2 WATHESALONIKE 3 - Biblia Ilagho Jiboie Kwa Wandu Wose

Ilombi jemeria

¹ Kutua wanidu, dilombienyi; eri ilagho ja Bwana jipate kuera kwa shwa-shwa, na kusima sa iji koni jerebonyeroghe aghadi konyu.

² Sena dipate kukirwa na wandu wawiwi wizamie; angu si wose wiwadie irumirio anduangi.

³ Ela Bwana ni mloli, nao uchamneka ndighi na kumlindia na uja Mmbiwi.

⁴ Nesi deko na irumirio kwa Bwana kwa wundu ghonyu kukaia, mwawuyabonya; na mchabonya agho malagho dawuyamlaghira.

⁵ Uo Bwana nderighenje ngolo renyu ritambukilo ni lukundo lwa Mlungu, na uko kumanya kwa Kristo.

Kanuni rebonya kazi

⁶ Na idana wanidu, damlaghira kwa irina ja Bwana odu Jesu Kristo, kukaia mkutanye na mwanidu uo ose uko mghadi, usenughagha mafundisho agho moreghipatireghe kufuma kodu.

⁷ Angu inyo mmbeni mwamanya seji imfwane kukufwananisha nesi; isi ndederekoghe waghadi iji derekwanyeghe nenyo,

⁸ nesi ndederejieghe vindo va mndungi disevilipe anduangi; ela derebonyereghe kazi kwa kufunga ndighi kio na dime, eri disemlemere mndungi onyu.

⁹ Si angu wei ndediwadie hachi emlemera, ela dedekunda dimmbonyere mfwano ghwa tabia edu, mpate kukufwananisha nagho.

¹⁰ Angu hata iji derekwanyeghe nenyo, deremnekieghe momu ughu: “Ikakaia mndungi wakaia usebonyagha kazi, na vindo useje.”

¹¹ Angu dasikire wei wamu wenyu ni waghadi; nawo waawuyakungira andenyi ya maza ra wandu wazima, hata ndewiwuebonya kazi ingi.

¹² Wandu sa awo dawineka momu na kuwishashira andenyi ya Bwana Jesu Kristo, wibonye kazi rawo kima, wikupatire vindo vawo weni.

¹³ Msakesilwa ni ndighi kwa kubonya nicha wanidu.

¹⁴ Ngera mndungi walegha kusikira agho daghighora andenyi ya barua ihi, mmbikenyi worinyi hata msewadane nao kwa ilagho jingi; eri upate kufwa waya.

¹⁵ Msem'bonye kukaia m'maiza ela mummbonyere sa mwanyinyu.

Malagho gha kutua

¹⁶ Idana, uo Bwana moni wa sere, ndemneke inyo sere ngelo rose kwa chia rose. Bwana ndekaie nenyo mmbose.

¹⁷ Voro iri, ni ini moni Paulo nariandika kwa mkonu ghwapo. Ihi niyo alama ewonyera kula barua niandikagha nimoni. Niko niandikagha huwo.

¹⁸ Mvono ghwa Bwana odu Jesu Kristo ndeghukaie nenyo mmbose.