1 SAMUELI 29 - Biblia Ilagho Jiboie Kwa Wandu Wose

Daudi kuleghwa ni Wafilisti

¹ Nao Wafilisti wikakwanya majeshi ghawo aja Afeki; na Waisraeli wikabonya kambi aja ndorienyi iko Vololo ya Jezreeli.

² Hata iji vilongozi va Wafilisti werekoghe wikiida, wa ighana, na wa maelfu-elfu, Daudi nao chiaimweri na wandu wake, wikaida watua nyuma wikwanye na Akishi.

³ Uja m'baa wa majeshi gha Wafilisti ukaghamba, “Awa Waebrania wibonyaki aha?” Akishi ukamtumbulia, “Uhu si uja Daudi m'baa wa Sauli mzuri wa Waisraeli, nao wakaia kwapo matuku na miaka. Kufuma wakimbia cha kwapo jingi siwonie ikosa jingi kwake hata linu.”

⁴ Ela wabaa wa majeshi gha Wafilisti wikajokwa ni machu, wikamzera Akishi, “Mmbunje umundu noko, uende ukaie andu koremmbikieghe. Ndeghendanyagha nesi wudenyi, uchewuyadighaluka na kulwa nesi. Ndekuwuemanya kukaia wupatano ghwake na bwana wake ghuapatika kwa chia ewibwagha wandu wedu?

⁵ Nechi wei uhu nuo moni uja Daudi oreborelwagha ni waka wikitumbuliana, ‘Sauli wabwaghie maelfu ghake, na Daudi maelfu ikumi ghake?’”

⁶ Niko Akishi ukammbanga Daudi ukamzera, “Naghema, kwa BWANA uko moyo, oho kwakaie mloli kwapo; nani kondenyi ngolonyi kwapo niawona kumangu daghendanya andu kose nighendagha; kwa kukaia sikuwonie na ikosa jingi kufuma kwacha hata linu. Elaima vilongozi va Wafilisti ndewiwuekurumiria anduangi.

⁷ Kwa huwo idana wuya na sere; eri kusebonye ilagho jingi jewivavira vilongozi va Wafilisti.”

⁸ Daudi ukamkotia Akishi, “Kwani nabonya wada? Kwawonie ikosaki kwapo ini mdumiki wako kufuma nangia kukudumikia hata idime, jinighiriagha kufuma na kulwa wuda na wamaiza wa Bwana wapo mzuri?”

⁹ Akishi ukamtumbulia Daudi, “Namanya angu ndekuwadie ikosa jingi, nani naawuyakuwona sa malaika wa Mlungu; ela wabaa wa Wafilisti waalegha putu ndemghendanyagha wudenyi.

¹⁰ Kwa huwo kuwuke kokio na wadumiki wa bwana wako Sauli awo wose morechanyeghe ndoe ikilangala, moozoya kughenda iruwa jisebukie.”

¹¹ Niko Daudi ukawuka chiaimweri na wandu wake wikawuka nakesho kokio, wikawuya cha isanga ja Wafilisti. Ela Wafilisti wikajoka cha Jezreeli.