2 SAMUELI 23 - Biblia Ilagho Jiboie Kwa Wandu Wose

Malagho gha Daudi gha kutua

¹ Agha nigho malagho gha kutua gha Daudi: Madedo gha Daudi mwana wa Jese, madedo gha mundu ujosero ni Mlungu uo mshingwa mavuda wa Mlungu wa Jakobo; mdungi zaburi risingie wa Israeli:

² Roho wa BWANA wawuyaghora ukinitumia, nadaghora malagho ghake na momu ghwapo.

³ Mlungu wa Israeli waghorie, uo uko mbanga ya Israeli wanizerie, “Iji mndumu wabonya nguma aighu ya wadamu kwa hachi, ukibonya nguma uko andenyi ya kuobua kwa Mlungu,

⁴ uchawing'alia sa mwengere ghwa luma lwa na kesho, sa iruwa jing'alaa-ng'ala ngelo ndoe yakombwa nakesho; na kubusa nyasi mbishi nyuma ya kunyelwa ni vua.”

⁵ Hee, si huwo koni kivalwa chapo chiko na Mlungu? Angu orenibonyereghe ilaghano ja kala na kala, jilaghirilo na kumangishwa kwa wundu ghwa vilambo vose. Welee, ndechaanibonya niwone nicha na kunikatishira bea yapo anguwada?

⁶ Ela wandu wisemwichi Mlungu weeka sa minjwa, iyo minjwa ekumbwa noko; kwa kukaia ndeidimagha kuwadwa na vala,

⁷ ela uo mundu uiadadagha suti utumie chuma na mbela ya ifumu nayo yakorwa na kumerelwa ni modo.

Masikari gha Daudi agho gherekoghe ghikumikie

⁸ Agha nigho marina gha masikari gha Daudi agho gherekumikieghe: Joshebu-bashebethi ufumie Takemoni; orekoghe m'baa wa awo wabaa wadadu welusha wuda. Uo oretumieghe ifumu jake kubwagha wandu maghana wunyanya andenyi ya wuda ghumweri.

⁹ Uo wa kawi wa awo wabaa wadadu ni Eleazari mwana wa Dodo wa kinyumba cha Ahohi. Orekwanyeghe na Daudi ingelo werewizarumagha Wafilisti awo werekwanyikieghe kwa wuda ima Waisraeli wikakuwunjagha nyuma.

¹⁰ Orewukieghe na kuwikaba Wafilisti hata mkonu ghwake ghukasilwa, ukamaziria lufu lwake, na BWANA ukabonya wusimi m'baa ituku ijo; wandu weechawuya tu kurua wafu maswagha.

¹¹ Uo wa kadadu wa awo wabaa wadadu ni Shama mwana wa Agee, ufumie Harari. Wafilisti werekoghe wakwanyika chiaimweri aja Lehi, andu korekoghe na mbuwa ichue miwalwa ya dengu, na wandu wikawikimbia Wafilisti.

¹² Ela Shama ukamanga gi ghadi na ghadi ya ija mbuwa; ukailindia na kuwibwagha Wafilisti; BWANA ukampatira wusimi m'baa.

¹³ Kaavui na ngelo ya makuwido, wandu wadadu wa awo mirongo idadu wereserieghe kwa Daudi iji orekaieghe mbangenyi aja Adulamu, na bonjo ya Wafilisti werekoghe wabonya kambi vololonyi ya Refaimu.

¹⁴ Ngelo iyo Daudi odeeka ukikuvisa, na ngome ya Wafilisti edeeka aja Bethlehemu.

¹⁵ Daudi ukakaia na bea ya machi ukaghamba, “Oe ngai ado! Ngera loli mndungi wadanipatira machi ghenywa ghafuma kiriwa cha Bethlehemu chiko kaavui na mbenge!”

¹⁶ Nao mang'oni adadu wikakufungisha ndighi kuida aghadi ya kambi ya Wafilisti, wikadaya machi kiriwenyi cha Bethlehemu, chiko kaavui na mbenge, wikamredia Daudi. Ela Daudi ukalegha kughinywa, na wulalo ghwaro ukaghifunya kizongona kwa BWANA kwa kughidia andonyi;

¹⁷ ukaghamba, “Ilagho jenywa agha machi jikaie kula nani putu ee BWANA kwa kukaia ni karakara na kunywa bagha ra wandu wawika marangi ghawo ndengonyi kuendaghionda.” Niko Daudi ukalegha kughinywa. Malagho agho gherebonyeroghe ni agho mang'oni adadu.

¹⁸ Abishai mruna Joabu mwana wa Seruia, orekoghe m'baa wa vilongozi mirongo idadu. Ukawusa ifumu jake na kuwibwagha wandu maghana adadu; ukakupatira irina aghadi ya awo mirongo idadu.

¹⁹ Orekoghe mundu ukumikie aghadi ya awo mirongo idadu, ukawuya m'baa wawo; ela nderevikieghe wuing'oni ghwa waja wambao wadadu anduangi.

²⁰ Na Benaia mwana wa Jehoiada orekoghe ing'oni ja Kabseeli, m'bonyi wa maza mbaa. Orebwaghieghe mang'oni awi gha Moabu. Wokoni orengirieghe kinenyi chiko na shimba andenyi; ukaibwagha ngelo theluji ereserieghe.

²¹ Sena ukam'bwagha Mmisri umu ughokie uko na ndighi, orekoghe na ifumu mkonunyi kwake, ela Benaia ukamseria na mzata; ukamsoka ifumu jake na kum'bwagha uja Mmisri na ifumu jake jeni.

²² Agha nigho malagho gherebonyeroghe ni Benaia mwana wa Jehoiada, ukakupatira irina aghadi ya ghaja mang'oni mirongo idadu.

²³ Orekumikieghe loli loli aghadi ya waja wandu mirongo idadu ela nderevikieghe wuing'oni ghwa waja wandu wadadu anduangi. Na Daudi ukammbika ukaie m'baa wa walindiri wake.

²⁴ Asaheli mruna Joabu orekoghe umu wa waja mang'oni mirongo idadu, na Elhanani mwana wa Dodo kufuma Bethlehemu;

²⁵ Shama na Elika wifumie Harodi;

²⁶ Helezi ufumie Peleti; Ira mwana wa Ikeshi ufumie Tekoa;

²⁷ Abiezeri ufumie Anathothi, Mebunai, Mhushathi;

²⁸ Salmoni, Muahohi, Maharai ufumie Netofa;

²⁹ Helebu mwana wa Baana ufumie Netofa, Itai mwana wa Ribai ufumie Gibea ya Wabenjamini;

³⁰ Benaia ufumie Pirathoni, Hidai ufumie meda ya machi gha Gashi;

³¹ Abialboni, Muarbathi, Azmawethi ufumie Bahurimu;

³² Eliaba ufumie Shaalboni, wana wa Jasheni, Jonathani,

³³ Shama, Mharari, Ahiamu mwana wa Sharari, Mharari;

³⁴ Elifeleti mwana wa Ahasbai ufumie Maaka, Eliamu mwana wa Ahithofeli ufumie Gilo;

³⁵ Hezro ufumie Karmeli, Paarai Muarbi;

³⁶ Igali mwana wa Nathani ufumie Soba, Bani, Mgadi;

³⁷ Zeleki, Muamoni, Naharai ufumie Beerothi uo oremdukiagha maswagha Joabu mwana wa Seruia;

³⁸ Ira, Muithri, Garebu, Muithri;

³⁹ Uria Mhiti; wose ni wandu mang'oni mirongo idadu na mfungade.