1 SAMUELI 9 - Biblia Ilagho Jiboie Kwa Wandu Wose

Sauli kukwana na Samueli

¹ Korekoghe na mndumu mzuri wa mali orewangwaghwa Kishi wa kichuku cha Benjamini, nao ni mwana wa Abieli, wawae Zerori mwana wa Bekorathi, wawae Afia.

² Mundu uo orekoghe na mwana wa womi uwangwaghwa Sauli, mdawana ughokie na ndighi; ndekorekoghe na mndungi ughokie kumchumba aghadi ya Israeli yose. Orekoghe mundu mlacha kuchumba wandu wose.

³ Nao weke punda wa Kishi, Sauli ndee, wikalaghaya. Kishi ukamzera mwana wake Sauli, “Wada mdumiki umu mwendelola weke punda.”

⁴ Nao wikaida wikiwilola isanga jose ja mighondinyi ja Efraimu, wikaida isanga ja Shalisha, ela ndewerewiwonieghe. Wikaida isanga ja Shaalimu wikiwilola, ela ndewerekoghe aho anduangi. Niko wikajiida isanga ja Benjamini ela ndewerewiwonieghe.

⁵ Hata iji wavika isanga ja Sufu, Sauli ukamzera uo mdumiki wake werekwanyeghe, “Nndoko diwuye, aba usechesigha kuririkanya maza ra weke punda, na kuwoka kudiririkanya isi.”

⁶ Ela uja mdumiki ukaghamba, “Ola mundu wa Mlungu umu oko andenyi ya ughu muzi; ni mundu unekelo ishima, na malagho ghose ughoragha ghadawuya gha loli. Nndoko dighende kwake; kewada wadima kudighoria maza ra ichi charo chedu.”

⁷ Niko Sauli ukamzera mdumiki wake, “Dikaghenda aho-lee, uo mundu dimdwaia kii, ehoku mkate dikoghe nagho mfukonyi ghwasia, na zawadi ingi emneka uo mundu wa Mlungu ndediwadie; Niki diko nacho?”

⁸ Uja mdumiki ukamtumbulia Sauli, “Nawadie pesa, kibelele kitinieri cha feza; nichamneka uo mundu wa Mlungu upate kudighoria maza ra chia yedu.”

⁹ (Kwa Waisraeli kala, iji mundu wakaendakotia malagho kwa Mlungu wadaghamba, “Nndokonyi dighende kwa Mmboni;” kwa kukaia umundu dimmbangagha mlodi agha matuku, kala wadawangwa Mmboni.)

¹⁰ Nao Sauli ukamzera mdumiki wake, “Kwaghora nicha, nndoko dighende.” Nao wikaghenda cha mzinyi andu mundu wa Mlungu orekoghe.

¹¹ Hata iji werekoghe wikijoka mghondinyi kuvikia ugho muzi, wikakwana na wai wikisea kwendadaya machi, wikawikotia, “Welee, Mmboni oko aha?”

¹² Wikatumbulia, “Oko aeni; ola hoja naimbiri konyu. Shashirenyi, waacha mzinyi idakoni; kwa kukaia wandu wiafunya kizongona andu kotasira mghondinyi idime.

¹³ Mkameria kungia mzinyi mchammbona imbiri usejokie mghondinyi kwendaja vindo; angu wandu ndewijagha usechee, kwa kukaia ni suti urasimie icho kizongona, ima awo wandu wikaribishiro wije. Idana jokenyi shwa-shwa, nenyo mchammbona.”

¹⁴ Niko wikajoka cha mzinyi. Hata iji werekoghe wikingia mzinyi wikammbona Samueli ukicha ngelo oreghendagha cha mghondinyi andu kotasira.

¹⁵ Imbiri Sauli usechee, BWANA orekoghe wamfunukuya Samueli huwu,

¹⁶ “Kesho ngelo sa icheni ihi, nichamduma mndumu kufuma isanga ja Benjamini, na oho kuchamshinga mavuda ukaie mzuri aighu ya wandu wapo Israeli. Uchawikira wandu wapo wisekabo ni Wafilisti; kwa kukaia namerie kuwona makorongo ghawo, na kililo chawo chamerie kunivikia.”

¹⁷ Nao iji Samueli oremmbonieghe Sauli, BWANA ukamzera, “Ola uhu nuo uja mundu nerekughoriagha; uo nuo uchaawibonyera nguma wandu wapo.”

¹⁸ Niko Sauli ukamchea Samueli mbengenyi ukamzera, “Tafadhali niwonyere nyumba ya Mmboni.”

¹⁹ Samueli ukamtumbulia Sauli, “Ni ini moni Mmboni; kiria dijoke cha mghondinyi, kwa kukaia dichajanya idime, na kesho nichamsigha mghende, sena nichakughoria agho ghose kwawuyaghiririkanya.

²⁰ Na malagho gha weke punda wako wilagharie matuku adadu ghisirie ghisesindekusumbua, kwa kukaia wamerie kuwoneka. Na nani uwikilo uikatishe bea ya Israeli, iseeka ni oho na nyumba ya ndeyo?”

²¹ Sauli ukatumbulia, “Nechi ini ne M'benjamini, icho kichuku cha nyuma putu cha Israeli? Na kinyumba cha kedu nicho cha ndonyi putu kuchumba vinyumba vose va kichuku cha Benjamini, Kwaki kunizeragha malagho sa agha?”

²² Niko Samueli ukamdwa Sauli na mdumiki wake ukawireda barazenyi, ukawiwika andu kwa ishima chiaimweri na wandu wabaa werekaribishiroghe sa wandu mirongo idadu.

²³ Samueli ukamzera mpishi, “Reda ija nyama nikuzerieghe kuiwikie mbai.”

²⁴ Nao mpishi ukawada nyama ya bara na vija vindo verewikiloghe aighu yaro, ukaviwika imbiri ya Sauli. Na Samueli ukaghamba, “Ola vindo hevi viwikiloghe. Jaa kwa kukaia ni oho kuwikiloghe, ngelo yaro ikavika kuchejanya na waghenyi.” Nao Sauli wikajanya na Samueli jija ituku.

²⁵ Hata iji wasea kufuma mghondinyi andu kotasira na kungia mzinyi, Sauli ukaboisirwa wuli aighu ya ipaa ja nyumba, ukalala aho.

Samueli kumshinga Sauli mavuda ukaie mzuri

²⁶ Hata iji ndoe yaela, Samueli ukammbanga Sauli aho ipaenyi ja nyumba, “Wuka nikufumire kughende.” Niko Sauli ukawuka wikafuma wose chienyi.

²⁷ Hata iji werekoghe wikighenda, na kuvika kutua kwa muzi, Samueli ukamzera Sauli, “Mzere mdumiki wako ukirie.” Nao uja mdumiki ukaida ukakiria. Niko Samueli ukaghamba, “Dunga maghu kutini nikughorie ilagho ja Mlungu.”