wa Juda

¹ Josia orekoghe mundu wa irika ja miaka wunyanya iji orezoyagha kubonya nguma. Ukabonya nguma Jerusalemu kwa miaka mirongo idadu na ghumweri. Mae orewangwagha Jedida mwai wa Adaia wa isanga ja Bozkathi.

² Ukabonya malagho mecha imbiri ya BWANA, na kubonya seji ndee Daudi orebonyereghe; hata nderesighieghe kumnugha anduangi.

Kuwonwa kwa Chuo cha Sharia

³ Mwaka ghwa ikumi na wunyanya ghwa kubonya nguma kwa Josia, ukaduma karani Shafani mwana wa Azalia, wawae Meshulamu, ughende Hekalunyi ya BWANA ughambe,

⁴ “Jokenyi kwa Mkohani M'baa Hilkia, upate kumneka mtalo ghwa pesa riredelo Hekalunyi kwa BWANA, iro rerekwanyiroghe ni walindiri kufuma kwa wandu;

⁵ murineke wabonyi kazi awo wizighanagha Hekalu, nawo wiwineke awo wandu webonya kazi eiboisa Hekalu.

⁶ Wandu awo ni mafundi gha mbau, na waaghi na mafundi gheagha magho; sena wilipe mbau na magho ghiwachilo kwa kuboisa nyumba.

⁷ Ndewichaazighanwa seji wiritumiagha iro pesa wichaanekwa, kwa kukaia awo ni wandu wa wuloli.”

⁸ Nao Mkohani M'baa Hilkia ukamzera Shafani uja karani, “Nawona chuo cha Sharia andenyi ya Hekalu.” Niko Hilkia ukamneka Shafani icho chuo ukachishoma.

⁹ Shafani uja karani ukacha kwa mzuri ukamzera, “Wadumiki wako dafunya pesa rose rikoghe andenyi ya Hekalu, dikawineka awo wandu wiizighanagha Hekalu.”

¹⁰ Niko ukamzera, “Hilkia uja mkohani wanineka chuo.” Nao Shafani ukachishoma imbiri ya mzuri.

¹¹ Nao iji mzuri wasikira malagho gha icho chuo cha sharia, ukarashua nguwo rake.

¹² Mzuri ukafunya momu kwa mkohani Hilkia, na Ahikamu mwana wa Shafani na Akbori mwana wa Mikaia, na Shafani karani, ukawizera,

¹³ “Ghendenyi mumkotie BWANA kwa wundu ghwapo, na kwa wundu ghwa wandu wose wa Juda, kunughana na malagho gha ichi chuo chawonwa; angu chiawonyera BWANA oko na machu nesi mabaa loli loli, kwa kukaia weke aba ndeweresikireghe malagho gha ichi chuo, wipate kubonya sa iji chawuyaghamba aighu yedu.”

¹⁴ Niko Mkohani M'baa Hilkia, na Ahikamu, na Akbori, na Shafani na Asaia, wikaghenda kwa mlodi wa waka Hulda mka wa Shalumu mwana wa Tikva, wawae Harhasi mlindiri wa kabati ya nguwo, (orekoghe ukikaia Jerusalemu, mtaa ghwa kawi); wikaja malagho nao.

¹⁵ Nao Hulda ukawizera, “BWANA, uo Mlungu wa Israeli waghamba huwu: ‘Uo mundu wamduma kwapo mumzere,

¹⁶ Ola nichareda wuwiwi kwa muzi ughu na kwa wandu waro, kara kara na agho malagho mzuri wa Juda waghishoma.

¹⁷ Angu wanisighie, na kufukiria milungu mizima marumba, eri winibonye nikaie na machu kwa wundu ghwa iro kazi ra mikonu yawo. Kwa wundu ugho nichakaia na machu ghibirie aighu ya Jerusalemu, hata ndeghichaahoa.

¹⁸ Na kwa wundu ghwa mzuri wa Juda umdumie kwapo, mumzere, BWANA, uo Mlungu wa Israeli waghamba, Kunughana na agho malagho kwaghisikira,

¹⁹ na kwa kukaia kwaherie na kukusera imbiri kwapo ngelo koresikireghe sa iji nighorie aighu ya muzi ughu na wandu wake, seji wichaachelwa ni wuduu na njowe, kukarashua nguwo rako na kulila imbiri kwapo, nanimoni nakusikira; ini BWANA naghamba.

²⁰ Ola kuchafwa sa weke ndeyo, kuriko kwa sere; meso ghako ndeghichaawona ugho wasi ghose nichaaghuredia muzi ughu.’” Nao awo wandu wikammbunjira mzuri agho malagho.