2 WAZURI 17 - Biblia Ilagho Jiboie Kwa Wandu Wose

Mzuri Hoshea wa Israeli

¹ Mwaka ghwa ikumi na iwi ghwa kubonya nguma kwa Ahazia mzuri wa Juda, niko Hoshea mwana wa Ela uzoye kubonya nguma aighu ya Israeli aja Samaria. Ukabonya nguma kwa miaka ikenda.

² Ukabonya mawiwi imbiri ya BWANA ela si sa wazuri wa imbiri wa Israeli anduangi.

³ Shalmaneseri mzuri wa Ashuru ukajoka kulwa nao, na Hoshea ukakufunya kwake, ukakaia ukimlipa kodi.

⁴ Ela mzuri wa Ashuru ukawona kukaia Hoshea orekoghe na sheshe; kwa kukaia orekoghe waduma wandu kwa So mzuri wa Misri, hata nderelipieghe kodi kwa mzuri wa Ashuru seji orekoghe ukibonya mwaka-mwaka. Kwa huwo mzuri wa Ashuru ukammbwada na kumngira kifungonyi.

Kughwa kwa Samaria

⁵ Niko mzuri wa Ashuru ukabonya wuda na isanga jose, ukacha Samaria; ukaghurughaia ugho muzi kwa miaka idadu.

⁶ Mwaka ghwa ikenda ghwa Hoshea, niko mzuri wa Ashuru uwadie muzi ghwa Samaria, ukadwa Waisraeli wunyika hata Ashuru na kuwiwika muzi ghwa Hala, kaavui na Moda ghwa Habori, isanga ja Gozani hata na andenyi ya mizi ya Wamedi.

⁷ Maza iri rerebonyekieghe, kwa kukaia Waisraeli werekoghe wam'bonyera BWANA Mlungu wawo kaung'a; uo orewifunyireghe isanga ja Misri, kufuma wuzumbenyi ghwa Mzuri wa Misri, na kuitasa milungu mizima,

⁸ na kunugha mizango ya iro mbari BWANA orerifunyireghe imbiri ya wandu wa Israeli; na kwa wundu ghwa kunugha mizango iredelo ni wazuri wa Israeli.

⁹ Wandu wa Israeli wikabonya kwa kiviso malagho ghisem'boiagha BWANA Mlungu wawo; wikakuaghia weni andu kotasira milimu aighu mighondinyi andenyi ya mizi yawo yose, kufuma mnarenyi gholindia hata muzi ghuko na ngome.

¹⁰ Werekuaghieghe nguro ra magho retasira milimu, na kuwika fwana ra mlungu ghwa waka Ashera aighu ya kula mghondi m'baa, na aisi ya kiju cha kula mudi m'baa ghukambie.

¹¹ Wikafukira marumba aighu ya kula andu kotasira milimu mighondinyi kara kara na iro mbari BWANA oreriwingieghe imbiri kwawo; wikabonya malagho ghizamie na kumvavira BWANA hata ukabonya machu.

¹² Wikaitasa milimu icheni BWANA orewizerieghe, “Msakeitasa.”

¹³ Na BWANA orewikanieghe ukiwiwonyera Israeli na Juda kwa memu ya kula mlodi na kula mmboni ukighamba, “Ghalukenyi msighe chia renyu rizamie, muiwadie memu yapo na sharia rapo iro nerewilaghirieghe weke ndeyo na iro nerewidumieghe wadumiki wapo wimghorie.”

¹⁴ Ela ndeweresikireghe, wikakaia wighilikie sa weke ndee, awo wiseremrumirieghe BWANA Mlungu wawo.

¹⁵ Weremenyereghe memu ya BWANA na ilaghano jake, ijo orejibonyereghe na weke ndee; ndeweretalieghe hata na mawonyero ghake. Wereinughieghe milimu ya tee wikakalikia, wikanugha tabia ra iro mbari ra wandu ireni BWANA orewikanieghe wisebonye sa awo.

¹⁶ Wikarisigha sharia rose ra BWANA Mlungu wawo, na kukubonyera weni milimu ichanilo ya ngache iwi; wikabonya mlungu ghwa waka Ashera, na kutasa nyerinyeri, na kumdumikia Baali.

¹⁷ Wikafunya wana wawo wa waka na wa womi kizongona wipate kukorwa; wikakufunya kulaghua na kubonya wusawi; wikakufunya putu kubonya mawiwi imbiri ya BWANA, hata wikam'bonya ujoko ni machu.

¹⁸ Niko BWANA ukawawa loli loli kwa wundu ghwa Israeli, ukawiinja wifume usewiwoneghe, wikaasigharika mbari ya Juda iekeri.

¹⁹ Ela na wandu wa Juda wori ndewerewadieghe sharia ra BWANA Mlungu wawo, kwa kukaia werenughieghe tabia ra Israeli;

²⁰ na BWANA ukasigha kivalwa chose cha Israeli, ukawitirira kwa kuwisigha wingie mikonunyi kwa wakorongi hata wafuma putu usewiwoneghe.

²¹ Ngelo BWANA orewitanyireghe Israeli na nyumba ya Daudi, Waisraeli werem'bonyereghe Jeroboamu mwana wa Nebati ukaie mzuri wawo. Jeroboamu ukawilaghasha Israeli wisemnughe BWANA, ukawishekeria kungia kaung'a mbaa.

²² Na wandu wa Israeli wikanugha kaung'a rose rerebonyeroghe ni Jeroboamu kuseko na kuinjikia ingi;

²³ hata BWANA ukameria kuwiinja Israeli usewiwoneghe sa iji koni orewighorieghe kwa memu ya wadumiki wake walodi. Niko Waisraeli wikakaia wibarishiro isangenyi jawo hata idime.

Waashuru kukaia andenyi ya isanga ja Israeli

²⁴ Nao mzuri wa Ashuru ukareda wandu kufuma Babuloni, Kuthu, Ava, Hamathi, na Sefavaimu; ukawiwika mizi ya Samaria wulalo ghwa wandu wa Israeli, wikawusa Samaria chiaimweri na mizi yaro.

²⁵ Ngelo werezoyagha kukaia aho, ndeweremtasireghe BWANA anduangi. Kwa huwo BWANA ukaduma shimba rikabwagha wandu wamu wawo.

²⁶ Niko mzuri wa Ashuru ukaghorelwa, “Mbari kurighenjere rikaieghe mizi ya Samaria ndewiichi sharia ra Mlungu wa ijo isanga; kwa huwo wawidumie shimba, nawo zighana raawuyabwagha wandu angu wiseichi sharia ya mlungu ghwa ijo isanga.”

²⁷ Nao mzuri wa Ashuru ukaduma momu ukighamba, “Dumenyi momu kwa awa wandu wifumie aho wiwunje mkohani umweri, uendekaia aho, upate kufundisha wandu sharia ya mlungu ghwa isanga.”

²⁸ Niko umu wa wakohani weredwaloghe kufuma Samaria ukawuya na kukaia Betheli; ukafundisha wandu seji ifwane kumtasa BWANA.

²⁹ Hata huwo saki, kula mbari ikakubonyera milungu yawo kula muzi andu werekaieghe, wikaiwika andenyi ya nyumba retasira mighondinyi rerebonyeroghe ni Wasamaria.

³⁰ Wandu wa Babuloni wikakubonyera Sukoth-benothi; wandu wa Kutha wikakubonyera Negal, wandu wa Hamathi wikakubonyera Ashima;

³¹ na wandu wa Ava wikakubonyera Nibhazi na Tartaki; na wandu wa Sefavaimu wikakaia wikifunya wana wawo vizongona vekora kwa Adrameleki na Anameleki milungu ya Sefavaimu.

³² Wokoni werekoghe wamtasa BWANA, na kuwika wakohani kufuma kwawo koni, wikaie wakohani wa aho andu kotasira milimu mighondinyi wipate kufunyagha vizongona aho.

³³ Kwa huwo wikakaia wikimtasa BWANA, na ii chia wikitasa milungu yawo, kunughana na wutasi ghwa iro mbari ra wandu aho werefunyiroghe.

³⁴ Wandu awo waduagha wikibonya woruwo hata idime wikinugha mizango yawo ya kala. Ndewimtasagha BWANA hata kunugha memu na sharia rake orewilaghirieghe wana wa Jakobo uo oremmbangieghe Israeli.

³⁵ BWANA orebonyereghe ilaghano nawo ukiwilaghira, “Msaketasa milungu mizima, hata msakeighoghomia angu kuidumikia, hata kuifunyira vizongona;

³⁶ ela mchamtasa BWANA, uo oremfunyireghe isanga ja Misri kwa ndighi mbaa ya mkonu ghwake; nenyo mchamghoghomia uo, na kumfunyira vizongona.

³⁷ Nenyo mchalindia kuiwadia memu na sharia rake iro oremwandikieghe. Msetase milungu mizima,

³⁸ hata mseliwe ijo ilaghano nerebonyereghe nenyo. Msetase milungu mizima,

³⁹ ela mumtase BWANA Mlungu onyu, nao uchamkira na mikonu ya wamaiza wenyu wose.”

⁴⁰ Elaima ndeweresikireghe, werenughieghe tu tabia rawo ra kala.

⁴¹ Kwa huwo mbari iri rikakaia rikimtasa BWANA, na kudumikia fwana ra milimu yawo, hata na wana wawo na weke wawae wikanugha mfwano ugho hata linu.