2 SAMUELI 16 - Biblia Ilagho Jiboie Kwa Wandu Wose

Daudi na Siba

¹ Daudi uendaida koighu mghondinyi na kughenda imbiri katini, ukakwana na uja mdumiki wa Mefiboshethi uwangwagha Siba chiaimweri na weke punda wawi waalwa na kudukushirwa mikate maghana awi, vanga ighana jimweri va zabibu, matunda ighana jimweri na kiriba cha mrongo cha divei.

² Mzuri ukamzera Siba, “Kwaki kwareda ivi vilambo?” Siba ukatumbulia, “Awa weke punda ni kwa wundu ghwa wandu wa mzuri wiwijoke, mkate na matunda ni kwa wundu ghwa wandu wa irika wije, na divei ni kwa wundu ghwa awo wichaazimia kireti wipate kunyoshwa.”

³ Nao mzuri ukamkotia, “Mefiboshethi uja wawae bwana wako Sauli oko hao?” Siba ukatumbulia, “Nechi waasigharika Jerusalemu ukighamba, ‘Idime wandu wa Israeli wichaniwunjira wuzuri ghwa aba.’”

⁴ Mzuri ukamzera Siba, “Ola iro rose rerekoghe ra Mefiboshethi richawuya rako.” Siba ukaghamba, “Nawusa kwa chawucha; elaima nirumirie nikudumikieghe bwana wapo mzuri kwa kala na kala.”

Daudi na Shimei

⁵ Hata iji Mzuri Daudi wavika Bahurimu, mndumu wa kivalwa cha Sauli ukacha, na irina jake orewangwagha Shimei mwana wa Gera. Ukacha ukiewia Daudi kwa milungu yake.

⁶ Ukakaia ukimkumba Daudi na magho chiaimweri na wadumiki wa Daudi wose; ingelo wandu wabaa na masikari wa Mzuri Daudi werekoghe wammaria chia rose.

⁷ Shimei ukakaia ukimuewia Daudi ukighamba, “Ghenda noko! Ghenda noko! Oho mundu odia bagha; mundu wa kisha!

⁸ BWANA walipa kisasi aighu yako kwa wundu ghwa bagha kuidirie ya wandu wa kinyumba cha Sauli uo kungirie kubonye nguma, wulalo ghwake; na idana BWANA waghufunya wuzuri kwako na kughuneka mwana wako Absalomu. Wuwiwi ghwako ghodia bagha ghwakunona kumoni.”

⁹ Nao Abishai mwana wa Seruia ukamzera mzuri, “Kwaki ihi koshi ifue imuewiagha bwana wapo mzuri? Sigha niruwuke nimdumbuo chongo chake.”

¹⁰ Ela mzuri ukamzera, “Dekwanye wada inyo wana wa Seruia? Mwamanya wada ngera waadumwa ni BWANA uniewie? Nani udimagha kughiria isekaie huwo?”

¹¹ Daudi ukamzera Abishai na wabaa wake wose, “Ikakaia mwana wapo tiki waawuyalola kunifunya irangi japo, ni kuchumba saki uhu M'benjamini? Msighenyi uniewie, kewada ni BWANA wamzera.

¹² Yadimika BWANA ughuzighane wasi ghwapo, na kewada kwa kuewelwa huwu, unilipe mecha idime.”

¹³ Niko Daudi na wandu wake wikakaia wikighenda chienyi, na Shimei ukakaia ukighenda na kimonu cha mghondi ukiewia na kumkumbia Daudi magho na kummichira teri.

¹⁴ Mzuri na wandu wose orekwanyeghe nawo wikavika Jordani wasilwa na ndighi, ukahoresha aho.

Absalomu kungia Jerusalemu

¹⁵ Absalomu na wandu wose wa Israeli wikangia Jerusalemu wikwanye na Ahithofeli.

¹⁶ Uja mghenyi wa Daudi, Hushai Muariki uendacha kwa Absalomu, ukamzera, “Mzuri uduo moyo! Mzuri uduo moyo!”

¹⁷ Absalomu ukamzera Hushai “Ughu nigho wuloli ghwako kwa mghenyi wako? Kwaki kuseghendanye na mghenyi wako?”

¹⁸ Hushai ukatumbulia, “Nidima wada? Ini neeka luwaru lwa uo wasaghulwa ni BWANA, na awa wandu, na wandu wose wa Israeli. Ini nichakanya na oho.

¹⁹ Kukakoni nani ifwaneghe nimdumikie isaakaia ni mwana wa bwana wapo? Sa iji koni neremdumikieghe ndeyo, ni huwo koni idana nichakudumikia oho.”

²⁰ Niko Absalomu ukamghalukia Ahithofeli ukamzera, “Dineke mawoni ghako, kuwona dibonya wada?”

²¹ Nao Ahithofeli ukamzera Absalomu, “Ngia kwa waka wewika wa ndeyo, awo wawisigha wilindieghe ngome; niko aho Waisraeli wose wichaasikira na kumanya loli kukaia kwamerie kuzamilwa ni ndeyo; na aho wandu wose mkwanye wichapata ngolo.”

²² Wikadunga hema aighu darinyi kwa wundu ghwa Absalomu, na Absalomu ukangia kwa waka wa ndee imbiri ya Waisraeli wose.

²³ Matuku ghaja, Ahithofeli ukafunya mawoni, ghadawuswa seji ni ilagho ja Mlungu; kwa huwo mawoni gha Ahithofeli, nigho gherenughiloghe ni Daudi na hata Absalomu wori.