2 SAMUELI 20 - Biblia Ilagho Jiboie Kwa Wandu Wose

Wuleghi ghwa Sheba

¹ Nao aeni aho Gilgali kukafumirika mndumu wa kisha-kisha uwangwaghwa Sheba mwana wa Bikri, M'benjamini; ukaikaba tarumbeta ukighamba, “Isi ndediwadie ifungu jingi kwa Daudi, hata ndediwadie ifwa jingi kwa mwana wa Jese. Kula mundu ndeghale cha hemenyi kwake ee Israeli.”

² Niko wandu wose wa Israeli wikamkimbia Daudi na kumnugha Sheba mwana wa Bikri; ela wandu wa Juda wikanughana na mzuri wawo kwa wuloli kufuma Jordani hata wikangia Jerusalemu.

³ Nao Daudi ukangia nyumbenyi kwake aho Jerusalemu; ukawada waja waka wewika ikumi orewisighieghe wikizighana ngome, ukawingira nyumbenyi imu wikaie aisi ya wulindiri, ukakaia ukiwilisha tu, ela nderengirieghe kwawo. Wikakaia wikilindilwa aho sa waka wifuilo, hata ituku ja kufwa kwawo.

⁴ Niko mzuri ukamzera Amasa, “Wanga wandu wa womi wose wa Juda, mchanye aha imbiri ya matuku adadu.”

⁵ Nao Amasa ukafuma; ukawikwanya wandu wa Juda, ela uo moni ukachelewa kuvika ija saa erelaghiriloghe.

⁶ Daudi ukamzera Abishai, “Kumanye Sheba mwana wa Bikri uchadiredia wasi kuchumba Absalomu. Idana wada wandu wapo kumnughe, usechengia andenyi ya ngome rimu ra muzi na kudilaghaya.”

⁷ Nao wandu wa Joabu chiaimweri na Wakerethi na Wapelethi na mang'oni ghose gha wuda wikafuma Jerusalemu chiaimweri na Abishai wipate kumnugha Sheba mwana wa Bikri.

⁸ Wiendavika aho ighonyi ibaa jiko Gibeoni, Amasa ukacha kukwana nawo. Na Joabu orekoghe warwa marwao gha wuda, ukakufunga mkowa na ighu, na lufu luko kiwonyi kwaro. Hata iji orekoghe ukighenda, luja lufu lukapotoka.

⁹ Nao Joabu ukamzera Amasa, “Koko mana mwanidu?” Ukawada sombe ra Amasa na mkonu ghwake ghwa kiwomi upate kumsusugha.

¹⁰ Ela Amasa nderekoghe ukiwona luja lufu lwawadilwa ni Joabu. Niko Joabu ukamdunga nalo kifunyi, na kuwudua mawula ghake andonyi; nao ukafwa, Joabu usewurie kumdunga indo ja kawi. Niko Joabu na mruna Abishai wikamnugha Sheba mwana wa Bikri.

¹¹ Nao mundu umu wa Joabu ukakaia kimusi kaavui na mumbi ghwa Amasa, ukaghamba, “Umundu ose umkunde Joabu na Daudi, ndenughe Joabu.”

¹² Mumbi ghwa Amasa ghorekoghe ghwarogha bagha achienyi. Kula mundu orekoghe ukiida, uvika aho, ukakaia kimusi. Uja mundu uendawona kukaia ghuja mumbi ghuamangisha wandu kimusi, ukaghukurudua kufuma chienyi, na kughuwika kula a mlambenyi, ukaghufinikira nguwo.

¹³ Ghuja mumbi ghuendainjwa chienyi, wandu wose wikamnugha Joabu kummbinga Sheba mwana wa Bikri.

¹⁴ Nao Sheba ukaida masanga ghose gha Israeli, hata ukavika Abeli aja Beth-maaka na Wabikri wose wikakwanyika chiaimweri wikamnugha.

¹⁵ Niko wandu wose wa Joabu wikacha na kughumara ugho muzi ghwa Abeli ya Beth-maaka; wikaagha ndoe nokoighu sa kisaghu, kughulangaya ugho muzi a wurighenyi ghwa shighadi; wikazoya kutika ugho wurigha wipate kughughusha.

¹⁶ Nao muka umu uwadie suku ukawanga kufuma nandenyi ya muzi ukighamba, “Sikirenyi! Sikirenyi! Mzerenyi Joabu usoghode kaavui didedanye.”

¹⁷ Nao Joabu ukasoghoda, na uja muka ukaghamba, “Welee ni oho kumoni Joabu?” Ukatumbulia, “Ni ini moni.” Uja muka ukamzera, “Sikiria malagho ghapo ini mdumiki wako.” Ukatumbulia, “Nawuyasikiria.”

¹⁸ Uja muka ukaghamba, “Korekoghe na mghoro kala ghoreghambagha, ‘Ghendenyi mlole njama aja Abeli.’ Na kwa chia iyo, wandu wikakaia wikiboisa malagho ghawo.

¹⁹ Ini ne umu wa waja wandu wikunde sere, sena wiko wa loli andenyi ya Israeli; oho kwakuwika tayari kughunona muzi ghuko sa mao andenyi ya Israeli; kwaki kunonagha ifwa ja BWANA?”

²⁰ Joabu ukatumbulia, “Agho ghikaie kula, ghikaie kula putu nani, ghezerwa kedi ni ini ninonagha!

²¹ Iyo si loli ingi putu; ela oko mndumu wa isanga ja mighondinyi ja Efraimu uwangwagha Sheba mwana wa Bikri; nuo ukufunyire kulwa na Mzuri Daudi; mkamfunya uo moni uekeri, nichaghusigha muzi.” Uja muka ukamzera Joabu “Ola dichakukumbia chongo chake awurighenyi.”

²² Niko uja muka ukamara kwa wandu wose ukitumia suku rake, wikachidumbua chongo cha Sheba mwana wa Bikri, wikamkumbia Joabu cha shighadi. Nao Joabu ukakaba tarumbeta, na wandu wose wikafumukana; wikaghala kula mundu cha mzinyi kwake. Na Joabu ukawuya kwa mzuri Jerusalemu.

Wandu wabaa wa Daudi

²³ Joabu orekoghe m'baa wa majeshi ghose gha Israeli; na Benaia mwana wa Jehoiada orekoghe m'baa wa Wakerethi na Wapelethi;

²⁴ Adoramu orekoghe m'baa wa wandu wedumikishwa kazi; na Jehoshafati mwana wa Ahiludi orekoghe karani;

²⁵ na Sheva orekoghe muandiki; Zadoku na Abiathari werekoghe wakohani;

²⁶ na Ira, Mjairi orekoghe mkohani wa Daudi.