2 WAZURI 14 - Biblia Ilagho Jiboie Kwa Wandu Wose

Mzuri Amazia wa Juda

¹ Mwaka ghwa kawi ghwa kubonya nguma kwake Jehoashi mwana wa Jehoahazi mzuri wa Israeli, niko Amazia mwana wa Joashi orewurieghe mzuri wa Juda.

² Orekoghe mundu wa irika ja miaka mirongo iwi na misanu ngelo orezoyagha kubonya nguma; nao ukabonya nguma Jerusalemu kwa miaka mirongo iwi na ikenda. Mae orewangwagha Jehoadini wa Jerusalemu.

³ Ukabonya agho gherekoghe mecha imbiri ya BWANA; nderebonyereghe karakara na ndee Daudi kungi, ela odebonya kara kara na ndee Joashi.

⁴ Ndereinjireghe andu kotasira milimu korekoghe mighondinyi, wandu wikakaia wikibwaghia vizongona na kufukiria marumba ahoeni.

⁵ Wuzuri ghwake ghuendamanga, ukawibwagha wabaa wake wose, angu werem'bwaghieghe ndee ngelo orekoghe mzuri.

⁶ Ela wana wa awo wabwaghi nderewibwaghieghe, kunughana na chuo cha Sharia ya Musa ighambie, “Wavi wisebwagho kwa wundu ghwa mawiwi ghibonyero ni wana wawo; na wana wisebwagho kwa wundu ghwa mawiwi ghibonyero ni weke ndee; ela kula mundu uchabwaghwa kwa wundu ghwa wuwiwi ghwake moni.”

⁷ Amazia ukabwagha Waedomu elfu ikumi aho Vololo ya Chumbi, ukawada muzi ghwa Sela wudenyi, ukaghuwanga Joktheeli, nagho ghwaduagha ghukiwangwa huwo hata linu.

⁸ Niko Amazia ukaduma wadumi kwa Jehoashi mwana wa Jehoahazi, wawae Jehu mzuri wa Israeli ukimzaruma, “Choo diwonane.”

⁹ Nao Jehoashi mzuri wa Israeli ukaduma momu kwa Amazia mzuri wa Juda ukighamba, “Mudi ghwa minjwa ghuko Lebanoni ghwadumie momu kwa mudi ghwa Sida ghwa Lebanoni ghukighamba, ‘Nakunde mwai wako ulowolo ni mdawana wapo.’ Nao nyamandu ya isakenyi ya Lebanoni ikafuma na kughufasha-fasha ghuja mudi ghwa minjwa.

¹⁰ Idana oho Amazia kwamerie kuwisima Waedomu nandighi, na oho kwachulwa ni kukukasa kubaa ngolonyi kwako; katwa ni ugho wubaa ghwako kukaie mzinyi. Kwaki sena kukuloliagha malagho ghekughusha oho chiaimweri na Juda?”

¹¹ Ela Amazia ukalegha kusikira. Kwa huwo Jehoashi mzuri wa Israeli ukajoka na kulwa na Amazia mzuri wa Juda aho Beth-shemeshi isanga ja Juda.

¹² Na Juda wikasimwa ni Israeli hata kula mundu ukaghala cha mzinyi kwake.

¹³ Jehoashi mzuri wa Israeli ukammbwada Amazia mzuri wa Juda, mwana wa Jehoashi, wawae Ahazia aho Beth-shemeshi; ukacha Jerusalemu na kuchikanya wurigha ghwaro wulacha ghwa meta maghana awi.

¹⁴ Ukawusa dhahabu na feza yose, na kula kilambo cherekoghe andenyi ya Hekalu ya BWANA, na andenyi ya ngome ya mzuri, ukaghenda navo cha Samaria.

¹⁵ Mabonyo ghose Jehoashi oreghibonyereghe, na wudimi ghwake seji oremkabieghe Amazia mzuri wa Juda, ghaandikilo andenyi ya Chuo cha Malagho gha Ngelo cha Wazuri wa Israeli.

¹⁶ Jehoashi ukafwa sa weke ndee, ukarikwa Samaria chiaimweri na wazuri wa Israeli; na mwana wake Jeroboamu ukabonya nguma wulalo ghwake.

Kifwa cha Mzuri Amazia wa Juda

¹⁷ Amazia mwana wa Joashi mzuri wa Juda orekaieghe moyo kwa miaka ikumi na misanu nyuma ya kufwa kwa Jehoashi mwana wa Jehoahazi mzuri wa Israeli.

¹⁸ Mabonyo ghose ghisigharikie gha Amazia ghaandikilo andenyi ya Chuo cha Malagho gha Ngelo cha Wazuri wa Juda.

¹⁹ Korekoghe na sheshe Jerusalemu rem'bwagha Amazia, nao ukakimbiria muzi ghwa Lakishi, ela sena wamaiza wake wikamnugha aho na kum'bwagha.

²⁰ Wikamreda na farasi na kumrika aho Jerusalemu chiaimweri na weke ndee mzinyi ghwa Daudi.

²¹ Wandu wose wa Juda wikammbwada Azaria, uo orekoghe wa irika ja miaka ikumi na irandadu, wikam'bonya ukaie mzuri wulalo ghwa ndee Amazia.

²² Azaria ukasima sena, ukawuya ukaagha muzi ghwa Elathi na kughuwunja Juda nyuma ya kifwa cha ndee.

Mzuri Jeroboamu wa kawi wa Israeli

²³ Mwaka ghwa ikumi na isanu ghwa kubonya nguma kwa Amazia mwana wa Joashi mzuri wa Juda, niko Jeroboamu mwana wa Joashi mzuri wa Israeli orezoeghe kubonya nguma Samaria; ukabonya nguma kwa miaka mirongo ina na ghumweri.

²⁴ Ukabonya mawiwi imbiri ya BWANA, hata nderetaneghe na kaung'a ra Jeroboamu mwana wa Nebati, kwa iro. Orewisherekieghe Israeli kungia kaung'enyi.

²⁵ Jeroboamu ukawunja mano ya Israeli kufuma Mbenge ya Hamathi hata Bahari ya Chumbi, kunughana na ilagho ja BWANA uo Mlungu wa Israeli orejidedieghe kwa momu ghwa mdumiki wake Jona mwana wa Amitai, uja mlodi orefumieghe Gathi Hefa.

²⁶ BWANA orekoghe wawona kutirirwa kwa Israeli seji kwakaia kubaa, kwa kukaia ndekoresigharikieghe mndungi useko na wasi ukaiagha mzumba angu mkitina; hata ndekorekoghe na mndungi owitesia Israeli anduangi.

²⁷ Na kwa kukaia BWANA ndeghemie jingi wei uchajivuta irina ja Israeli ndoenyi kose, niko ukawikira kwa kumtumia Jeroboamu mwana wa Joashi.

²⁸ Mabonyo ghose gha Jeroboamu ubonyere, na kudima kwake, na seji uluye wuda na kujiwunja isanga ja Dameshki na Hamathi cha Israeli, agho gherekoghe masanga gha Juda, ghaandikilo andenyi ya Chuo cha Malagho gha Ngelo cha Wazuri wa Israeli.

²⁹ Jeroboamu ukafwa sa weke ndee awo wazuri wa Israeli, na mwana wake Zekaria ukabonya nguma wulalo ghwake.