2 PETRO 3 - Biblia Ilagho Jiboie Kwa Wandu Wose

Ilaghiro ja kucha kwa Bwana

¹ Barua ihi namuandikia ni ya kawi wakundwa, nani kwa barua rose, narinyavurisha nia renyu kwa kumkumbusa;

² mpate kukumbuka seji walodi wielie werezoeghe kughora, na ugho momu ghwa Bwana na Mkiri ghuchee kwa chia ya wadumi wenyu.

³ Ilagho ja imbiri, suti mtambukilo kukaia matuku gha kutua mbai, wandu wisekagha kwa lumenyo wichacha wikiseka kwa kunugha bea rawo weni,

⁴ wikighamba, “Orelaghirieghe wei uchacha; da uao sena? E hoku kufuma weke aba wafwa, vilambo vose veeka sa iji koni vereumbiloghe?”

⁵ Na ilagho iji wajiliwa kidali kukaia, kwa ilagho ja Mlungu, mlungunyi koreumbiloghe koicho, na ndoenyi korebonyeroghe kufuma machinyi na kwa chia ya machi;

⁶ na kwa agho machi, ugho wurumwengu ghwa iro ngelo, ghoretotereghe kwa gharika.

⁷ Ela kwa ilagho ijo jeni, mlungunyi na ndoenyi riko idana rawikilwa modo; naro raawuyawikwa hata ijo Ituku ja Kutanywa, na kutoteshwa kwa wandu wisemuobuagha Mlungu.

⁸ Ela msakesowa kumanya ilagho iji wakundwa; kukaia kwa Bwana Ituku jimweri, ni sa miaka elfu; na miaka elfu, ni sa Ituku jimweri.

⁹ Bwana ndemukagha kukatisha ilaghiro jake seji wamu wigheshagha wei umuka; ela waawuyarumaghia kwa wundu ghonyu. Ndewuekunda mndungi utote, ela ookunda wandu wose wivikie kuhea.

¹⁰ Ela Ituku ja Bwana jichacha sa kitoi; ituku ijo, mlungunyi kuchaida kwa lwaka lubaa, na vilambo viko andenyi yaro vichasagha kwa modo, na ndoenyi kuchahia chiaimweri na vilambo vose viko andenyi yaro.

¹¹ Kwa kukaia vilambo ivi vose vichasagha huwu, yamfwana inyo mkaie wandu wifwane wada? Yamfwana mkaie na irangi jielie, na kuobua kwa Mlungu;

¹² mkiwesera, na kushashira uko kucha kwa Ituku ja Mlungu; kwa wundu ghwa ijo, mlungunyi kuchaaka modo na kusagha, na vilambo varo vichasagha kwa modo.

¹³ Ela kunughana na ilaghiro jake, isi daawuyaweseria mlungunyi kuwishi, na ndoenyi kuwishi, andu hachi ikaiagha.

¹⁴ Kwa huwo wakundwa, angu mwawuyawesera maza iri, fungenyi ndighi, mkulo ni Mlungu wandu msewadie iboli hata ikosa jingi; mko na sere.

¹⁵ Nenyo talenyi kuja kurumaghia kwa Bwana odu kukaia ni kukia. Sa iji koni mkundwa odu mwanidu Paulo oremuandikieghe barua, kwa iyo hikima unekelo;

¹⁶ ukija malagho agha, sa iji koni ubonyagha kwa barua rake. Gheko malagho ghamu andenyi yaro ghikurie kutambukilwa; nagho awo wandu wiseichi hata wisemange, wadaghighalua seji wighaluagha agho maandiko mazima kwa kukutotesha weni.

¹⁷ Kwa huwo inyo wakundwa, mkimanya maza iri kiimbiri, mkulindie msechelaghashwa ni ijo ikosa ja wandu wileghagha, mchelaghalwa ni uko kumanga konyu.

¹⁸ Ela mzoghuo andenyi ya mvono, na uko kummanya Bwana na Mkiri odu Jesu Kristo. Kwake uo, ndeghukaie ghuja wubaa, kufuma idana, hata kwa kala na kala. Amen.