1 SAMUELI 8 - Biblia Ilagho Jiboie Kwa Wandu Wose

Wandu kulomba mzuri

¹ Samueli uendaghosia, ukawibonya wana wake wikaie watanyi wa Israeli.

² Mwana wake wa imbiri orewangwaghwa Joeli, na irina ja uja wa kawi Abija; wikakaia wikitanya aja Beer-sheba.

³ Ela wana wake ndewerekoghe wikinugha mfwano ghwa ndee, wikaghaluka wikikunda kushama; wikawusa hongo, na kwa chia iyo wikailaghasha hachi.

⁴ Niko wabaa wose wa Israeli wikakwanyika chiaimweri na kumghendia Samueli aja Rama;

⁵ wikamzera, “Kumanye kwaghosia, na wana wako ndewiwuenugha mfwano ghwako; idana kudilolie mzuri odibonyera nguma karakara na mbari rose.”

⁶ Ela ijo ilagho jelomba mzuri jikamzamia Samueli, nao ukamlomba BWANA.

⁷ BWANA ukamtumbulia Samueli, “Wisikire awa wandu, kubonye sa iji koni wakuzera; kwa kukaia ndewikuleghie oho, ela waanilegha ini nisekaie mzuri wawo.

⁸ Waakubonyera sa iji koni werekoghe wikinibonyera, kwa kunilegha ini kufuma ngelo ija nerewifunyirege isanga ja Misri hata idime, wikiitasa milungu mizima.

⁹ Oho wisikire, ela kuwiwonyere na ndighi seji uo mzuri uchaawibonyera nguma.”

¹⁰ Niko Samueli ukawighoria awo wandu werelombagha mzuri agho malagho ghose gha BWANA orewizerieghe.

¹¹ Ukawizera, “Malagho gha uo mzuri uchaam'bonyera nguma ghichakaia huwu: Uchawada wana wenyu wa womi na kuwibonya masikari wenighenjesha magare ghake, na farasi rake, na wamu weghenda na maghu imbiri ya magare ghake.

¹² Uchakuwikia moni wabaa wa masikari gha maelfu, na wa mirongo misanu, na wandu wamu wemlimia mbuwa rake na kukuwida; wichakaia wikibonya maswagha ghake gha wuda na vilambo va magare ghake.

¹³ Uchawada wana wenyu wa waka na kuwiwika wikaie weboisa marumba, uchawibonya wikaie wadeki na wandu weocha mikate.

¹⁴ Uchawusa mbuwa renyu rinorie, na ra mizabibu, na ra matunda gha zeituni, na kuwineka wadumiki wake.

¹⁵ Uchakaia ukiwusa ifungu ja ikumi ja viro venyu, na ja zabibu renyu, uwineke wabaa wake wa kazi na wadumiki wake.

¹⁶ Uchawusa wadumiki wenyu wa womi na wa waka, na ng'ombe renyu righokie, na weke punda wenyu, upate kutumia kwa kazi rake.

¹⁷ Uchakaia ukiwusa ifungu ja ikumi ja mfugho renyu, nenyo mchawuya wazumba wake.

¹⁸ Ngelo iyo mchalalamika kwa wundu ghwa mzuri onyu uo moremsaghueghe mmbeni; ela BWANA ndechaamtumbulia ituku ijo.”

¹⁹ Ela awo wandu wikalegha kumsikira Samueli, nawo wikaghamba, “Hata! Isi deekunda mzuri odibonyera nguma,

²⁰ nesi wori dipate kukaia sa wandu wa mbari rose; dikaie na mzuri odibonyera nguma, ukidilongoza na kudiluya wuda ghodu.”

²¹ Nao iji Samueli wasikira malagho gha awo wandu, ukawuya na kumghoria BWANA sena.

²² BWANA ukamzera Samueli, “Wisikire kuwiwikie mzuri.” Niko Samueli ukawizera awo wandu, “Kula mundu ndeghale cha mzinyi kwake.”