1 WATHESALONIKE 4 - Biblia Ilagho Jiboie Kwa Wandu Wose

Irangi jim'boiagha Mlungu

¹ Kutua wanidu, damvoya na kumshashira inyo andenyi ya Bwana Jesu, kukaia, sa iji koni morekufundishireghe kodu seji imfwane kughenda, na kum'boia Mlungu seji koni mwawuyabonya, mchurie kubonya woruwo koni.

² Angu inyo mwamanya ni mafundishoki deremnekieghe kwa chia ya Bwana Jesu.

³ Mlungu waawuyakunda wueli ghonyu: kukaia, mkutanye na wulaki.

⁴ Kula mundu onyu umanye kukaia na mkake moni; kwa wueli na ishima.

⁵ Si kwa bea rizamie sa wandu wisestaarabikie wisemmanyagha Mlungu anduangi;

⁶ mndungi usakemkita hata kumkosera mruna aighu ya maza iri, kwa kukaia Bwana wadalipia kisasi aighu ya maza iri rose; sa iji koni deremghorieghe imbiri na kumkania.

⁷ Angu Mlungu nderediwangieghe diduo andenyi ya wuchafu, ela dikaie andenyi ya wueli.

⁸ Kwa huwu mndungi ukamenya agha malagho, ndemmenyagha mdamu anduangi, ela uammenya Mlungu; uo umnekagha inyo Roho wake Mweli.

⁹ Idana inyo ndemne haja eandikilwa malagho gha kuwikunda wanidu anduangi, angu inyo mmbeni mwamerie kufundishwa ni Mlungu kukundana mmbeni na mmbeni;

¹⁰ na loli inyo mwawikunde wanidu wose wa Makedonia kose. Ela damshashira wanidu, mchurie kubonya huwo kuchumba,

¹¹ na kukuzaisira kukaia kima, mkirinugha maza renyu reni, na kubonya kazi kwa mikonu yenyu sa iji koni deremlaghirieghe.

¹² Kwa chia iyo, wandu wiserumiriagha wichamneka ishima, nenyo ndemchaakusaghika na mndungi anduangi.

Kucha kwa Bwana

¹³ Ela wanidu ndedikunde inyo mkaie msemanyagha malagho gha awo wimerie kufwa, eri msechekaia mkiwawa ni ngolo sa wandu wazima awo wisewadie isuwirio.

¹⁴ Kwa kukaia isi darumirie kukaia Jesu orefueghe na kuruka sena, huwo koni Mlungu uchawireda andwamweri na Jesu awo werefueghe wikirumiria kwake.

¹⁵ Kwa wundu ghwa agho, damghoria huwu kwa ilagho ja Bwana; kukaia, isi disigharikagha diko moyo hata kucha kwake Bwana, ndedichaawikiria awo wifue anduangi.

¹⁶ Angu Bwana moni uchasea kufuma mlungunyi, na lwaka lubaa lwa nguma, na kuwanga kwa malaika m'baa, na lwaka lwa tarumbeta ya Mlungu. Na awo wifue andenyi ya Kristo, wichazoya kuruka;

¹⁷ niko isi disigharikie diko moyo, dichakafulwa nokoighu cha mawingunyi chiaimweri nawo, dimmare Bwana mbeonyi, na huwo dichakanya andwamweri na Bwana matuku ghose.

¹⁸ Kwa huwo kumbanenyi ngolo mmbeni na mmbeni kwa malagho agha.