2 SAMUELI 21 - Biblia Ilagho Jiboie Kwa Wandu Wose

Kubwaghwa kwa wandu wa kivalwa cha Sauli

¹ Matuku gha Daudi, korekoghe na njala inughane kwa miaka idadu; Daudi ukamlomba BWANA aighu ya ilagho ijo. BWANA ukaghamba, “Koko na wuwiwi ghodia bagha kwa Sauli na kivalwa chake; angu werewibwaghieghe Wagibeoni.”

² Nao mzuri ukawiwanga wandu wa Gibeoni; (awo Wagibeoni ndewerekoghe Waisraeli, ela ni masighariko gha Waamori, werebonyereghe ighemi na Waisraeli kukaia wichawilindia; ela Sauli ukifunga ndighi kwa wundu ghwa Waisraeli na wandu wa Juda, ukakunda kuwitotesha Waamori.)

³ Daudi ukawizera wandu wa Gibeoni, “Mwakunde nim'bonyereki? Ni chiaki nichaabonya kureda mapatano, eri muelo ni ngolo na wandu wa BWANA?”

⁴ Wagibeoni wikatumbulia, “Agha si malagho gha feza angu dhahabu ghiko aghadi yedu na Sauli angu na kivalwa chake; hata si malagho gha isi kubwagha mndungi wa Israeli.” Daudi ukakotia, “Da ni ilaghoki mkunde nim'bonyere?”

⁵ Nao Wagibeoni wikamzera mzuri, “U mundu udibwaghie na kudibonyera mpango ghoditotesha, eri disekaie na wulalo ghungi andenyi ya isanga ja Israeli,

⁶ deekunda dineko wana wake mfungade dipate kuwinyonyoresha mudinyi aha Gibea ya Sauli mghondinyi kwa BWANA.” Mzuri ukaghamba, “Nimneka.”

⁷ Ela mzuri ukamkira Mefiboshethi mwana wa Jonathani, nao ni wawae Sauli; kwa kukaia orebonyereghe ighemi na Jonathani mwana wa Sauli imbiri ya BWANA.

⁸ Mzuri ukawada wana wawi wa Rispa mwai wa Aia, uo oremvaieghe Sauli, Armondi na Mefiboshethi, na wana wamu wasanu wa Merabu mwai wa Sauli, awo oremvaieghe Adrieli mwana wa Barzilai, M'meholathi;

⁹ ukawifunya kwa wandu wa Gibeoni wipate kutoteshwa, nawo wikawinyonyoresha mdinyi aighu mghondinyi imbiri ya BWANA, na wose mfungade wikafwa chiaimweri. Werebwaghiloghe matuku gha imbiri gha kuzoya kwa makuwido gha shairi.

¹⁰ Niko Rispa mwai wa Aia ukawada nguwo ya igunia, ukakubonyera moni kiwanda ighonyi, kufuma kuzoya kwa makuwido hata vua ikanya aighu ya iyo mimbi. Ukakaia ukiilindia nadime isejigho ni nyonyi na nakio isejigho ni nyamandu ra isakenyi.

¹¹ Daudi uendaghorelwa seji Rispa mwai wa Aia, uo muka owika wa Sauli ubonyere,

¹² Daudi ukaghenda na kuwusa maindi gha Sauli na mwana wake Jonathani kufuma kwa wandu wa Jabeshi-gileadi awo wereghiiwieghe kufuma kiwachenyi cha wandu wose aho Beth-shani andu Wafilisti werewinyonyoshereghe ngelo Wafilisti werewibwaghieghe aighu ya Mghondi ghwa Gilboa.

¹³ Ukaghireda agho maindi gha Sauli na Jonathani na kughiranganya na ghaja gha wandu mfungade werenyonyoshereghe.

¹⁴ Wikaghirika maindi gha Sauli na Jonathani isanga ja Benjamini aho Zela; andenyi ya kaburi ya Kishi ndee wake Sauli; na wandu wikabonya sa iji koni mzuri orelaghirieghe. Nyuma ya huwo, Mlungu ukasikira malombi ghawo kwa wundu ghwa isanga.

Mawuda aighu ya majitu gha Wafilisti

¹⁵ Wafilisti wikazoya kubonya wuda na Waisraeli sena, Daudi ukasea chiaimweri na wadumiki wake, wikalwa na Wafilisti hata Daudi ukasilwa.

¹⁶ Ishbi-benobu umu wa waja majitu, uhu ifumu jake ja shaba jerekoghe na wulemeri ghwa kilo idadu na nusu, na lufu lwake luwishi, ukaririkanya kum'bwagha Daudi.

¹⁷ Ela Abishai mwana wa Seruia, ukacha kumtesia Daudi, nao ukamkaba na kum'bwagha uja Mfilisti. Niko wandu wa Daudi wikamghemesha kukaia ndechaaghendanya nawo wudenyi sena, angu uo ni sa taa ya Israeli, icherima.

¹⁸ Nyuma ya ugho wuda, ghukabuka wuda ghumu sena na Wafilisti aja Gobu; niko Sibekai, Mhushathi ukam'bwagha Safu, uo orekoghe umu wa kivalwa cha majitu.

¹⁹ Sena wuda ghumu ghukabuka na Wafilisti aja Gobu, na Elhanani mwana wa Jairi M'bethlehemu ukam'bwagha Goliathi, Mgiti, uo mbela ya ifumu jake erekoghe sa mudi ghwa mluki uzi.

²⁰ Wuda ghumu ghukabuka sena aja Gathi, aho korekoghe na mundu mlacha nandighi, mikonu yake erekoghe na vala virandadu kula ghumu, na mano arandadu kula lwau; vose ni mirongo iwi na vina; nao moni orekoghe wa kivalwa cha majitu.

²¹ Nao moni iji orewizarumieghe Israeli, ukabwaghwa ni Jonathani mwana wa Shimei, mruna Daudi.

²² Awa bana werekoghe kivalwa cha majitu gha Gathi, wikabwaghwa ni Daudi, na wandu wake.