2 WATHESALONIKE 2 - Biblia Ilagho Jiboie Kwa Wandu Wose

Uja Mmbiwi

¹ Idana kwa malagho gha kucha kwa Bwana odu Jesu Kristo, na kuja kukwana nao kodu, damlomba wanidu,

² msekambo ni chongo icho kisha, angu kusumbuka kwa ilagho jingi ja kiroho, angu kwa barua ingi iwonekagha kukaia yafuma kodu, ikiwonyera wei Ituku ja Bwana jameria kuvika.

³ Msakekalilwa ni mndungi kwa ilagho jingi; angu Ituku ijo ndejichagha kande, kuja kulegha sharia kusechee, na uja Mleghi ufunukulo, uo mundu otota,

⁴ uo utangalagha na kukujosa moni aighu ya kula kindo chiwangwagha mlungu, angu kilambo chetaswa, hata uvikie kusea kidombo andenyi ya Hekalu ya Mlungu, ukikughora uo moni kukaia Mlungu.

⁵ Ndemkumbukagha kukaia neremghorieghe malagho agho iji nerekwanyeghe nenyo?

⁶ Nenyo mwamanya icho chawuyamghiria uo Mleghi idana; nao uchafunukulwa kwa ngelo yake.

⁷ Angu uo Mleghi uvisikie wamerie kuzoya kazi, ela uo wawuyamghiria kuwoneka idana, uchadua ukibonya huwo hata wainjika.

⁸ Niko uja Mleghi uchafunukulwa, na Bwana Jesu ucham'bwagha kwa miruke ya momu ghwake na kumtotesha kwa kuwoneka kwake na kucha kwake.

⁹ Uo Mleghi, ucharedwa ni ndighi ra Shetani, nao uchacha nandighi rose rebonya weke mwakilimbiti wa tee na mashiniko;

¹⁰ na mikalo yose izamie kwa wundu ghwa wandu witotagha, kwa kukaia wereleghieghe kuikunda ija loli eri wipate kukia.

¹¹ Kwa huwo, Mlungu uchawikumba wurumu m'baa gholaghasha wipate kurumiria maza ra tee;

¹² eri awo wose wisereirumirieghe ija loli, werekoghe wikiboilwanya na kulegha ija hachi, wipate kutanywa.

Kusaghulwa kwa wundu ghwa kukia

¹³ Ela isi, deko na suti emfunyira Mlungu chawucha matuku ghose, kwa wundu ghonyu wanidu mkundo ni Bwana; kwa kukaia Mlungu oremsaghueghe inyo kufuma kuzoya, mpate kukia kwa chia ya kueleshwa ni uja Roho, na kuirumiria ija loli.

¹⁴ Mlungu oremmbangieghe ilagho iji kwa chia ya Ilagho Jiboie deremchilieghe inyo, eri mughupate ugho wubaa ghwa Bwana odu Jesu Kristo.

¹⁵ Kwa wundu ugho wanidu, mangenyi gi na kumazira agho mafundisho deremfundishireghe; ngera ni kwa chia ya madedo ghedu, angu kwa chia ya barua.

¹⁶ Idana Bwana odu Jesu Kristo moni, na Mlungu Aba odu, uo oredikundieghe na kudineka wuhoreshi ghwa ngolo kwa kala na kala, na isuwirio icha, kwa chia ya mvono;

¹⁷ ndemhoreshe ngolo renyu na kurimangisha kwa kula ilagho, na kazi ndicha.