1 WAZURI 18 - Biblia Ilagho Jiboie Kwa Wandu Wose

Elija na walodi wa Baali

¹ Nyuma ya matuku mengi, mwaka ghwa kadadu ghwa kusowa vua, BWANA ukamzera Elija, “Ghenda kukuwonyere kumoni kwa Ahabu, nani nichanyesha vua.”

² Niko Elija ukafuma kwendakuwonyera moni kwa Ahabu. Njala erekoghe yabia loli loli aja Samaria.

³ Ahabu ukammbanga Obadia, uo orekoghe mzighaniri wa nyumba yake, (Obadia orekoghe mtasi m'baa wa Mlungu;

⁴ hata iji Jezebeli orekoghe ukiwibwagha walodi wa BWANA, Obadia orewivisireghe walodi ighana mbangenyi kwa kuwiwagha vipughi viwi va mirongo-misanu mirongo-misanu; ukakaia ukiwineka vindo na machi.)

⁵ Ahabu ukamzera Obadia, “Nndoko difume isangenyi, dizighane andu kuko na ndoria ra machi, na mbai mbai ya meda yose; kewada dadima kupata nyasi rekira iri farasi na nyumbu, eri dikire iri nyamandu.”

⁶ Wikawaghana kula mundu chia yake. Ahabu ukaghenda ii chia na Obadia ukaghenda ii chia.

⁷ Nao iji Obadia orekoghe ukighenda, ukakwana na Elija ukammanya na kukughoghomesha andoenyi; ukakotia, “Wele ni oho kumoni bwana wapo Elija?”

⁸ Elija ukatumbulia, “Ee, ni ini moni. Ghenda kumghorie bwana wako mzuri kukaia neko aha.”

⁹ Obadia ukatumbulia, “Nabonyere kaung'aki hata kunifunye ini mdumiki wako nipate kubwaghwa ni Mzuri Ahabu?

¹⁰ Naghema kwa BWANA Mlungu wako uko moyo kukaia, Mzuri Ahabu ndesighie kukulola kula isanga na kula wuzuri; hata wikaghamba kukaia ndewikuwonie, suti umghemeshe mzuri wa jija isanga kukaia ndewikuwonie.

¹¹ Na idana kuaghamba niendemzera bwana wapo wei koko aha?

¹² Na nyuma ya kukusigha, Roho wa BWANA uchakudwa andu nisekumanyagha. Ahabu ukacha na kukusowa ngelo namzera wei koko aha, uchanibwagha. Kumbuka ini mdumiki wako ne mtasi Mlungu kufuma wanake ghwapo.

¹³ Wele bwana wapo, ndekughorelo jingi seji ini mdumiki wako nerebonyereghe ingelo Jezebeli orekoghe ukiwibwagha walodi wa BWANA; seji nerewivisireghe walodi wa BWANA ighana jimweri, ngawivisa mbangenyi mirongo-misanu mirongo-misanu, na kuwijisha vindo na machi?

¹⁴ Na idana kunizera wada niendemghoria bwana wapo wei koko aha; nao ndadanibwagha!”

¹⁵ Elija ukatumbulia “Naghema kwa BWANA wa majeshi, uo nimdumikiagha kukaia, nalaghira nichakuwonyera kwa mzuri idime.”

¹⁶ Niko Obadia ukaghenda kummbona Ahabu; ukamghoria. Ahabu ukafuma kwendakwana na Elija.

¹⁷ Nao iji Ahabu wammbona Elija ukaghamba, “Wele ni oho kumoni, msumbui Israeli?”

¹⁸ Elija ukatumbulia, “Si ini ungi nawuyasumbua Israeli, ela ni oho na nyumba ya ndeyo mwawuyasumbua Israeli kwa kuisigha memu ya BWANA na kutasa mlimu ghwa Baali.

¹⁹ Idana duma momu kuwikwanye wandu wose wa Israeli aho Mghondi ghwa Karmeli, chiaimweri na walodi wa Baali maghana ana na mirongo misanu, na wa ghuja mlungu ghwa waka Ashera maghana ana, awo wijagha mezenyi kwa Jezebeli.”

²⁰ Niko Ahabu ukawikwanya wandu wose wa Israeli, na walodi wose aho Mghondi ghwa Karmeli.

²¹ Elija ukasoghoda kaavui na wandu wose ukaghamba, “Wele mdua andenyi ya maghesho awi hata lii? Ikakaia BWANA ni Mlungu mtasenyi; ela ikakaia ni Baali uko Mlungu, basi mtasenyi.” Awo wandu wikanyama kima.

²² Niko Elija ukawizera wandu, “Ni ini moni niekeri nasigharika mlodi wa BWANA, ela walodi wa Baali weko maghana ana na mirongo misanu.

²³ Idana redenyi njau iwi. Walodi wa Baali wisaghuo njau imu, wiidumbuo vipande vipande na kuiwika aighu ya mbande; ela msekore modo ghungi. Ini nichaboisa ija njau imu na kuiwika aighu ya mbande, ela sichaakora modo ghungi.

²⁴ Inyo mlombe kwa irina ja mlungu onyu, na ini nichalomba kwa irina ja BWANA. Uo Mlungu uchamtumbulia kwa kureda modo nuo Mlungu.” Wandu wose wikaghamba, “Ni woruwo.”

²⁵ Niko Elija ukawizera walodi wa Baali, “Saghuonyi mmbeni njau imweri, mzoye muiboise angu inyo muko wengi; mlombe kwa irina ja mlungu onyu, ela msekore modo.”

²⁶ Nao wikawada ija njau werenekeloghe, wikaiboisa; wikamlomba Baali hata dime ghadi wikighamba, “Ee Baali, kuditumbulie.” Ela ndekorekoghe na lwaka, hata mndungi nderetumbulieghe anduangi. Wikaramarama mbai mbai ya iyo madhabahu wereibonyereghe.

²⁷ Dime ghadi, Elija ukazoya kuwikumba solo ukighamba, “Kemenyi kwa lwaka lubaa, angu uo ni mlungu; kewada waawuyapima malagho, angu kewada waafuma shighadi, angu kukaia charonyi, angu kewada waalala na suti uwusiro.”

²⁸ Wikakema kwa lwaka lubaa na kukudema na ndagha na shembe sa mzango ghwawo, na bagha rikadidika.

²⁹ Wikakema na kudeda hata ngelo efunya kizongona cha nakenyi, ela ndekorekoghe na lwaka hata mndungi nderetumbulieghe anduangi.

³⁰ Niko Elija ukawizera wandu, “Soghodenyi kaavui nani.” Wikakwanyika wikimmara chia rose; nao ukaiboisa madhabahu ya BWANA iyo erenoneloghe.

³¹ Ukashoa magho ikumi na awi kunughana na vichuku ikumi na viwi va wana wa Jakobo, uo orewangiloghe Israeli ni BWANA.

³² Ukatumia agho magho kuiagha sena iyo madhabahu emtasira BWANA. Ukakota mtaro mbai mbai yaro, ghudimagha kuchura sa lita ikumi na inya ra machi.

³³ Ukapanga mbande aighu ya madhabahu ukadumbua ija njau vipande vipande, na kuipanga aighu ya mbande. Niko ukaghamba, “Churenyi mitungi ina machi, mughidunge icho kizongona na iro mbande.” Nawo wikadunga.

³⁴ Ukaghamba, “Dungenyi sena indo ja kawi; wikadunga sena indo ja kawi.” Ukawizera sena, “Dungenyi sena indo ja kadadu;” wikabonya wokoni.

³⁵ Machi ghikaimara iyo madhabahu na kuchua mtaronyi.

³⁶ Nao luma lwa kufunya kizongona cha kenyi, mlodi Elija ukacha kaavui na madhabahu ukalomba ukighamba, “Ee BWANA Mlungu wa Abrahamu, na wa Isaaka na wa Jakobo, ndeimanyike idime iji kukaia oho ko Mlungu andenyi ya Israeli, na kukaia ini ne mdumiki wako, nani nabonya agha ghose kwa ilagho jako.

³⁷ Kunisikire ee BWANA kunitumbulie; eri wandu awa wipate kumanya angu oho BWANA ko Mlungu, na kukaia oho kwawighalua cha kwako.”

³⁸ Niko BWANA ukasera modo; ghukakora icho kizongona, na mbande, na magho, na teri; ghukaomera agho machi gheredungiloghe mtaronyi.

³⁹ Nao iji wandu waghiwona agho, wikaghwa kiwushu-wushu wikaghamba, “BWANA nuo Mlungu; BWANA nuo Mlungu!”

⁴⁰ Elija ukawizera, “Wadenyi awo walodi wa Baali; msemfufunushe ungi.” Wandu wikawiwada. Elija ukawighenja hata kamoda ka Kishoni, ukawibwagha.

Kutua kwa kusowa vua

⁴¹ Nao Elija ukamzera Ahabu, “Idana ghenda kuje, kwa kukaia nawuyasikira mrurumo ghwa vua nyingi.”

⁴² Niko Ahabu ukaghenda kuja, na Elija ukajoka aighu ya Mghondi ghwa Karmeli; ukakughoghomesha hata andonyi, na kungira chongo chake ghadi na ghadi ya vitemberu vake;

⁴³ ukamzera mdumiki wake, “Ghenda kuzighane nokoisi cha baharinyi.” Ukaghenda ukazighana; ukaghamba, “Siwonie kindo chingi.” Elija ukamzera, “Ghenda sena. Kuwurie mando mfungade.”

⁴⁴ Nao ughenda indo ja mfungade, ukawuya ukighamba, “Nawona iwingu itini jing'ane sa mkonu ghwa mundu, jikijoka kufuma baharinyi.” Elija ukamzera, “Ghenda kumzere Mzuri Ahabu uboise igare jake usee usetangalo ni vua.”

⁴⁵ Kapindi katini tu, mlungunyi kukakamba mawingu gha chilu, na mbeo ikazoya kuweta; vua ikanya mbaa nandighi. Ahabu ukajoka cha Jezreeli.

⁴⁶ Ndighi ra BWANA rikamchea Elija, ukakufunga nguwo rake kiwonunyi kwake, ukakimbia na kumuida Ahabu hata Jezreeli.