1 WATHESALONIKE 3 - Biblia Ilagho Jiboie Kwa Wandu Wose

¹ Kwa huwo iji derewonieghe angu ndedidimagha kurumaghia kuchumba, derekundeghe disigharike nanyuma diekeri aja Athene;

² nesi dikamduma Timotheo, mwanidu na mdumiki wa Mlungu ojichila ijo Ilagho Jiboie ja Kristo, uche kummangisha andenyi ya irumirio jenyu, na kumshashira;

³ eri mndungi usenyavurike kwa wundu ghwa agho matiriro. Inyo mmbeni mwaichi angu isi dawikilo maza iro.

⁴ Angu iji derekwanyeghe nenyo, deremghorieghe kiimbiri kukaia dichapata matiriro, wokoni sa iji koni ibonyekie, na seji mmanyagha.

⁵ Kwa wundu ughu, niendalemwa ni kurumaghia kuchumba, niko ngamduma Timotheo, nipate kumanya malagho gha irumirio jenyu, ngiobua kewada uo Mtimi wachemtima, na kazi edu ikawuya ya duu.

⁶ Ela idana angu Timotheo uwurie kufuma konyu, na kudiredia malagho mecha gha irumirio jenyu na lukundo, wadighorie seji mwawuyadikumbuka tulituli, mkikaia na bea mbaa ediwona, seji koni isi diko na bea mbaa emmbona.

⁷ Kwa wundu ugho wanidu, dahoreshero ngolo andenyi ya wasi na matiriro ghedu ghose derekoghe nagho kwa wundu ghonyu, kwa chia ya ijo irumirio jenyu muko najo.

⁸ Angu idana isi dakaia moyo, iji inyo mwakaia mmange gi andenyi ya Bwana.

⁹ Angu ni chawuchaki didimagha kumfunyira Mlungu kwa wundu ghonyu, na kwa wundu ghwa kuboilwa kose diko nako kwa wundu ghonyu imbiri ya Mlungu odu?

¹⁰ Daawuyalomba kwa kufunga ndighi kio na dime, eri didime kummbona wushu kwa wushu; na kumneka icho chawuyasoweka andenyi ya irumirio jenyu.

¹¹ Idana, Mlungu Aba odu moni, na Bwana odu Jesu, ndediboisire chia echa konyu;

¹² na Bwana ndem'bonye mchurikie, na kukaia na lukundo mmbeni na mmbeni kwa wungi; na kuwikunda wandu wose, seji isi dawuyamkunda inyo.

¹³ Kwa chia ihi, uchamneka ndighi; nenyo mchakaia mkatie na muelie imbiri ya Mlungu Aba odu, iji Bwana odu Jesu uchaacha andwamweri na waeli wake wose.