2 SAMUELI 7 - Biblia Ilagho Jiboie Kwa Wandu Wose

Nathani kudumwa kwa Daudi

¹ Mzuri Daudi ukakaia nicha ngomenyi kwake; na BWANA ukamneka kuhora aghadi ya wamaiza wake weremmarieghe chia rose.

² Niko mzuri ukamzera mlodi Nathani, “Wona ini naawuyakaia andenyi ya nyumba iaghilo kwa midi ya sida, na Sanduku ya BWANA yaawuyakaia hemenyi!”

³ Nathani ukamzera, “Bonya agho kuwonagha nicha angu BWANA oko andwamweri na oho.”

⁴ Kio chija cheni, ilagho ja BWANA jikamchea Nathani jikighamba,

⁵ “Ghenda kumzere mdumiki wapo Daudi huwu, ‘BWANA waghamba welee; Kwadima kuniaghia nyumba nikaie andenyi?

⁶ Jingi sekaia andenyi ya nyumba kufuma nafunya wandu wa Israeli Misri hata idime. Ini nedeeka ngikaia hemenyi iji nerekoghe ngimara-mara.

⁷ Namare-mare andu kose chiaimweri na wandu wose wa Israeli. Jingi mwanisikire ngilawia vilongozi venyu wei, “Kwaki mseniaghiagha nyumba ya midi ya sida?” ’

⁸ Kwa huwo kumzere mdumiki wapo Daudi huwu, ‘Nedekuwusa kukilisha ng'ondi mlambenyi, kupate kukaia kilongozi cha wandu wapo Israeli;

⁹ ngakaianya na oho andu kose koreghendighe, ngawisima wamaiza wako wose werekoghe imbiri kwako. Nichakubonya oho kukaie na irina ibaa karakara na marina gha wabaa wiko ndoenyi.

¹⁰ Sena nichawisaghuya wandu wapo Israeli andu nichaawiwika, wipate kukaia andu kwawo koni wisechaasumbulwa ni mndungi sena; hata wandu wawiwi ndewichaawikoronga sena sa kala,

¹¹ seji wawuyawikoronga kufuma ngelo ija nerewikieghe watanyi aighu yawo; nani nichakuneka wuhoreshi aghadi ya wamaiza wako wose. Aighu ya agho, BWANA waghora kukaia uchaimangisha nyumba yako.

¹² Ngelo yako efwa ikavika, nao kufo kuriko sa weke ndeyo, nichammbusira umu wa kivalwa chako, mwana wako moni; nani nichachimangisha kifumbi cha wuzuri ghwake.

¹³ Uo uchaniaghia nyumba, nani nichamangisha wuzuri ghwake kwa kala na kala.

¹⁴ Ini nichakaia ndee, nao uchakaia mwana wapo. Ukabonya makosa, nichamkaba kwa kutumia wandu, sa iji koni ndee mwana ukabagha mwana wake.

¹⁵ Ela sichaainja lukundo lwapo kwake seji nerebonyereghe kwa Sauli, uo neremuinjireghe ima ngakuwika oho.

¹⁶ Nyumba yako na wuzuri ghwako ghuchamangishwa putu imbiri kwapo ini kwa kala; na kifumbi chako cha nguma nichachimangisha kwa kala na kala.’”

¹⁷ Nathani ukamghoria Daudi malagho ghose gha mawono agho karakara na seji oreghoreloghe ni BWANA.

Malombi gha Daudi ghefunya chawucha

¹⁸ Nao Mzuri Daudi ukangia andenyi ya Hema Ekwania, ukasea kidombo ukamlomba BWANA ukighamba, “Ini neko kii ee Bwana MLUNGU, na wandu wa nyumba yapo weko kii, hata kudibonyere maza mbaa ring'ane huwu?

¹⁹ Nao sena ee Bwana MLUNGU, kukawona agho ni matini, kukachuria kulaghira kukaia kuchaniaghia ini mdumiki wako nyumba matuku ghichagha; sena kwaja malagho gha kivalwa chake chichagha ee Bwana MLUNGU!

²⁰ Da ni ilaghoki jichumbagha ini Daudi nidimagha kukuzera? Angu oho kwaniichi ini mdumiki wako ee Bwana MLUNGU!

²¹ Oho kwabonya maza iri rose mbaa kwa wundu ghwa ilaghiro jako, na kwa kukunda kwa ngolo yako cheni; na oho kwanimanyisha ini mdumiki wako.

²² Kwa huwo koko m'baa ee BWANA Mlungu, hata ndekuwadie Mlungu ungi mzima sa oho, kunughana na agho ghose dighisikire kwa madu ghedu.

²³ Ni mbari iyao ndoenyi iko sa wandu wako Israeli, awo koreghendieghe kuwikombua wikaie wandu wako, eri kukupatire kumoni irina, na kuwibonyera maza ra mashiniko; kwa kuwinga imbiri kwawo mbari chiaimweri na milungu yawo?

²⁴ Na oho kwawimangishire wandu wako Israeli wikaie wandu wako kwa kala na kala; na oho ee BWANA kwawurie Mlungu wawo.

²⁵ Na idana ee BWANA Mlungu, kujimangishe ilagho kwajighora kwa wundu ghwapo ini mdumiki wako, na kwa wundu ghwa wandu wa nyumba yapo; kujibonye sa iji koni kwaghamba;

²⁶ na irina jako jichakaia ibaa kwa kala hata wandu wikaie wikighora, ‘BWANA wa majeshi nuo Mlungu wa Israeli,’ na nyumba yapo ini mdumiki wako Daudi ichadua imbiri kwako.

²⁷ Angu oho ee BWANA wa majeshi, uo Mlungu wa Israeli, kwaredie mafunuo agha kwapo ini mdumiki wako kukighamba, ‘Nichakuaghia nyumba,’ niko ini mdumiki wako nakufungisha ndighi kureda malombi ghapo imbiri kwako.

²⁸ Na idana ee Bwana MLUNGU oho ko Mlungu, na malagho ghako ni gha loli, na oho kwanilaghirie maza iri ndicha ini mdumiki wako.

²⁹ Kwa huwo idana kuboilo kuirasimia nyumba yapo ini mdumiki wako, eri ipate kudua kwa kala imbiri kwako, kwa kukaia oho ee Bwana MLUNGU kwajighorie ilagho iji, na nyumba yapo ini mdumiki wako icharasimilwa kunughana na ijo irasimio jako kwa kala na kala.”