2 SAMUELI 9 - Biblia Ilagho Jiboie Kwa Wandu Wose

Daudi na Mefiboshethi

¹ Nao Daudi ukaghamba, “Ngera oko mndungi usigharikie wa kivalwa cha Sauli, nipate kum'bonyera mecha kwa wundu ghwa Jonathani?”

² Korekoghe na mdumiki umu nyumbenyi kwa Sauli, irina jake ni Siba. Wikamreda kwa Daudi, na mzuri ukamkotia, “Oho nuo Siba?” Ukamtumbulia, “Hee, ni ini moni mdumiki wako.”

³ Mzuri ukamkotia, “Ndekuwadie mndungi wa kivalwa cha Sauli, usigharikie, nipate kum'bonyera mecha seji nerelaghirieghe kwa Mlungu?” Siba ukamzera mzuri, “Oko mwana umweri wa Jonathani usigharikie, nao ookelemia maghu.”

⁴ Mzuri ukamzera, “Oko hao?” Siba ukamtumbulia, “Oko nyumbenyi kwa Makiri mwana wa Amieli ukaiagha Lo-debari.”

⁵ Nao Mzuri Daudi ukaduma, ukaredwa kufuma nyumbenyi kwa Makiri mwana wa Amieli aja Lo-debari.

⁶ Mefiboshethi mwana wa Jonathani, wawae Sauli ukacha kwa Daudi; ukaghwa kiwushu-wushu kwa ishima imbiri ya Daudi. Daudi ukammbanga, “Mefiboshethi!” Ukadika, “Neko aeni mdumiki wako.”

⁷ Daudi ukamzera, “Kusakeobua, kwa kukaia nichakubonyera mecha kwa wundu ghwa ndeyo Jonathani; sena ndoe rose ra wawayo Sauli nichakuwunjira, na oho kuchakaia kukija mezenyi kwapo matuku ghose.”

⁸ Nao Mefiboshethi ukaghoghoma kwa ishima ukaghamba, “Ne kilamboki chetalwa ini mdumiki wako, nani neeka sa koshi ifue?”

⁹ Niko mzuri ukammbanga Siba uja mdumiki wa Sauli ukamzera, “Vilambo vose verekoghe va Sauli, chiaimweri na kinyumba chake, navineka wawae bwana wako.

¹⁰ Na oho, chiaimweri na wana wako, na wadumiki wako, mchakaia mkiilima iyo ndoe kwa wundu ghwake, na kureda mavalo gharo; eri mwana wa bwana wako usesowe kindo cheja. Ela Mefiboshethi moni, uo mwana wa bwana wako, uchakaia ukija mezenyi kwapo matuku ghose.” Siba orekoghe na wana wa womi ikumi na wasanu, na wadumiki mirongo iwi.

¹¹ Siba ukamzera mzuri, “Maza iro rose kwanilaghira mzuri, nicharibonya ini mdumiki wako. Niko Mefiboshethi ukaja mezenyi kwa Daudi, sa umu wa wana wa mzuri.”

¹² Mefiboshethi orekoghe na mwana mtini wa womi uwangwagha Mika. Awo wandu wose werekoghe wikikaia nyumbenyi kwa Siba wikawuya wadumiki wa Mefiboshethi.

¹³ Niko Mefiboshethi ukakaia Jerusalemu, ukadua ukija vindo mezenyi kwa mzuri matuku ghose; nao orekoghe mkelemeri wa maghu ghake ghose.