2 WAZURI 20 - Biblia Ilagho Jiboie Kwa Wandu Wose

Mzuri Hezekia kuwuya mkongo na kuboa

¹ Matuku agho, Mzuri Hezekia ukawuya mkongo kaavui na kufwa; na mlodi Isaya mwana wa Amozi ukacha kumzighana na kumzera, “BWANA waghamba kuboise maza ra nyumba yako nicha, kwa kukaia ndekuchaaboa wukongo ughu, ela kuchafwa.”

² Nao Hezekia ukaghaluka cha wurighenyi, ukamlomba BWANA ukighamba,

³ “Nakulomba idana kunikumbuke ee BWANA, seji nighendie kwa wuloli imbiri kwako kwa ngolo yose, ngibonya agho ghikuboiagha;” Hezekia ukalila nandighi.

⁴ Hata iji Isaya orekoghe ukifuma, imbiri useidie waza ya ghadi, ilagho ja BWANA jikamchea,

⁵ “Wuya kumzere Hezekia m'baa wa wandu wapo, BWANA uo Mlungu wa ndeyo Daudi waghora huwu: Nasikira malombi ghako na kuwona mbori rako; ola nichakuboisa na ituku ja kadadu kuchajoka Hekalunyi kutasa.

⁶ Nani nichakuchuria miaka ikumi na misanu. Nichakukira na kuvuvua ughu muzi kwa wundu ghwapo na kwa wundu ghwa mdumiki wapo Daudi.”

⁷ Nao Isaya ukaghamba, “Fashenyi tini, mrikande aho andu mbama iko upate kuboa.”

⁸ Nao Mzuri Hezekia ukamkotia Isaya, “Alama eniwonyera kukaia BWANA waniboisa, na sena nichajoka Hekalunyi ituku ja kadadu ni iyao?”

⁹ Isaya ukatumbulia, “Alama ewonyera kukaia BWANA uchabonya sa iji waghamba niyo ihi: keni kirerendi chadaghenda naimbiri milambo ikumi, angu chadawuya noko nyuma milambo ikumi?”

¹⁰ Hezekia ukatumbulia, “Kwaangue kirerendi kughenda imbiri milambo ikumi kuchumba kuwuya nanyuma milambo ikumi.”

¹¹ Nao mlodi Isaya ukamlilia BWANA, ukawunja kirerendi nanyuma milambo ikumi, nacho cherekoghe chavika ngazinyi ra Ahazi.

Wadumwa kufuma Babuloni

¹² Ngelo iyo, Merodaki-baladani mwana wa Baladani mzuri wa Babuloni ukaduma wandu na barua na manosi kwa Hezekia; angu oresikireghe kukaia orekoghe mkongo.

¹³ Hezekia ukawikaribisha na kuwiwonyera mali yake yose ya nyumbenyi kwake, feza, na dhahabu, na marumba na mavuda gha zoghori mbaa, na maswagha ghake, na vilambo vose verekoghe andenyi ya ngome yake ya vilambo na kula kilambo cherekoghe andenyi ya nyumba yake. Ndekuwadie kilambo chingi andenyi ya ngome yake na andenyi ya wuzuri ghwake userewiwonyereghe.

¹⁴ Niko mlodi Isaya ukacha kwa Mzuri Hezekia ukamzera, “Awandu wafuma hao, nawo waghamba wada?” Hezekia ukaghamba, “Wafumie isanga ja kula, isanga ja Babuloni.”

¹⁵ Isaya ukamkotia, “Wawona kii nyumbenyi kwako?” Hezekia ukatumbulia, “Wawona kula kilambo chiko ngomenyi kwapo. Siwivisire kilambo chingi chiko andenyi ya stoo yapo.”

¹⁶ Nao Isaya ukamzera mzuri, “BWANA Uwadie Ndighi Rose waghamba,

¹⁷ Ngelo ichacha vilambo vako viko andenyi ya ngome yako, na ivo vose verewikiloghe ni weke ndeyo hata idime, vichadukwa hata Babuloni, na kindo chingi ndechichaasigharika.

¹⁸ Na wana wako wamu wa womi aweni kuwivae, wichadwalwa wunyika na kuwunjwa weke kolowi andenyi ya ngome ya mzuri wa Babuloni.”

¹⁹ Nao Hezekia ukamzera Isaya, “Ilagho ja BWANA wajighora jaboie.” Angu oreririkanyireghe, “Kewada ichakaia sere na wulindiri kwa matuku ghapo.”

Kutua kwa kubonya nguma kwa Hezekia

²⁰ Mabonyo ghose gha Hezekia orebonyereghe na kudima kwake, na seji orebonyereghe visima na mikua hata ukareda machi mzinyi, ghaandikilo andenyi ya Chuo cha Malagho gha Ngelo cha Wazuri wa Juda.

²¹ Hezekia ukafwa sa weke ndee, na mwana wake Manase ukabonya nguma wulalo ghwake.