2 PETRO 2 - Biblia Ilagho Jiboie Kwa Wandu Wose

Walimu wa tee

¹ Ela na walodi wa tee wori werewukieghe aghadi ya wandu, sa iji koni kuchaakaia na walimu wa tee aghadi konyu, awo wichaareda kwa kiviso mafundisho gha tee ghenona, hata kumkana uo Bwana orewighueghe; nawo wichakuredia weni kutota kwa shwa-shwa.

² Na wandu wengi wichanugha mabonyo ghawo ghizamie, na kwa wundu ghwawo, ija Chia ya loli ichadukanwa.

³ Na kwa lwafuo lwawo wichamkalia, eri wikupatire weni fwaida. Kufuma kala Mtanyi wawo oko aeni, na Mtoteshi wawo ndelalagha anduangi.

⁴ Mlungu nderewilekieghe awo weke malaika werebonyereghe kaung'a, ela orewikumbieghe jehanamunyi, na kuwingira andenyi ya vina viko ndenyi va kira; andu wawuyawikwa hata Ituku ja Kutanywa.

⁵ Hata ndereghulekieghe ghuja wurumwengu ghwa kala, ela oremkirieghe Nuhu mchili wa hachi, andwamweri na wandu wazima mfungade, iji oreiredieghe gharika aighu ya wurumwengu ghwa wandu wisemuobuagha Mlungu.

⁶ Mlungu oreitanyireghe mizi ya Sodoma na Gomora, ukaikora na kuiwunja maivu, na kuibonya ikaie mfwano kwa awo wisemuobuagha Mlungu.

⁷ Ukamvuvua Loti uja mhachi, nao orekoghe na wasi m'baa kwa wundu ghwa uko kulaka kuzamie kwa wandu wawiwi.

⁸ (Angu uja mundu wa hachi orekoghe ukisirimika ngolonyi kwake ituku ituku, kwa wundu ghwa maza rizamie orekoghe ukiriwona na kurisikira, iji orekoghe ukikanya nawo.)

⁹ Kwa huwo, Bwana waichi kuwivuvua na matimo awo wimuobuagha Mlungu, na kuwiwika wakosi wifungie hata Ituku ja Kutanywa;

¹⁰ na kuchumba awo wawuyanugha bea ra wuchafu, na kumenya kubonyerwa nguma. Ni walimu wa tee wiko na wuwana, wikunde kuwisholia awo wabaa kuseko na wowa.

¹¹ Na weke malaika, hata ngera ni wabaa, wiko na kudima, ndewiwishitakiagha imbiri ya Bwana kwa masholio ghangi anduangi.

¹² Ela awo wandu, wiko sa nyamandu risewadie akili, rivalo tu, ridimagha kuwadwa na kubwaghwa, washolia maza wiserimanyagha; nawo wichatoteshwa kunughana na ghuja wuwiwi ghwawo ghoni;

¹³ na kupata matiriro kwa wundu ghwa mabonyo ghawo ghizamie. Wadaboilwa ni kubonya karamu ra lwafuo nadime. Wachua maboli na makosa, nawo wareda maza ra waya iji warangana nenyo karamunyi konyu.

¹⁴ Weko na meso ghichue wulaki, nawo ndewikunde kutana na kaung'a. Wakalia wandu wanyonge; ngolo rawo rakufundishire kukaia na lwafuo; ni wandu wiwadilo ni njowe putu.

¹⁵ Walagharie kwa kusigha chia ya loli; nawo wanughie chia ya Balaamu mwana wa Beori, uo orekundieghe fwaida kwa kubonya kiwiwi;

¹⁶ ela orekemeloghe kwa ikosa jake. Punda usededagha, ukadeda na lwaka lwa mdamu, na kujighiria isu ja uo mlodi.

¹⁷ Awa wandu weeka sa ndoria ra machi riomie, na sa makungughu ghidukwagha ni mbeo. Wamerie kuwikilwa kira kibaa.

¹⁸ Angu, wikideda madedo gha kukukasa gha wukelu, wawiruda kwa bea rawo ra wulaki wandu wimerie kufufunuka kafwani kufuma kwa awo wikaiagha makosenyi.

¹⁹ Wawilaghira wuhuru, ngelo awo weni wiko wuzumbenyi ghwa wuwiwi; angu icho chose chimsimagha mundu, chadammbika wuzumbenyi.

²⁰ Kwa kukaia, nyuma ya kufufunuka kufuma kwa ugho wuchafu ghwa wurumwengu, kwa chia ya kummanya Bwana na Mkiri odu Jesu Kristo, wikawuya wikawadwa na kumazirwa andenyi kwaro sena, kutua kwawo kwakaia kuzamie kuchumba imbiri.

²¹ Angu ekaiagha nicha kumangu wisereimanyireghe iyo chia ya hachi jingi, kuchumba kuimanya ima wiwue nyuma, na kughusigha ghuja momu ghuelie ugho werenekeloghe.

²² Iakaia kwawo seji ikatanisho jighambagha, Koshi yawuria madaiko ghake, na nguwe ioghoshero, kuwuyaghala-ghala sena mazozonyi.