2 JOHANE 1 - Biblia Ilagho Jiboie Kwa Wandu Wose

¹ Ini mghosi, nakuandikia oho mkeku msaghulwa na wana wako, niwikunde kwa loli; hata si ini moni niekeri anduangi, ela na awo wose wiimanyagha iyo loli wori;

² kwa kukaia iyo loli yadakaia andenyi kodu, nayo ichadua andwamweri nesi kwa kala na kala.

³ Mvono, na wughoma, na sere ifumagha kwa Mlungu Aba na kwa Jesu Kristo Mwana wa uja Aba, ichakaia andwamweri nesi kwa loli na lukundo.

Loli na lukundo

⁴ Nereboiloghe nandighi kuwikua wana wako wamu wikiinugha ija loli, seji koni dilaghirilo ni uja Aba.

⁵ Na idana mkeku, nakulomba dikundane diweni na diweni, si angu wei naawuyakuandikia momu mmbishi, ela ni ghuja ghoni dikaiagha nagho kufuma kuzoya.

⁶ Ulu nilo lukundo, kukaia, dighende karakara na memu yake; na ughu nigho ugho momu, kukaia, mghende kwa lukundo sa iji koni moresikireghe kufuma kuzoya.

⁷ Angu wakalii wengi wamerie kufumirika wurumwengunyi, wandu wikanagha kukaia Jesu Kristo orechieghe ukawuya mdamu; mundu uo ni mkalii, na M'maiza wa Kristo.

⁸ Mkuzighane mmbeni, eri mselaghashe icho morechidumikieghe, ela mpate mafungu ghikatie.

⁹ Mndungi ughendagha imbiri kuseko na mafundisho gha Kristo, ndewadie Mlungu; uo ukaiagha kwa agho mafundisho, oko na uja Aba andwamweri na uja Mwana wori.

¹⁰ Ngera mndungi wacha konyu, nao nderedagha agha mafundisho, msemkaribishe nyumbenyi konyu, hata msakemroghua;

¹¹ angu uo mundu umroghuagha, wakaia ngara na kazi rake mbiwi.

Malagho gha kutua

¹² Hata ngera neko na malagho mengi ghemuandikia, sikundeghe nitumie karatasi na wino; ela nasuwiria kuchammbona, dipate kuja malagho wushu kwa wushu; eri kuboilwa kodu kukatie.

¹³ Awo wana wa mwanyinyu msaghulwa, wakuroghua.