2 SAMUELI 4 - Biblia Ilagho Jiboie Kwa Wandu Wose

Kubwaghwa kwa Ishboshethi

¹ Ishboshethi mwana wa Sauli uendasikira kukaia Abneri wabwaghilo Hebroni, ukafwa ngolo na wandu wose wa Israeli wikangilwa ni kiture.

² Uo mwana wa Sauli orekoghe na wandu wawi, awo werekoghe wabaa wa majeshi ghake; irina ja umu orewangwagha Baana na uja wa kawi orewangwagha Rekabu; nawo ni wana wa Rimoni mundu wa kivalwa cha Benjamini ufumie Beerothi: (kwa kukaia muzi ghwa Beerothi ghoretaliloghe kukaia muzi ghumu ghwa kivalwa cha Benjamini;

³ Na Waberothi werekimbirieghe cha Gitaimu, wikakaia aho kiwughenyi hata linu).

⁴ Jonathani mwana wa Sauli orekoghe na mwana wa womi uko na maghu ghikelemere. Orekoghe mwana wa irika ja miaka misanu, ingelo malagho gha Sauli na Jonathani ghereredeloghe kufuma Jezreeli, Mreri wake ukamduka ukakimbia. Ela iji orekoghe ukikimbia na iseghe, uo mwana ukapotoka ukashoghonoka na kuwuya mkelemeri; na irina ja uo mwana ni Mefiboshethi.

⁵ Niko wana wa Rimoni, uja M'beerothi, weke Rekabu na Baana wikafuma wikaghenda hata luma lwa dime ghadi, wikacha nyumbenyi kwa Ishboshethi ukihoresha.

⁶ Mlindiri mnyango ghwa nyumba orekoghe ukiela ngano, ela ukawoka kudungumia, ukalala; niko aho Rekabu na mruna Baana wikangia nyumbenyi.

⁷ Hata iji wangia nyumbenyi, wikamkua Ishboshethi ulale chumbenyi kwake. Nao wikamkaba na kum'bwagha, wikamdumbua chongo chake. Wikafuma nacho, wikaghenda na chia ya Araba, kio chee;

⁸ wikachireda chija chongo kwa Daudi aja Hebroni, wikamzera mzuri, “Chongo cha Ishboshethi mwana wa Sauli uja m'maiza wako orekoghe ukikulola ukubwaghe hechi; BWANA walipia kisasi idime iji cha bwana wapo mzuri aighu ya Sauli na kivalwa chake.”

⁹ Ela Daudi ukawitumbulia Rekabu na mruna Baana, awo wana wa Rimoni uja M'beerothi, “Sa iji BWANA ukaiagha moyo, uo orenikirieghe na kula wasi,

¹⁰ iji mndumu orechieghe na kunighoria wei ‘Sauli wafwa’, ukighesha huwo waareda malagho mecha, neremmbwadieghe na kum'bwagha aho Siklagi; na agho nigho gherekoghe malipo ghake neremnekieghe kwa agho malagho ghake.

¹¹ Welee, nikuchumba saki kwa wandu wawiwi wam'bwagha mundu wa hachi uko ulale wulinyi kwake, andenyi ya nyumba yake? Ndeinifwane na ini nilipie kisasi bagha yake na kumtotesha inyo kufuma ndoenyi?”

¹² Nao Daudi ukafunya momu wandu wake wa irika wiwibwaghe. Nawo wikawibwagha na kudumbua mikonu yawo na maghu ghawo; wikawiwanika mbai na mbai ya ndiwa ya Hebroni. Ela wikachiwada chongo cha Ishboshethi na kuchirika andenyi ya kaburi ya Abneri aja Hebroni.