2 WAZURI 12 - Biblia Ilagho Jiboie Kwa Wandu Wose

Mzuri Joashi wa Juda

¹ Mwaka ghwa mfungade ghwa kubonya nguma kwa Jehu, niko Joashi orezoeghe kubonya nguma. Ukabonya nguma Jerusalemu miaka mirongo ina. Mae orewangwagha Zibia wa muzi ghwa Beer-Sheba.

² Joashi ukabonya mecha mesonyi kwa BWANA matuku ghake ghose, kwa kukaia orefundishiroghe nicha ni mkohani Jehoiada.

³ Elaima sena aho mighondinyi andu kotasira milimu ndekorenoneloghe, wandu wikakaia wikibwagha vizongona na kufukira marumba aho.

⁴ Joashi ukawizera wakohani, “Pesa rose ra vilambo va wueli rifunywagha andenyi ya Hekalu, na ifungu ja kula mundu jipangilo jemfunyira BWANA, na agho wandu wifunyagha kwa ngolo, riredo andenyi ya Hekalu;

⁵ na wakohani wichariwada wipate kuboisagha Hekalu andu ikundikagha kuboiswa.”

⁶ Ela mwaka ghwa mirongo iwi na idadu ghwa kubonya nguma kwa Mzuri Joashi, wakohani ndewereboisireghe Hekalu.

⁷ Niko Mzuri Joashi ukammbanga Jehoiada na wakohani wamu ukakotia, “Kwaki mseboisagha Hekalu? Kwa wundu ughu, msewadeghe pesa ringi kufuma idana, ela mcharineka ripate kutumilwa kwa kuboisa Hekalu.”

⁸ Niko wakohani wikarumiria wileke kuwada pesa, sena wiseboiseghe Hekalu.

⁹ Niko uja mkohani Jehoaida ukawada sanduku ukaiturua ilanga akifunikonyi charo, ukaiwika mbai na mbai ya madhabahu luwaru lwa kiwomi ngelo wandu wakangia andenyi ya Hekalu. Wakohani wiko wudumikinyi, wikawada pesa rafunywa ni wandu ngelo efunya vizongona, wadarikumba andenyi ya iyo sanduku.

¹⁰ Wikawona kukaia pesa rakaia ndazi sandukunyi, muandiki wa mzuri na Mkohani M'baa wadaacha na kuriwudua, wipate kuritala iro pesa rawoneka andenyi ya nyumba ya BWANA, na kurikumba vikuchunyi.

¹¹ Wikameria kuwika mtalo ghose ghwa pesa, wicharineka awo wandu widumikagha andenyi ya Hekalu, nawo wichawilipa masaramala na waaghi wibonyere kazi andenyi ya Hekalu;

¹² na wokoni mafundi gheagha na wawachi magho. Wokoni wichaghua mbau na magho ghiwachilo kwa wundu ghwa kuboisa Hekalu, chiaimweri na kulipa gharama rimu zima.

¹³ Pesa iro ndereretumiloghe kwa kuboisa beseni ra feza, vilambo vewika mishumaa, bakuli, tarumbeta, angu kilambo chingi cha dhahabu angu cha feza; pesa rerefunyiroghe andenyi ya nyumba ya BWANA ndereretumiloghe kwa wundu ugho anduangi.

¹⁴ Pesa iro rose rerelipiloghe wandu weredumikieghe kuiboisa nyumba ya BWANA.

¹⁵ Awo wazighaniri ndewerelombeloghe mtalo ghungi ghwa iro pesa rerelipiloghe awo wandu weredumikieghe, kwa kukaia werekoghe waloli kwa kazi rawo.

¹⁶ Mafunyo gherefunyiroghe kwa wundu ghwa mawiwi na kaung'a, ndegherengiriloghe andenyi ya nyumba ya BWANA, ela gherekoghe ni mafungu gha Wakohani.

¹⁷ Ngelo iyo, Hazaeli mzuri wa Siria ukajoka kulwa na Gathi; ukaghuwada ugho muzi, sena ukajoka kwendalwa na Jerusalemu.

¹⁸ Joashi mzuri wa Juda ukawada vilambo vose verefunyiroghe kwa wundu ghwa nyumba ya BWANA ni weke ndee Jehoshafati, na Jehoramu, na Ahazia, wazuri wa Juda, chiaimweri na ivo orevifunyireghe moni, ukavineka Hazaeli mzuri wa Siria. Niko Hazaeli ukaghenda chia rake kufuma Jerusalemu.

¹⁹ Mabonyo ghose gherebonyeroghe ni Joashi ghaandikilo andenyi ya Chuo cha Malagho gha Ngelo cha Wazuri wa Juda.

²⁰ Wadumiki wake wikamlegha na kum'bwagha andenyi ya nyumba ya Milo, chienyi esea cha Sila.

²¹ Jozakari mwana wa Shimeathi na Jehozabadi mwana wa Shomeri, wadumiki wa mzuri, niwo weremkabieghe Joashi na kum'bwagha. Wikamrika andu weke ndee wererikiloghe mzinyi ghwa Daudi; na mwana wake Amazia ukabonya nguma wulalo ghwake.