1 WATHESALONIKE 2 - Biblia Ilagho Jiboie Kwa Wandu Wose

Kazi ya Paulo aho Thesalonike

¹ Inyo mmbeni wanidu, mwamanya angu kumchea kodu ndekorekoghe kwa duu anduangi.

² Ela hata ngera derepatireghe wasi, na kubonywa kiwiwi aja Filipi, seji mwawuyamanya; derekoghe na ngolo kwa Mlungu odu, kumchilia inyo ijo Ilagho Jiboie ja Mlungu dikitangalwa na ndighi.

³ Angu kushingira kodu si kwa makosa kungi, angu kwa wuchafu, hata ndekuko kwa mikalo anduangi;

⁴ ela sa iji koni dererumiriloghe ni Mlungu kukaia dafwane kujidwa ijo Ilagho Jiboie, niko koni dighoragha, si sa kuwiboia wandu anduangi, ela dadajighora kwa kum'boia Mlungu; uo umanyagha ngolo ra wandu.

⁵ Angu isi na jingi ndederetumieghe malagho ghesesea-sesea sa iji koni inyo mmanyagha, hata ghefinikira wusu ghungi anduangi; Mlungu nuo mshahidi.

⁶ Hata ndederelolieghe wubaa kufuma kwa wadamu, ikaiagha ni konyu, angu kwa wandu wazima; hata ngera saki eredimikagha dilawie konyu sa wadumi wa Kristo.

⁷ Ela derekoghe wa mboa aghadi konyu, seji kuwonagha mleli ukiwilindia wana wake.

⁸ Na kwa kukaia deremkundeghe inyo na ndighi, derekoghe tayari kuwaghana, si Ilagho Jiboie jeni jiekeri anduangi, ela hata kufunya marangi ghedu, kwa kukaia morekoghe wa zoghori mbaa kodu.

⁹ Inyo mwakumbuka seji dibonyere kazi kwa kusumbuka nandighi wanidu; derebonyereghe kazi kio na dime, eri disekechamlemera ungi onyu, ngelo dikimchilia ijo Ilagho Jiboie ja Mlungu.

¹⁰ Inyo mo mashahidi, na Mlungu wori ni mshahidi, kukaia tabia edu aghadi konyu inyo warumirii erekoghe ielie, ndicha, na isewadie ikosa jingi;

¹¹ angu mwamanya seji deremshashireghe kula umu onyu, na kumkumba ngolo seji ikaiagha mundu na wana wake; dikimlaghira

¹² angu mkaie na irangi jim'boiagha Mlungu, uo ummbangagha inyo andenyi ya Wuzuri na wubaa ghwake moni.

¹³ Wokoni dadamfunyira Mlungu chawucha kwa wundu ughu, kukaia, mwendajiwusa ilagho ja Mlungu, ijo morejisikireghe kufuma kodu, morejirumirieghe; si sa ilagho ja wadamu anduangi, ela morejirumirieghe sa iji koni jiko ilagho ja Mlungu, ijo jibonyagha kazi andenyi konyu inyo warumirii.

¹⁴ Inyo wanidu moofwanana na makanisa gha Mlungu ghiko andenyi ya Kristo aja Judea; angu morejishiroghe wasi ni wamzenyu weni, sa iji koni awo wa Judea werejishiroghe wasi ni Wayahudi;

¹⁵ awo werem'bwaghieghe uo Bwana Jesu, na awo walodi, wikadiwinga isi. Nawo wadazamia Mlungu, na kuwitangala wandu wose,

¹⁶ kwa kudighiria isi diseghore na wandu wa mbari zima, wichepata kukia; eri wipate kuchichura kipimo cha kaung'a rawo sa matuku ghose. Ela kutua, wamerie kuchelwa ni machu gha Mlungu.

Bea ya Paulo ewighendia sena

¹⁷ Ela wanidu, kufuma dasighana kwa ngelo ndini kimmbi na si kiroho, deretimieghe nandighi dikikaia na bea mbaa dimmbone wushu kwa wushu;

¹⁸ kwa kukaia derekundeghe kuwuya konyu, ini moni Paulo natimie sena na sena; ela Shetani ukadighiria.

¹⁹ Kwani isuwirio jedu niki, angu kuboilwa, angu kirumbu chedu isi dichaakukasa nacho imbiri ya Bwana odu Jesu ngelo ya kucha kwake? Nechi ni inyo.

²⁰ Angu inyo ni wubaa ghodu na kuboilwa kodu.